騷 (已結業)

嚟到酒吧林立嘅诺士佛台，试咗最近开嘅楼上酒吧。入到去就见到一部大雪柜，入面放满各式各样嘅香港手工啤酒，雪柜外面仲分别用啤酒樽盖砌咗啤酒樽图案同HKBEER字样。除咗多款饮品之外，仲有几款小食同主食等等，虽然唔及西餐厅多样化，但以一间主打饮嘢嘅餐厅嚟讲选择都算唔少。晌店员嘅推介之下叫咗呢款本地姜试试，系餐厅嘅调酒师自行研制嘅香港手工啤酒cocktail嚟。调酒师晌玻璃杯入面加咗威士忌、姜片、呍呢嗱糖浆、柠檬、蛋白同冰块，仲洒咗肉桂粉，拎到嚟之后先将麦子姜茶啤酒倒入去再捞匀。肉桂将姜味带出，甘香易入口，又冇平时饮姜茶遇到嘅辛口感，非常讨好。啡菇配自家制黑松露酱未食已经闻到阵阵香气，大啡菇切成四片长条形，外层蘸浆炸脆内层就软滑，配上餐厅自家制嘅黑松露酱，够香之余又唔会太过浓郁。蟹肉忌廉意粉中间分别放咗蟹肉丝同青瓜丝，忌廉汁几浓，意粉煮得烟烟韧韧，捞匀嚟食几鲜味。