碼頭故事 (已搬遷) 新店位置

一直都好想试吓食码头故事，今日终于有机会食到啦。呢度嘅装修好特别，古色古香咁，好有气氛。我地拣咗鸳鸯锅，一边系店员推介嘅招牌麻辣汤底，另一边就系菌汤锅。麻辣汤底真系好香，入面有好多辣椒仔同胡椒，𠮶阵辣味好刺激，同普通得个辣字嘅火锅汤底好唔同，而且越滚越辣，去到最后有一层好厚嘅鲜红色辣油系面，个人认为呢个汤底真系岩哂中意食辣嘅人。菌汤底就清淡啲，有冬菇同金针菇，可以中和返味道比较浓嘅麻辣汤。嘢食方面我地嗌咗一米肥牛，上枱之后就发现佢真系有一米长，一共有10片肥美嘅牛肉，牛肉味好香，又够肥，配埋麻辣汤底，好好食。羊肉卷嘅份量都好多，大概有十几片，卖相好靓，食落好香羊肉味，因为好新鲜，所以就算摆落菌汤底到都唔会有好大阵膻味。狮头肥鹅肠劲新鲜，每条都带有少少肥膏，所以食落好有口感，点埋葱花麻油，真系好正。三秒海带芽有一大碟，跟指示滚三秒就食得，爽口得黎感觉好健康。值得一提嘅系佢嘅茶系玄米茶，米香好浓，同肥肉好夹，超级解腻。希望下次多啲人黎可以试到多啲菜式啦。