小南鄭記台南碗粿
碗粿其實係用米漿加唔同配料蒸成嘅米糕，雖然一樣放喺碗仔到蒸，但口感同用粘米粉嘅砵仔糕好唔同。小南鄭記呢度賣嘅係台南碗粿，入面有蝦米、瘦肉、蛋黃、香菇同肉燥，加埋肉燥原汁熬煮嘅醬油膏，特別惹味。想食清啲可以試虱目魚羹，魚肉彈牙鮮美。
去台灣剩係識食夜市嘅炸雞扒？其實呢間便當老字號嘅炸排骨亦非常有水準！老闆自己都曾經係成日食便當嘅打工仔，深知一個好味嘅便當可以幫人打氣，就決定自己開間便當店，研究醃料同炸粉嘅獨家秘方，令佢地嘅厚實豬扒外酥內Juicy，香得嚟仲唔油膩。
行咗成日，攰到無哂胃口嘅話可以嚟呢間小店食碟紅油抄手，絕對唔會浪費Quota！佢地嘅雲吞以大粒而皮滑餡鮮出名，加埋有誘人椒麻香而唔太辣嘅紅油醬，同芹菜、芫荽、蔥花等香料，香濃開胃。另外仲可以嗌多碗餃子或者牛肉麵，麵條仲係請麵廠用專屬配方特製。
欣葉台菜創始店
如果同長輩或者屋企人一齊旅行又想一試正宗台灣菜，唔少當地人都會推薦呢一間。菜脯蛋係台灣嘅家常菜，金黃色嘅煎蛋裡面係菜脯，亦即係鹹嘅白蘿蔔乾，蓬鬆嘅蛋同爽脆菜脯相輔相成，啱哂送番薯粥或者白飯。招牌菜滷肉醬汁調味得宜，滷肉肥瘦相間齒頰留香。
海霸王
想再食豪啲？呢間餐廳就係唔少台灣人擺酒嘅首選。櫻花蝦米糕就係台灣年菜常見菜式之一，嚴選東港櫻花蝦加埋火腿等同糯米一齊炒，米粒分明，撈埋櫻花蝦鮮香Q軟。另一招牌鮮魚芋香鍋以新鮮魚骨熬湯，加入魚肉、芋頭、魚蛋等，識食梗係要食吸收哂精華嘅米粉。
隨時接收最新資訊
讚好OpenRice專頁！