唔知幾時開始呢度嘅餃子變咗土瓜灣名物😌 不過都真係有好多街坊去買，有啲仲會買生餃返屋企自己煮。 ➼ 湯餃（雙拼）8隻 除咗湯餃，仲可以揀煎餃同蒸餃，我通常都揀湯餃因為最穩陣😌 湯底屬於比較淡味嘅胡椒湯，唔會搶咗啲餃子嘅「風頭」；餃子嘅Size就同佢哋舖頭名一樣係珍寶，有我半隻手掌咁大。 今次我食咗椰菜雲耳豬肉餃同粟米豬肉餃。先講椰菜雲耳豬肉，椰菜同雲耳都好爽口，不過可能我一嚟就食咗粟米豬肉先，所以食返椰菜雲耳就覺得有啲啖味。我個人鍾意粟米豬肉多啲，粟米好甜！同豬肉嘅比例剛剛好，唔會有肥膩感👍🏻 30幾蚊嚟講食得飽肚之餘質素又唔差，性價比好高👍🏻 但唔洗特登去食咁誇張😂 咁啱行過呢頭去試下就無妨啦～

雖然舖頭名叫車仔麵，但係佢哋唔係淨係得車仔麵食㗎～仲有好多好抵食嘅客飯Set💗 ➼ 口水雞飯 ✅ 口水雞舊舊都啖啖肉！仲有蒜泥喺面，鍾意重口味嘅話一定會覺得好食👍🏻 不過可以再辣啲啲🤏🏻食到底啲油有啲多，要搵啲白飯印一印😂 ➼ 麻辣香鍋飯（雙拼）✅ 麻辣香鍋可以揀單拼或雙拼，豬牛雞都有～幾十蚊一個飯Set嚟講佢哋好足料！除咗見到有辣椒，仲見到有花椒粒，食落真係有麻辣Feel唔係得個名👍🏻 就連啲配料蓮藕片都好脆口好好食！勁好送飯💗

➼ All Day Breakfast（連飲品） 就咁睇其實都幾豐富，乜都有咁～不過好可惜嘅係全部嘢都好普通🤣其實唔係唔好食，絕對可以食得晒成份仲要好飽🤣只係性價比真係非常低，加埋一要$174就太貴了🥲雖然All Day Breakfast不嬲都唔係Sell抵食，但其他差唔多質素嘅都冇咁貴☹️ ➺ 小分享： 我留意到佢Lunch Set啲嘢食價錢都係偏貴，可能Tea Time會抵食啲，但好在環境都算OK，可以坐得舒服～不過用呢個價錢食其他嘢會開心啲🤣

➼ 喇沙雞湯米線（跟農米雞件） 未開始食就咁望啲雞件都已經覺得應該會好滑！點知食落真係好滑！連啲皮都好薄☺️果然係主打！而且份量都唔少，四十幾蚊嚟講好抵食！ 至於湯底方面就比較一般🥺有時會好怕湯底會有一層紅油喺上面，好彩呢度都冇，而且冇好重嘅味精味👍🏻不過就略嫌唔夠濃味同比較稀，可能比較適合食得淡味嘅朋友～

話說有日嚟到油塘站，咁啱又好肚餓但同時又好趕時間😂問咗朋友先知原來呢度有Snack express就拿拿臨上去買啲嘢食填返個肚先啦。 呢度咩都有，仲要全部都好抵！燒賣都只係$10就有8粒咁多，真心抵過岀面好多！本身見咁抵都唔會對佢有啲咩太大嘅Expectation，真係諗住填飽左個肚就算，點知出乎意料地覺得好好食！除咗仲好熱辣辣之外，落埋豉油同辣椒醬之後更加香，燒賣嘅口感仲好煙韌！一啲粉感都冇！絕對對得起佢個價錢！

➼ 黑松露卡邦尼扁意粉 平時如果係嗌黑松露乜乜乜，一上枱嗰下其實都已經聞到好香，但可惜呢個一啲香味都冇，呢方面真係遜色咗啲🥲 不過如果以一個卡邦尼意粉嚟講，呢個係好食嘅，個汁好Creamy，個扁意粉都好掛到啲汁，每一啖都食得到滿滿嘅忌廉汁👍🏻 ➼ 蘑菇湯｜跟餐 Lunch Set可以加$10有餐湯，可以揀蘑菇湯或南瓜湯，今次我就揀咗蘑菇湯。一路飲個湯會食到一粒粒蘑菇碎，口感層次好豐富，不過唔知係咪面頭啲忌廉溝淡咗個湯，個蘑菇味唔係架突出。 ➺ 小分享： Lunch Set有跟嘢飲，而嗌普通嘢飲係唔洗加錢的。我嗌咗個凍檸茶，真係好大杯！我飲咗一半都覺得太飽頂唔順飲唔到落去🤣

雖然佢睇落細細碗，但食落其實都幾多下，起碼我食完成碗麵加個小食係好飽先🤣 有時會無啦啦想食薯粉，而佢哋嘅薯粉幾滑溜👍🏻至於餸方面就冇乜邊樣比較Impressive，反而小食都唔錯，尤其係個墨魚餅，新鮮整起熱辣辣幾好食，不過有啲貴，$28先得6粒，好快就食完了🤣

我諗冇人唔識齊柏林熱狗㗎啦🤣期待有日佢開到周圍都係～佢喺土瓜灣開咗咁耐我都係第一次過去買嚟食🤣 ➼ 芝味熱狗 芝士非常澎湃！佈滿成隻熱狗😍 趁熱食嘅話，一路食啲芝士仲會一路跌出嚟🤣 除咗芝士，其實仲有粟米同蛋黃醬，有時簡單嘅配料就係最好嘅配搭❤️ 條腸都好爽脆，食完成個熱狗真係好飽，下午茶都慳返唔洗食🤣 $40都唔洗，其實真係好抵食！ ➺ 小分享： 土瓜灣間齊柏林嘅隔離有茶星人，識食嘅一定會一次過買埋㗎～💛

有陣時唔知食咩又想食清淡啲就會想食水餃，通常我都係嗌招牌水餃或者粟米豬肉水餃，呢兩款都係我覺得比較穩陣嘅選擇。有陣時我都會嗌埋台灣麵線，連鎖店嘅質素都唔會expect佢會係好好食，不過勝在夠飽肚～

以雙拼麵來講，30幾蚊其實都真係幾抵食，今次我揀咗鮮牛肉同雲吞，分量方面都唔算好多，始終都只不過係幾十蚊貨仔，都冇expect得太多。我2點幾3點食，食完之後其實都算飽，啱啱好頂到7點幾8點食夜晚嗰餐～