The Joomak (已結業)

海港城LCX入面嘅The Joomak，系间比较新派嘅韩国菜。几个人嚟就可以试多几款，先系韩式素肉饭卷，从外观上睇同一般嘅韩式紫菜饭卷无异。中间包住切丝素鸡肉、胡萝卜同青瓜等等，再洒上杏仁片，同埋有紫牛油生菜伴碟，一口一件都几爽脆。韭菜煎饼用咗不含牛奶鸡蛋嘅粉浆煎成，嫩绿嘅颜色就主要嚟自韭菜本身，质感薄薄、脆口得来又有几分烟韧。韭菜香浓单食都够味，又或者可以蘸佢哋嘅特制酱汁，微微酸味可以中和热气感。黑蒜鸡嘅炸鸡系无骨、好似鸡球𠮶种，外皮微脆肉质软嫩。表面淋上大量杰身嘅黑蒜酱，味道咸香讨好，同埋洋葱丝同炸蒜片一齐食嘅话就仲香口。烧LA牛肋骨嘅烧汁甜香而浓郁，牛肋骨油花较多，食起嚟柔软中有几分嚼劲，伴碟有羽衣甘蓝、韭菜、洋葱同蜜桃等等杂菜，可以减轻肉类嘅腻感。人参蜜糖雪沙嘅雪沙打得绵滑，牛奶同乳酪味明显，人参味唔重但有回甘。红枣草莓雪沙入面有唔少打碎咗嘅红枣肉，草莓味淡，相对起嚟就比较甜，不过都算唔错。