油塘麵包店最多，但有質素嘅餐廳就冇乜，不過講到我成家最常幫襯嘅餐廳就係「栢檔極品海南雞飯」。佢位於大本營地下連接地鐵站嗰層，而且其實係主打外賣。 我之前最鍾意用外賣App落單買一隻雞返屋企加餸，外賣自取有八折優惠，平過喺嗰度就咁買。不過呢日阿媽直頭乜都冇煮，所以就試吓栢檔嘅二人套餐。 二人套餐($188)，套餐內容豐富，定價相宜。佢份量幾多，我認為三個人都夠食。 極品海南雞(半隻)，呢度啲雞南雞好出色，一個字形容就係「滑」，雞皮滑，雞肉更滑。雞皮去毛去到乾淨，雖然無啫喱層，但亦無過膩。雞肉無雪藏味，肉身白𠽌𠽌，除咗雞翼，全部去骨，食得方便。隨海南雞奉上嘅三色醬料亦唔錯，口味正宗。如果鍾意醬料，可以叫店員比多幾個。 豬頸肉整齊排列，脂肪含量唔高，食落油份適中，但邊位就未算燒至太脆，不過肉質夠軟腍搭救。 麻辣鳳爪係套餐嘅特色小食，麻辣惹味，微微辣好開胃。鳳爪無醃到淋晒，反而保持彈性，幾有咬口。 雞油香飯色香味俱全，飯呈淺黃色，飯粒軟硬均勻，粒粒分明，滲出啖啖雞油香。油飯裝到滿滿的，比起酒樓白飯還要大碗，男仔食都夠飽。 油菜，完整嘅一餐唔少得菜，生菜份量都幾多。個個客都有嗌，後尾直頭賣晒添。 細肉骨茶(+$10)，肉骨茶真材實料，藥材味偏重，有少少胡椒香，啲料就有豆卜同一字骨。 皇牌無味精靚湯係南瓜蘿蔔湯，南瓜打到蓉晒，甜香濃郁自然，仲有一嚿仔粟米。 最搞笑係個餐仲有兩粒迷你雪米糍，士多啤梨同抹茶紅豆味，誠意十足。 總括嚟講，栢檔係香港數一數二好食嘅海南雞🐔，而且水準穩定，每次都無令人失望。最後，油塘店嘅全部店員服務態度都好好，有禮貌，笑面迎人，抵讚。

阿爸生日，所以買個蛋糕同佢慶祝吓。之前喺IG見到網店「Kiuki Sweet Bakery」嘅蛋糕好似唔錯，加上有朋友親身試過話唔錯。 小店人氣好高，想買的話，一定要記得早三至五前預訂啊。佢個網頁幾清晰，之後店主就會Whatsapp你畀錢詳情。 我揀咗草莓百香果x水晶珠戚風Strawberry Passion Fruit，蛋糕有唔同呎吋揀，我要咗4 寸($450)，可供2-4人食用。蛋糕偏高身，造型非常可愛，帶點少女風，入面由外至內都有好多餡，層次分明。 草莓戚風蛋糕口感鬆化，所以食落好輕盈，中間流心嘅係鮮草莓果肉果醬，食落竟然一啲都唔酸。然後再食就係百香果乳酪忌廉，佢有熱情果嘅香，令人開胃。為咗加添口感，小店仲加入咗水晶珠，煙煙韌韌，幾正。 題外話，蛋糕可揀觀塘工廠大廈自取或者送貨，由於位置方便，所以我自己攞。小店提醒蛋糕要45分鐘內將蛋糕雪入雪櫃，並需要喺2日內食完，以保持最佳狀態。 總括嚟講，蛋糕味道同設計令人滿意，小店從起源入手，揀選優質嘅食材，例如日本著名品牌麵粉同埋零膽固醇嘅食油，既好食又注意健康。

去咗灣仔探朋友，我哋一行三人去食晚飯，地膽就帶我哋轉入巷仔搵食，仲要搭𨋢上一樓先至到「新嚐泰泰國餐廳」。 從地下門面行入去，我會以為好噏耷，點知上到去發現室內環境唔錯喎。牆身畫上壁畫，色彩鮮艷，整體環境嘅光猛、闊落。 餐牌設計簡潔，一眼睇晒，餐廳所提供嘅菜式選擇繁多，價錢屬正常水平，但原來份量超多。見到實物之後，我直頭改口話係抵食！ 黃咖喱海鮮跟薄餅($108)，咖喱有幾款口味可選，我要咗嘅黃咖喱香而不辣，仲帶微微椰香，實屬老少咸宜之選。醬汁正之餘，跟配嘅薄餅更加係畫龍點睛，蘸汁食一流，而薄餅本身都好軟熟。海鮮包括爽彈鮮蝦、青口同魷魚等，另外仲有三色燈籠椒同薯仔。 曼谷海南雞($98/半隻)，半隻海南雞好足秤，海南雞既肥美又厚肉。除咗雞翼位置，其他部位經已去骨。雞胸位置白𠽌𠽌，肉質嫩滑，一啲都唔嚡。泰式口味主要係跟辣醬，辣辣哋幾惹味。 粉絲大頭蝦煲($208)，我哋無嗌主食嘅原因，係因為嗌咗粉絲煲。大頭蝦煲真材實料，面頭兩隻大蝦先聲奪人，蝦頭充滿蝦膏，蝦香十足，唯一美中不足就係肉質結實啲就好。粉絲墊底索盡大頭蝦精華，而且仲加咗各種食材同香料調味，例如花椒八角同肉桂等，一啲都唔馬虎。 串燒沙嗲($88/6串)，串燒有豬同雞可選，餐廳並容許雙併。估唔到串燒咁大串，每串有五至六嚿肉，並且充滿燒烤嘅香氣；而肉味亦比想像中濃郁。沙嗲汁幾香口，不過由於啲肉大大件，就顯得啲汁唔夠多，哈哈。 飲品方面，原本覺得成四十蚊都有啲貴，不過個杯其實大到好似個榨咁，Share飲都夠。泰式青檸檬茶($40)真係唔同港式檸茶，佢並非紅茶底，而係用上泰茶底，有浸獨特嘅香氣。糖水另上，可自行調節甜度。 椰汁冰($40)，呢個同樣大大杯，椰汁冰椰香突出，味道自然，口感幾順滑。 總括嚟講，唔係朋友介紹，真係唔知道灣仔有間咁高質嘅泰菜店。不過可能我大鄉里，雖則佢係樓上舖，但晚市都坐滿人。無他嘅，佢平靚正嘛。

棉登徑內有一間人氣頗高嘅燒肉店，我哋想幫襯好耐，呢日終於搵啱機會。一到步，店員隨即熱情招待，並簡單介紹菜式。餐廳環境都唔錯，有一大幅牆畫。 餐廳菜式選擇繁多，無論肉類定料理都有好多選擇，而呢兩方面嘅出品都有質素。題外話，餐枱夠大張，食得暢快舒服，佢個爐火侯亦OK，係爐面細啲。 老饕澳洲M5/M6和牛牛板腱($198)，雖然成二百蚊先得五塊，不過大大片之餘，而且堅係和牛。佢並非好重雪花、入口即溶嗰種，但反而肉味更濃郁。 香蔥薄切牛舌($82)，薄切牛舌一客有七片，肉質彈牙，但唔韌，本身輕輕用咗胡椒吊味，如果想再香口啲，可以加香蔥。 全天然豚肉五花腩($130)，豚肉不比牛肉遜色，厚切豬腩色澤鮮嫩，燒完之後，充滿油香，但未覺油膩。五花腩配埋生菜食，好搭調。 揚櫻花蝦豆腐($68)，前菜我哋要咗炸豆腐，豆腐四四方方，好大件，外層經薄炸，而且蘸滿木魚同櫻花蝦，好惹味呢。旁邊嘅泡菜同中華沙律則係贈送嘅前菜。 蘋果木煙燻松露和牛他他($158)，和牛他他用個樽仔裝住，皆因餐廳用蘋果木煙燻，再交俾客人將啲煙䆁放出嚟。店員建議撈匀晒生蛋、筍絲同黑松露醬一齊食，他他肉質軟腍，一啲都唔腥。 櫻花蝦餃子($68)，餃子一客有四隻，上面佈滿櫻花蝦，而入面就包裹多汁肉餡，唯一挑剔嘅地方就係餃皮偏厚。 松露肉碎炒飯($108)，朋友係澱粉質怪人，所以嗌多咗個飯，我其實食完上面啲嘢都已經飽咗七成。炒飯用石鍋上，有啲似韓式嗰種。炒飯帶有黑松露香，而肉碎就可揀牛肉或雞肉。呢度每枱都有自助啤酒機，但唔飲啤酒都有其他選擇，我哋就要咗富士高砂梅酒($68)，甜甜的，Cheers。 總括嚟講，餐廳嘅食物質素有水準，而其他各方面亦令人滿意。我睇餐牌見到介紹寫，原來牛魔係由香港人自己打造嘅燒肉品牌🐮，佢哋果然做得到、做得好，無令人失望。

我同男朋友不嬲都鍾意正日前後先慶祝情人節，因為愛大家嘅每日都係情人節，唔需要正日出去食咁多人。我哋揀咗位於K11 Musea嘅「Velo Italian Bar & Grill」。 我哋預先喺網上訂座，一去到店員好快就有我哋資料同安排入座，整體服務態度幾好。餐廳面積幾大，環境都唔錯，雖然冇海景，但都感覺開揚。 店員先為我哋送上麵包籃，食住包包再睇餐牌。餐牌中英對照，圖文並茂。我哋詢問店員菜式資料，佢哋都能一一回答同埋提供建議，抵讚。 冷吞拿魚醬汁伴小牛肉片Vitello Tonnato($248)，呢款前菜好正，惹味開胃得嚟又唔重口味。喺其他地方食呢道菜，好多時都會見到好多醬汁鋪面，呢碟相反，但當食小牛肉嘅時候，你就會發現其實佢係蘸滿汁，呑拿魚蓉味道突出。 香煎鵝肝配焗蘋果Foie Gras($178)，鵝肝邪惡到爆，煎到外脆內軟不特止，入面直頭係流心。好彩佢配咗多士同埋焗蘋果一齊食，所以整體感覺唔會太漏。 霜降牛扒Wagyu Beef Sirlion Steak($648/300g)，一向係牛魔王嘅我哋見慶祝情人節，就食得靚啲。店員介紹牛扒係已經熟成，肉味特別濃郁，而三成熟就係最佳溫度。佢果然冇介紹錯，加上廚師火候控制得宜。牛扒肉芯呈嫩紅色，食落多汁，牛味一流，簡單點鹽食已經無得輸。牛扒本身原來配咗菠菜同新薯，300g嘅份量令我哋兩口子非常滿足。 意式青瓜地中海紅蝦自家製扁意粉Red Prawn Linguine($298)，紅蝦意粉一上枱嘅時候，蝦香撲鼻，調味比較強，自家製嘅扁意粉質感富嚼勁，軟硬粗幼適中，佢中間仲加入咗意式青瓜，以添口感。 芝士乾果拼盤Piatto di Formaggi($148)，Tiramisu賣晒，所以唯有轉其他款，我成日見芝士拼盤係甜品項目，但從未食過，因為覺得怪怪的。芝士拼盤出到嚟嘅感覺似前菜多啲，總共有四款芝士，不過配上蜜糖食又係另一番滋味，另外仲有提子同杮。 奥利奥曲奇蛋糕配意式香草雪糕 Torta di Biscotti con Gelato($88)，呢個係我喺甜品櫃見到好吸引嘅款式，蛋糕好厚身，有好多層Layer。Orea曲奇忌廉同海綿蛋糕配合，令到佢冇一般芝士蛋糕咁Heavy。 總括來講，呢個情人節晚餐唔錯，食物質素有水準，如果要挑剔就係甜品部份相對冇咁出色。餐廳定價雖然唔平，不過我認為係對得住個價錢。題外話，餐廳有做晚餐Buffet。

情人節前夕，我都要加班到夜，所以男朋友就接咗我去公司附近食晚餐，慳緊啲時間。估唔到佢做足功課，知我鍾意食西班牙菜，就揀咗位於啟岸一樓嘅「Still」。 我多數喺樓下食街買嘢食，甚至乎無上過樓上。餐廳裝修具特色，放咗植物以添清新感，但佢同時又係酒吧格局，成件事幾得意。 餐廳設有5-Course Dinner Set($498)，但其實兩個人嚟食，唔使一人一份5-course，店員建議加一份主菜就OK。我哋要咗黑毛安格斯西冷配甜椒沙律($368)，菜式擺盤好靚，色彩繽紛，而牛扒肉芯就呈嫩粉紅色。牛扒本身靚，再加上處理得好，肉香濃厚，肥瘦適中。三色甜椒沙律切絲，煮到淋晒，好香甜、無草青味，色香味俱全。 套餐方面，第一道菜Starter唔使揀，就係黑毛豬火腿及辣肉腸火腿，每款各有20克。火腿質素唔錯，特別係辣肉腸，帶煙燻鹹香。佢哋配以橄欖粒同自家製酸種麵包食，好搭調。 第二道菜係Toast，我要咗生牛肉他他多士，原本有啲驚生牛肉會腥，不過佢混入咗青蘋果/青瓜粒，多咗一份甜香同添加爽脆口感。墊底嘅多士同前菜唔同，質感鬆軟好多。 第三道菜係Tapas，香煎慢煮八爪魚，八爪魚腳幾大條，肉質比想像中軟腍，一啲都唔硬。八爪魚除咗煎香，調味上亦心思十足，其中泡菜蛋黃醬最特別，鹹鹹辣辣，似曾相識嘅味道。 第四道菜係主菜Main，我哋揀咗招牌西斑牙海鮮炒飯。雖然個碟就唔巨型，不過份量都唔少，兼且相當足料，海鮮有三文魚籽、鮮蝦、魷魚同埋左口魚邊等。炒飯惹味得嚟，唔會太重口味，但同時又能吸收海鮮精華。 第五道菜係甜品Dessert，我哋加$25要咗特濃朱古力心太軟配柚子雪葩。心太軟切開後，軟心朱古力一湧而出，蛋糕層有些少海綿感，朱古力味香濃，但又唔會太甜。柚子雪葩好大球，好似飲緊柚子蜜咁，但我覺得同朱古力唔算好夾。 我加$78要咗西班牙果酒Sangria，佢係西班牙菜唔可以或缺嘅一部份。紅酒底感覺最原始，入面加咗唔少水果，開頭覺得酒味幾重，但飲飲下習慣咗，就直頭唔覺得係酒。題外話，伴旁嘅係餐前小食，有螺肉同芥末八爪魚。 總括嚟講，估唔到啟岸竟然隱藏咗一間高質Fusion西餐廳，每道菜都感受到廚師用心烹調，而且食材配搭亦講究。我認為餐廳定價較進取，不過食物質素都對得住個價錢嘅。

中午約咗舊同事食午餐，我哋幫襯咗旺角嘅「雙魚座咖啡館」，因為之前經過覺得店舖裝修好靚，係旺角鬧市中嘅綠洲。 餐廳環境唔錯，裡裡外外都帶畀人小清新嘅感覺，而且我哋有幸坐喺窗口位，陽光照入嚟份外舒服。我哋嗌咗兩份午餐同一個小食，望落去已經覺得好繽紛，食完飽晒，未有機會食埋甜品。 牛油果醬煙鴨胸粟米Pizza($88)，薄餅堅薄，餅底好似餅乾咁脆，所以食落唔飽滯。Pizza足8吋、可以分成6塊，餡料豐富，墊底有牛油果醬，而上面就有粟米粒同鴨胸。 烤大啡菇野菌意大利飯($88)，意大利飯充滿醬汁，每粒都沾上濃郁嘅忌廉同芝士，中間仲加入咗唔少雜菌粒。除始之外，Risotto仲附有切咗片嘅烤大啡菇，菇香撲鼻。 咸蛋黃單骨雞翼($38)，我哋加配咗小食，一客雞翼有四件單骨。雞翼外層被金莎鹹蛋黃醬所包圍，食落好惹味兼邪惡呢。即使係單骨，但其實都好大隻呢。 飲品方面，我要咗熱伯爵紅茶，熱茶無糖，簡單好飲、助消化。朋友要咗熱鮮奶咖啡(+$25)，Latte嘅拉花好靚，飲落口感順滑，而且又唔會太苦。 總括嚟講，餐廳各方面都唔錯，食物出品有水準，服務態度亦親切。雖然我唔好咖啡，不過我諗小店喺依部份幾專業，餐牌上列出超多款唔同來源地嘅咖啡，咖啡愛好者可以到訪試試啊。

之前喺Freshlane食過西餐，今次就輪到中菜，店舖名叫「女鍋」，佢主打住家菜，即係家的味道。 佢所提供嘅菜式幾特別，唔係四周圍都食到，而且以小菜為主，並唔係客飯，即係適合加餸，等阿媽煮少樣。 滋味沙嗲牛腩邊($68)，牛腩煲超正，大大盒，無論汁定肉都勁多。沙爹味香而不辣，但並唔係東南亞沙嗲串燒嗰種。牛腩邊似鮮牛肉片，不過肉質就係一絲絲，出奇地幾嫩滑。 香煎蓮藕釀蝦米鯪魚肉餅($48)，呢個係真蓮藕餅，面頭有一片完整蓮藕，造型逼真。鯪魚肉餅唔腥，落咗蝦米增添香氣，而且仲有粒粒爽脆蓮藕。 香脆金沙軟殼蟹($78)，軟殼蟹好巨型，外層經油炸，並蘸上鹹蛋黃金沙醬，幾惹味。不過我就略嫌炸皮唔夠脆，偏硬少少。 黃金鮮蝦腐皮卷($28)，腐皮卷有兩條，腐皮炸得酥炸，配上喼汁食，好搭調。腐皮包裹蝦蓉，雖然無原隻咁爽彈，但蝦香更勝一籌。 總括嚟講，高手在民間，佢嘅菜式別具特色，沙嗲牛腩煲同鯪魚肉餅絕對值得一試。佢另外仲設有套餐同盆菜，有機會可以幫襯下！

而家好多地方都開咗Freshlane，雲集咗唔同高手在內，呢日去開旺角又開App睇吓，就見到有間叫「CHEF'š LABS」。 菜式選擇都幾多，而且亦有做到會服務。食物即叫即整，熱辣辣送上，份量都幾多，但當然價錢就唔算好平。 松露野菌忌廉汁扁意大利麵($78)，扁意粉麵條彈牙，松露野菌忌廉汁惹味得嚟，一啲都唔覺漏，佢另外仲加咗大量雜菇同洋蔥，即使無肉都唔覺單調。 普羅旺斯式蜆意大利飯($88)，意大利飯口感正宗，即係有少少似生米，而唔係單用汁煮到濕晒。蜆選用大蜆，蜆肉鮮甜肥美，其他配料仲包括多種雜菜粒。 菠蘿乾咖哩燒雞墨西哥烤餅($58)，墨西哥烤餅一客有六件，烤餅皮軟熟，餡料層則唔算厚。菠蘿乾味道蓋過咖哩味，所以整體偏甜，有啲似鳳梨酥咁，我個人希望咖哩味重啲。 脆蟹肉薯丸($68)，炸脆薯丸外層脆卜卜，咬開真係見到一絲絲蟹肉，算真材實料，反而薯蓉就唔係塞到滿。如果唔想乾身，可以沾醬食啊。 總括嚟講，外賣都食到精美西餐🍽，食物質素同賣相都唔會差過餐廳。不過扒類同海鮮嗰啲，我就感覺始終偏貴呢，或許一大班人食就化算啲。

我久仰「Little Bao小包包」大名好耐，呢日去開銅鑼灣就決定試試。平日夜晚七點幾鐘都已經好爆場，人氣好高！另外環境同服務方面都唔錯。 黑松露薯條Truffle Fries($98)，🍟炸薯條並唔係普通油炸咁簡單，而係伴上魯「肉」醬同黑松露沙律醬。魯肉其實係指魯香菇🍄，食落雙重菇香。鋪面仲有黃色一條條嘅醃日本大根，驟眼睇以為係菊花作點綴。薯條偏幼身，似麥記嗰種，薯肉比較薄。 墨西哥炸雲吞Shrimp Tacos($98)，🥟炸蝦雲吞一客有四件，雲呑餡真材實料，有原隻爽彈鮮蝦🦐。由於餃皮厚身，所以炸起上嚟同酒樓點心嘅春卷皮有啲唔同，反而似墨西哥脆皮Tacos。炸物以甜甜酸酸嘅菠蘿莎莎同牛油果醬調味，既新穎又搭調。 招牌豬腩包Pork Belly Bao($98)，餐廳嘅小包包(Bao)唔係一般漢堡包🍔，因為麵包用上饅頭包，質感非常鬆軟，而且甜甜哋，更能突顯醬汁同餡嘅味道。🐷豬腩係招牌口味，入面夾住四大件慢煮豬腩肉，肉質軟腍，滷得入味，配上pm海鮮茄汁，進一步提升滋味。其他食材仲包括酸瓜、大蔥紫蘇葉沙律同芝麻醬等，成個組合好正，連平日唔食大蔥嘅我都破例食埋😋。同時，我覺得呢道菜有啲似台灣小食刈包。 天婦羅軟殼蟹包Soft Shell Crab Tempura Bao($138)，軟殼蟹包係期間限定款式✨，呢個包包比起另一款巨型，而入面隻軟殼蟹就比個包還要大🦀，麵包完全遮蓋唔住。軟殼蟹以天婦羅方式脆炸，炸漿層薄薄的，蟹肉肥美飽滿，仲滲出微微酒香。大包仲夾住一堆蟹籽蘿蔔沙律，蟹籽爆漿脆卜卜，醃蘿蔔都脆，但由於易出水，所以食到尾段個包濕濕哋，稍為影響口感。 餐廳嘅甜品同樣係包包🍨，我哋要咗兩款口味，分別係鹽味雪糕包Salted Ice Cream Bao($48)同埋榛子意式雪糕包Hazelnut Gelato Ice Cream Bao($78)，後者係期間限定款式。雪糕包的骰可愛，麵包炸至金黃色，沾上少量砂糖，感覺有啲似四川小食炸饅頭。鹽味雪糕同焦糖醬互相配合，相映成趣。🌰榛子口味即係好似食緊Nutella咁，再加埋朱古力碎，甜甜的。如果兩者比較，我鍾意海鹽焦糖多啲。 飲品方面，靚靚粉紅色嘅係🌸Cocktail: Sakura Breeze($88)，佢由伏特加、櫻花、檸檬同薄荷葉所溝成，櫻花味道自然，唔會太甜，而且酒精濃度唔高，易入口。另一杯係🍊Mocktail: Yuzu Maple Soda($58)，第一啖飲完全係衝突味蕾，味道富層次，百般滋味在口中。柚子味最為突出，並同時滲出楓糖香，最後仲有紫蘇葉同海鹽嘅回甘味道，海鹽唔係得鹹，而係帶點煙燻味。 總括嚟講，小包包唔係浪得虛名，原本以為只係打卡噱頭嘢，點知味道都唔錯，又有特色，係好出色嘅Fusion菜，推介一試！