放工鄰居突然約食飯，鄰居自私食已經試咗幾次呢間餐廳，今次終於我都有機會試吓啦。最想試佢個炒飯底，但係又好耐冇食焗飯，咁詢問店員之後原來所有焗飯都係炒飯底咁鄰居就嗌咗焗豬扒飯我就嗌咗葡汁焗雞扒飯另外就叫咗個珍珠奶茶走甜，個珍珠奶茶幾鍾意佢個茶底都夠濃。到多人嗌炒飯，又有外賣單，但都需要啲耐性。跟住我個焗飯終於到啦，食咗一啖個汁酸酸地，跟住再試多陣連啲肉都係有啲酸味喎。即刻問侍應你個汁係用咩整，係咪落咗檸檬汁。跟住佢就叫咗疑似係上級嚟，咁就再同上級講。上級就拎咗個飯入去，有禮貌地講唔好意思再重新做過一個俾我。再等咗一個長時間，出嚟啲味完全正常番，多咗啲彩椒，不過啲汁係鹹咗少少，可能另外煮個一份新㗎汁。其實可以再試嘅，個炒飯真係粒粒分明。唧左少少豬油試都幾香。不過可能係冇咁繁忙嘅時段嚟試會比較穩陣。 中明呢餐係自費的，並無享用優惠。

之前同屋企人食過午餐，已經覺得唔錯。今次專登帶啲鄰居嚟試吓。因為有鄰居鍾意食酸菜魚，今次就可以嗌晒兩樣嘢嚟試。先試咗個小食係啲腐皮包住啲蔬菜嘅卷，感覺都幾清新。跟住個蜜桃骨超驚嘆，啲蜜汁掛住啲骨同埋唔會炸完之後超乾，咬落去好有肉汁，食完呢個，真係想搵一晚出嚟再試去夜晚嘅小菜。反而就唔係好鍾意佢嗰個炸嘅卷，個皮比較厚個餡料就冇乜特別。酸菜魚就可能啲鄰居怕辣，跳晒啲辣椒出嚟，我就覺得可以再辣啲，不過啲魚肉堅揪滑。小籠包、鍋貼同埋樟茶鴨就唔多講啦，返頭再食水準依然冇變，表現幾穩定。 申明試次用餐自費，並無享受任何優惠。

同鄰居去完街，話呢間椰子雞好好食，專登喺金鐘搭返車過嚟食晚飯。四人同行，一人叫一個餐應該唔算過分，但係出完餐之後，成張卡位都唔夠擺，叫我哋再移移位，真係唔識點樣移，侍應話點解我哋叫咁多嘢，我一下O咗嘴。其實真係得個椰子雞湯好味，啲雞煮完之後係唔食得嘅。海南雞冇想像中咁滑，不過啲醬料好味。肉骨茶有神緒，但係藥材味唔重。反而杯咖啡幾好飲夠滑。個咖喱牛腩正常冇特別驚喜，嗰個薄餅就唔會太油食落去都幾鬆軟。個沙嗲冇炭燒嘅感覺。如果四個人嗌四個餐都係過分嘅話，咁希望佢啲碗碗碟碟就唔好咁大個，因為顯得份量少亦都阻左用餐嘅地方，真係揸住個碗仔揸住全晚，根本冇地方放低飯碗。同埋九點幾都未閂舖，已經落清潔劑拖到個地下勁濕，走嘅時候喺出門口嗰段路失左重心差啲朝天撻，感覺唔安全。

次次出觀塘都係食羊肉，今次食完羊肉之後唔夠飽，咁就行過幾條街食碗牛再祭一祭個五臟廟。第一次試就相當貪心，叫咗佢個牛什河粉。呢度個牛什河粉有少少特別，係有牛腩牛肚牛尾同牛筋，牛腩牛肚份量好足，牛尾就得兩粒細細粒，牛筋直頭縮到得手指尾一折嘅size得一粒。個湯頭幾清好似有草果嘅味道。另外裏便有一舊白蘿蔔冇渣又清甜。個河粉都好滑係幼身河粉。飲晒成個湯俾條脷歇左一陣，都唔覺得口渴。下午茶時段跟餐有一杯嘢飲，叫咗西柚茉莉花茶。啲西柚有果肉又幾好少少酸酸甜甜食完都唔會覺得好飽。強烈建議清湯唔好加辣椒油，唔係就破壞咗個牛骨湯底啦。

上網見到佢有包廂幾特別，就帶埋朋友隻狗狗嚟食晏。本身book咗早啲，但係有啲事趕唔切嚟，打電話去改時間，個職員都好有耐性再安排晏少少俾我哋。同埋以為佢下午茶時段剩係得粉麵，點知原來都可以照叫午餐同埋餐牌上面所有嘢，咁就安心可以改晏少少。早咗半個鐘頭到，佢就叫我哋喺私家車裏便等住先收拾好枱之後嘅話就call我哋入去，呢度唔使客人喺室外等，又要再讚一讚個職員。另外侍應服務好，同埋對啲寵物都友善。 另外食嘢方面，大部份都幾出色，個蝦油炒飯幾香都炒得好乾身。個肉碎銀針粉，肉碎幾夠火候，但係就肉碎偏少。泰式生蝦新鮮爽口，個汁加埋個片辣椒超搶喉，食得辣嘅朋友值得推薦。龍眼冰都好好飲唔會太甜又多龍眼肉，簡直係解辣首選。不過午餐加配嘅小食兩隻雞翼就略嫌韓血酸少少，佢係整單支雞翼為兩隻，蝦餅就係得一件。反而另外叫嘅沙嗲串燒同埋個牛脷，有炭燒風味。牛脷亦都好淋滑，性價比反而高好多。 整體嚟講用餐時間90分鐘係足夠嘅，包廂大，又有冷氣坐六七個人都冇問題。整體食物味道都水準，短期內再食嘅機會都幾大。

基本上天氣一轉涼，或者落完雨涼少少就有情意結嚟呢度食碗羊肉米線。今日落完雨又係涼涼地有觸動到我呢個食羊肉嘅念頭。每次嚟都係食大碗藥，早幾次嚟嘅時候見佢個羊雜米線都想試，今次就轉下口味。先問咗佢楊集裏邊有冇羊肉，侍應話冇，所以另外加咗$30加咗一份羊肉，因為之前見隔籬枱嘅人，嗌羊肉米線嘅時候都會會加羊肉。因為試新嘢都係唔好嗌咁大碗今次嗌咗細碗嘅。一見到玩嘢，就出事啦，原來啲羊雜係切絲。主要係有羊肺同羊肚，另外食到兩條羊腎嘅感覺嘅絲狀物體。食落去嘅口感唔多好索索聲。好彩加咗份羊肉打底，下次都係乖乖地食返羊肉大碗米線穩陣。

同同事行山之前，喺黃大仙附近搵地方食晏。就走咗過嚟呢邊，睇吓有啲咩快靚正嘅嘢可以食完即刻起行。快靚正嘅話莫過於茶餐廳。入到嚟嘅時候睇見個餐牌，本來係食牛腩粉，但係佢餐牌實在太多選擇花多眼亂，最後揀咗類似特餐嘅嘢。同事就健康少少叫咗個薑絲牛肉。我就叫咗個煎雞扒通粉，配薯條雞翼個雞扒煎得幾脆，但係冇底味。個雞翼都係，但係個外皮炸得脆脆實在太邪惡。好少茶餐廳仲有沙律，因為好怕佢會生水又唔襟擺。最正嘅係佢有波浪形嘅薯條，就好似細個食茶記嘅時候嘅雞髀薯條咁，另外見佢塊多士看得咁脆，就忍唔住加咗少少砂糖上去食真係邪惡到嘔，食飽飽之後就上山還債！下次先嚟試番佢個牛腩粉。

去完新田食晏，再落流浮山，成日落陣雨，基本上帶住寵物唔想出街食晚餐，咁就喺返屋企嘅途中諗住喺新墟睇吓有咩外賣買返屋企食，跟住見到呢間門面幾特別就買呢間。本來想試佢餐牌上面個蔥油撈麵，但係佢話而家冇做。因為實在太大雨，連個花膠雞湯都唔記得嗌，有機會下次要試返。 整體食物嚟講，餃子係出色嘅，嗌咗個炸餃係韭菜餡，返到去個皮仲係脆，同埋咬落去爆餡多汁又夠皮薄。另外湯餃跟豬扒酸辣米線個湯餃係芹菜鮮肉，都好好味。但係個豬扒就薄咗啲同鞋厚啲。藕餅就過火咗少少，墨魚丸就正常。下次後天有路過屯門新墟，要試吓堂食會唔會再好食啲。

平日放早同屋企人飲下午茶，之前屋苑收到宣傳單張有呢個商場有新食店，咁就過嚟試吓呢間酒樓。嚟到嘅時候睇張餐字原來係富豪酒店集團嘅。跟住見佢有點心任食平日下午茶每位$98 ，計落三個人同散叫差唔多咁就食任食。任食嘅好處就係一次過試好多嘢，下次就可以專注散叫一啲好食嘅。整體嚟講炒嘢係好過蒸嘅點心嘅。餐前小吃就試咗胡椒豬肚湯，略嫌胡椒味唔夠重，但係份量都足嘅。青瓜海蜇都唔弱，係正常份量。個南乳雞翼就唔太鍾意佢咁厚粉但係味道都可接受，唔會太鹹。蒸嘢嚟講比較失望係個牛肉，個肉質比較削啲，但係鯪魚球同埋蝦餃都唔錯。鯪魚球冇腥味，仲有少少蝦米碎。蝦餃都好爽口。炸嘢方面，最出色係個沙律明蝦角，但係佢冇沙律醬俾我哋用泰式甜酸醬，不過個蝦角真係爆蝦肉脆卜卜熱辣辣好好食個脆奶都處理得唔錯，麵包位唔會吸太多油有溢味。炒粉麵以為佢位上所以嗌咗三款，點知嚟到嘅時候佢疊上我寫一位佢都炒咗碟出嚟實在太誇張，不過三碟炒嘢都好食，配料都夠多，唔會放題就hea。珍珠雞嘅話都唔會好似出邊啲大酒樓剩係得d醬俾你，都叫做有資料影吓相。反而甜品值得要改善一下芝麻卷同紅棗無咩甜味。桂花糕啲黃色液體染到成隻碟都係呢個可以skip。反而個蛋散做得幾好夠鬆化。同埋可以即時入會，有九折優惠。

天氣開始轉熱，行行吓金魚街突然間肚仔餓。醒起鄰居熱烈推介呢一間台式餐廳。咁又好耐冇飲過珍珠奶茶，咁就入去試吓啦。下午茶同午餐對比份量差一段，咁又未食晏，咁就放棄咗下午茶。嗌咗個紅燒牛肉麵加咗一份小食鹽酥雞，因為侍應話呢個份量比起下午茶係會多啲嘅。先嚟咗杯珍珠奶茶走甜，一食落去啲珍珠就感覺到佢唔係黑糖珍珠，純粹過吓癮咬下珍珠就唔太在意。跟住個紅燒牛肉麵嚟啦，先飲一啖湯，點解個湯底有啲微酸嘅？ sorry我平時多數食台式嘢都係食滷肉飯真係好少食紅燒湯底，但冇特別去換。啲牛肉條無味。反而個鹽酥雞幾好食，個粉漿夠薄，即炸果然係唔同啲。