澳門人對火鍋嘅要求真係越嚟越高，湯底要有特色、配料要夠多元化，連餐廳都要有主題，先可以滿足各位追求新鮮感、相機先食嘅 Foodie。幫大家精選三間可以用 OpenRice 網上訂座嘅主題火鍋店，今年秋冬一於齊齊去「滾」！
 

宮廷風火鍋燒肉店  后宮  

圖：餐廳IG

各位要做貴妃定係皇后？唔係穿越劇，而係講緊關閘長壽大馬路呢間餐廳嘅放題套餐，兩款套餐最大分別係肉類同刺身，皇后套餐當然就可以有多啲選擇啦。貴妃套餐嘅火鍋同燒肉本身都相當吸引，可以任食豬五花、黑豚肉、菲力牛柳、虎蝦、扇貝等，回本無難度。
 

時令海鮮火鍋店  16號碼頭德興(澳門)海鮮火鍋  

圖：crm.macfbgroup

店名當中嘅16號碼頭，源自餐廳前身、九十年代開業嘅新得興海鮮火鍋正正坐落於內港16號碼頭。餐廳主打時令海鮮同新鮮食材，例如最近就有阿拉斯加長腳蟹同法國大生蠔！亦有創意十足嘅選擇，例如神龍鍋會配搭包有雞湯嘅七粒龍珠，其實係骨膠原湯底，養顏最啱。
 

專賣海南文昌雞  悅緣四季  

圖：餐廳FB

打邊爐唔一定重口味嘅，呢間就主打海南文昌椰子雞，湯底以清甜嘅椰子水為主，加上肉嫩柔滑嘅海南文昌雞，標榜回歸自然、食返食材嘅原汁原味！見到配料有齊珍珠馬蹄、沙薑、海南青桔，就知夠正宗。配料就推介各款手切牛肉、養生菇菌同生猛海鮮。