上海婆婆336 (已結業)

平时食上海苏杭菜都系拣晚餐时间去，午餐食都系第一次，原来都唔错，有面有小菜套餐拣。繁忙嘅工作天，忙里偷闲喺午饭时间同朋友一齐享受一餐有卖相清雅有质素嘅午餐。惠顾小菜套餐送丝苗白饭一碗同酸辣汤一份，酸辣材料足，食落每啖都多配料，但我唔食得辣。惠顾午餐加$15可配一份餐前冷盘。鸡丝粉皮，粉皮分明，加埋清新嘅配料同埋酱汁，食落有凉浸浸嘅感觉。镇江肴肉，卤涷精透，肉唔会太咸，亦够爽口。四喜烤麸，面筋吸收咗汤汁，唔会太淋。336小笼包，包够薄又唔会一夹就就穿，汤汁丰富，好味。干贝赛螃蟹，蛋白嫩滑，唔太油，清清哋，几好。松子黄花鱼，对鱼头情有独钟嘅我以前食嚫上海菜都会叫砂锅鱼头煲，一直都好想试呢个，因为系炸关系鱼肉唔讲得上系嫩滑，但入口松脆，差唔多成条鱼连骨都可以食，浓厚汁料配上少量虾仁及水果粒，酸酸甜甜好开胃。松仁糯香牛柳粒，松仁香口，牛柳粒有镬气，白色类似年糕嘅粒粒口感烟韧香糯，特别嘅配搭。牛展汤拉面，牛展炆得松软，面质爽口。加$10配酒酿丸子一碗，酒酿味浓，但系我钟意甜，再甜少少啱我啲。