正牌車厘哥夫

营业中

休息中

點解有包紐結糖食，都喺為食嘅食友所贈，去完澳門，就晌氹仔買嚟依小包紐結糖俾我。因為先後收到好幾包嚟自唔同店舖嘅紐結糖，所以就一次過寫晒4篇食評，名為「聯朋結糖」（一）、（二）、（三）、（四） ，唔喺要做咩比較，只喺藉文多謝食友一番心意啫 。之前已從另一食友收到一包「老牌」車厘哥夫嘅低糖紐結糖，正當以為又收到同樣手信之時，發覺店名有頗大分別，包裝袋上寫住「正牌」車厘哥夫，仲要標明「凌師傅首創」，有埋佢張嘜頭相 。其實「老牌」vs「正牌」，小弟唔知邊間好啲、邊間出名啲，亦無心去考究，因為飲食世界，各有獨門秘技；況且，就算同一樣嘢食，有人覺得好好食，亦有人覺得好難食，口味嘅嘢始終好個人囉。正牌車厘哥夫嘅，都喺一包4粒，每粒獨立包裝，成份有花生、砂糖、牛油、奶粉、蛋白、液體葡萄糖，基本上跟老牌車厘哥夫嘅一樣，在乎比重份量。色澤偏白，但就無咁巗巉，質感都喺硬脆有奶香，不過最大分別喺花生粒勁多 。後尾再上佢哋個網址，發覺原來仲有好多款口味，如低糖低卡紐結糖、朱古力脆卜米紐結糖、菠萝紐結糖、芒果紐結糖、椰子纽结糖、橙子纽结糖……等等 ，仲有一款叫西杏紐結糖，喺以美國杏仁取代花生，相信更香脆