富山和食料理屋 (已結業)

大埔区呢类日式食肆唔多，不过富山系一个唔错选择。可能由于附近冇乜日式食肆，呢度好多时都好多人，平日七点未够已经开始要等位，假日就更加多人。一入到去，感觉上已经有的似和民，不过睇下个菜牌就冇和民咁多野食。今次我六点五十分去到，安排左我坐BAR台位，唔使等冇乜所谓，仲可以见到寿司师父握寿司，虽然我对刺身冇兴趣，但睇落好似几新鲜。今次叫左四样野，一份富山蛋包饭（$33）、一个土佐豆腐（$25）、一个炭火汁烤鸭胸（$33）同一个野菌酿鸡卷（$28），比和民经济少许。讲下味道，蛋包饭蛋皮煎得唔错，蛋皮有厚度，入面未完全熟晒，所以入口较滑，饭同蔬菜粒一齐炒，略为硬少少，汁只系普通茄汁，同在日本的蛋包饭专门店比较就差好远喇！土佐豆腐只有三件，由于豆腐本身较淡，汁就需要较浓味，呢点做得唔错。炭火汁烤鸭胸同野菌酿鸡卷两样小食，鸭胸好多好大碟，有炭烧香味，不过食落较韧，至于野菌酿鸡卷，由于材料属于普通，味道已算不俗。环境上，台比较迫，论舒适就唔及和民，不过都算几企理，服务方面就合格水准，唔算十分出色。