餐廳環境雖然唔係好大，但座位唔會迫迫陜陜，坐得舒服，又有私隱度，傾密計都唔驚呀。 餐牌圖文並茂，好多野都好似好美味喎。 青檸蝶豆花茶和奶綠茶 蝶豆花的芳香和青檸的酸爽，兩者平衡得很好。青檸的酸爽帶來一種清新的口感，同時也能夠提升蝶豆花的香氣，而且賣相唔錯，打咭一流。 泰綠茶第一口入口，濃烈的茶香迅速籠罩著口腔，帶來一種清爽的感覺。口感較為濃郁，但同時也帶有微微的甘甜，泰茶果然唔同啲。 泰式乾炒河粉 泰式河粉比較散，口感比較黏，但唔會痴住個口。雞肉厚身，無雪味。表面灑了大量脆脆，口感即時提升。值得一提嘅係，河粉本身已經夠味，但老闆娘話可以加點醋，味道果然更突出。 泰式素春卷 外皮脆脆，唔係油淋淋，裏面包住唔同嘅素菜，多層次口感。點上泰式梅醬，更加出色。唔講唔知，原來點梅醬先係正宗，平時嘅酸甜醬立即被比下去了。 泰式蠔仔煎蛋 鐵板一上枱，好香呀。份量大大份，金黃色嘅雞蛋，鋪滿了鮮嫰蠔仔，雞蛋頗香，蠔仔飽滿，仲有清爽芽菜係入面，口感豐富。 唔同嘅醬料真係可以大大提升泰國菜嘅味道，唔怪之咁多人喜歡泰國菜啦。

餐廳位於旺角女人街，旺中帶靜。 餐廳一半都是卡座，座位闊落，坐得舒適。 晚市來到，可選擇雞煲任食或者小菜。一眼看過去，很多人點了雞煲，好似好吸引，但今晚比較想食鑊氣小菜，雞煲還是留待下次啦。 先送我地2碗冬瓜例湯。 啫啫生蠔雞煲 一上枱，不但熱辣辣出緊煙，仲有唔少氣泡滾出來，真係新鮮滾熱辣。雞肉係一口size,入口啱啱好。生蠔脹卜卜，夠飽滿。醬汁有葱有蒜，惹味之餘，仲令生蠔唔會有腥味。 啫啫蝦醬通菜 蝦醬味頗香，啫啫聲，夠鑊氣，味覺同嗅覺都打通了。通菜脆嫰，除左蝦醬，仲有少許辣椒調味，相當唔錯。 肝腰合炒 合炒了豬肝豬腰同露荀。醬汁特別惹味，辣椒，蒜片同薑爆香，辣得黎更開胃。豬肝薄切，唔嚡口。腰花脆嫰唔會臊。仲有爽脆露荀和雲耳，增加口感，整個餸都好出色。 大杯檸檬茶 係珍寶size,好大杯呀，見到已經覺得超值了。 煲仔餸惹味開胃，送飯一流。

望住餐牌，諗完一輪，都決定唔到食咩，於是揀左2人餐，唔使煩呀嘛。 京都二人前 前菜 茄子和麻辣牛舌，正常發揮 蟹籽沙律 爽甜 刺身 新鮮，無雪味。三文魚肉厚，帶子鮮甜 安格斯西冷牛扒 牛味唔特別濃郁，無筋，有油香，味道ok. 鹽燒三文魚腩 魚鮫售罄了，所以揀左魚腩。可惜油脂太多，比較油膩，魚質算滑 什錦海鮮味噌湯 味道唔算鹹，有夠鮮味。材料有蟹柳，蜆肉，沒有偷工減料，好喝。 另加了燒明太子 食落非常鹹，就算連青瓜一齊食，都仲係好鹹。 意見反映左俾廚師，應該下次會有改進。

一出lift就見到啤啤bear迎接我地，就知我地無去錯地方啦。 餐廳環境算大，裝飾好有趣，有閃光牌，仲有籃球架，遊戲機，雖然有得睇，無得玩，但望住呢個環境，伴著輕快音樂，心情都chill啲。 蟹籽海鮮蛋卷 大量蟹籽鋪在蛋卷表面，毫不吝嗇。一切開蛋卷，蛋汁除除流出，裏面包住多款海鮮，不是急涷海鮮雜薈，而係彈牙魷魚，蝦肉，蜆肉等，有誠意。 脆炸魷魚圈 炸得乾身，唔會油淋淋。 蕃茄韓式辣海鮮湯配中華麵 滾起後先喝一口蕃茄海鮮辣湯，蕃茄味濃，鮮甜微辣，醒胃。海鮮配料好豐富，有小章魚，蝦，蜆，青口等。中華麵吸左辣湯，質感偏稔，都算唔錯。 大發！芝士鐵板泡菜炒五花肉 燒住鐵板，芝士泡菜味特別香，等多陣，芝士拉絲拌勻泡菜，更見惹味。五花肉層次分明，有口感，唔會得個肥字，配上芝士泡菜一齊食，好出色。 環境玩味十足，食物唔錯，下次可以再黎chill下。

餐廳環境整齊美觀，牆上還掛著有趣的圖畫。 午餐餐牌選擇很多，價錢唔貴，仲可以加錢配湯同飲品，另外仲有小食同蛋糕添。 是日餐湯跟沙律 擺碟整齊，煙肉薯仔湯加上麵包條，相當唔錯。 明太子海鮮天使麵 天使麵麵質軟稔，唔會太濕。雖然海鮮配料唔多，但唔係平時急涷海鮮雜薈咁求其，有好多蟹籽，大大條蟹柳，墨魚仔彈牙。 澳洲安格斯肉眼扒配薯蓉 肉眼扒頗大塊，揀左7成熟，中間帶有少紅，牛扒有咬口，帶有少少筋。配菜嘅薯蓉有多件瓜菜，有心思，我地纖維都多啲呀。 另加了小食，蜂蜜柚子脆雞翼 雞翼香脆，蜂蜜柚子味香甜，很開胃。 酥炸吉烈蠔 脆卜卜，熱辣辣，唔會得個腥字。 甜品有柚子手工芝士蛋糕。擺碟美美的，有心思。淡淡柚子味很清香，芝士味頗濃，質感夠實，係我喜歡嘅蛋糕質感，正。 環境唔錯，價錢唔貴，仲有精緻甜品，呢個午餐真係好滿足呀。

今日天陰陰，落住毛毛雨，令人提唔起勁，食甜品就啱哂啦。 餐廳位於大街嘅後面，雖然不太起眼，但夠清靜舒服。 餐牌有意粉主食，鹹甜窩夫等，都相當吸引。 Nutella朱古力窩夫 窩夫烤得香脆，淡淡嘅蛋黃香，配上nutella同caramel，好sweet呀!! 半份即焗蘋果批 金黃色嘅批底，加上一片片嘅蘋果，外表已經非常吸引了。一口咬下，批底非常酥脆，配上蘋果嘅柔軟，口感一流。批底嘅牛油味突出，加上酸酸甜甜嘅蘋果片，唔油膩之餘，仲有果香，真係食到停唔到口呀! 龍蝦湯 橙紅色龍蝦湯，香味十足。飲落順滑，如果加點蔬菜，定能增加湯嘅層次感 。 雪山與白雲（蝶豆花牛奶） 一杯好適合打咭嘅飲品。外觀好靚，一層紫藍色嘅蝶豆花，一層白色牛奶，真係好似雪山與白雲，好有詩意。 雖然天氣一般，但可以係恬靜嘅環境下，食到美味甜品，都算係賞心樂事呀。

位置係火車站一出，非常方便。 依家分店主打麻糬，款式都特別多，有麻糬QQ球，麻糬波波，麻糬曲奇......當然仲有曲奇，蛋糕等等啦。 我下午先到來，廚櫃嘅麻糬QQ球款式已經無左4-5款了。所以今日揀左開心果QQ，朱古力豆豆QQ, 紫薯蕃薯QQ同小紅莓QQ。整體嘅口感果然好煙韌，亦很軟熟。開心果QQ味道適中，有開心果碎口感不錯。朱古力豆豆QQ表面脆脆的，但唔會太甜。 仲試左個草莓牛角包，絕對因為樣子幾靚而試嘅，加上個介紹係“爆醬嘅草莓”。哈哈，個草莓醬唔算好爆，驚喜不大，屬正常。 整體價錢唔算親民，如果路過都可以試試。

之前見到有介紹呢間餐廳有開心果嘅飲品系列，所以今次特登出黎揾食。 黑松露牛肝菌汁燒刺身帶子扁意粉 黑松露味好香，帶子燒得啱啱好，調味較淡。意粉質感唔錯，但燒汁味道較淡。 雞翼 非常香脆，有肉汁 西班牙豬鞍配芝士椰菜仔 本身諗住食封門柳，但見隔離幾枱點左豬鞍，於是轉態食豬鞍先。豬鞍好大件，小小肥膏，唔嚡口，相當唔錯。椰菜仔帶苦澀味，唔ok. 黎到主菜啦。開心果沙冰 感覺似奶昔多過沙冰，入口好滑，奶味都幾重。 開心果巴斯克芝士蛋糕 超濃開心果味，芝士味又濃郁，好出色。 為左開心果而來，都無失望。

餐廳座位闊落舒適，中間嘅擺設好可愛，QQ豬仔，會唔會唔捨得食豬肉㗎。店面面積頗大，仲有房間，可以容納多人一齊燒烤。 餐牌有set，有散點，睇落都唔錯。重點係老闆娘話食材係韓國空運過來，夠哂新鮮。 前菜6小碟 同平時韓國餐廳食開嘅，有少少唔同，特別喜歡魷魚同爽脆蒜芯。 濟洲豬腩肉 老闆娘友善，為我地燒豬腩肉。豬腩肉層次分明，紋路清晰。燒烤時，油香撲鼻，豬腩肉油脂融化，使肉質更加嫰滑。點上濟洲魚汁，鮮味更突出。老闆娘仲介紹左新食法，就係用片酸蘿蔔包住腩肉，不但酸甜清爽，層次口感多左，而且減少油膩感，比常食嘅包生菜，更美味。 濟洲豬頸肉 無腩肉咁有層次，但就比較大塊同厚身，外層煎得少少金黃色，點上自制豆瓣醬，味道都唔錯。但我地自己燒，時間上唔係控制得好好，都係老闆娘燒肉出色啲。 濟洲韓牛 新鮮運到，啱啱開箱。肉質鮮嫰，牛味濃，保留肉汁，夾上配菜一齊食，真係perfect match. 牛肉湯 唔好以為紅色湯就好辣，其實唔會，第一口係菜乾嘅香甜，跟著係肉味，再帶來少少湯頭嘅辣，循序漸進，唔會嗆口，好醒胃。而且湯料好豐富，2人都食得好飽 餐廳食物美味，服務態度熱情親切，值得再來一次。

朋友介紹喺佢公司附近有間泰國菜，午餐好吃又抵食，今晚同佢食飯，一於試下佢嘅晚餐先。 地鐵站行來只需要幾分鐘，位置方便。招牌係紅色的，唔難揾。 一推門進店，老闆娘就親切打招呼，態度友善。同老闆娘傾開計，原來佢同老闆都係泰國人，來港已經幾10年了，佢地嘅泰國菜應該夠哂地道啦。 飲品叫了涷泰國奶茶同珍多冰，味道唔錯。 青芒果沙律 老闆娘推介，青芒果絲清甜，大蝦爽口，調味帶有少少酸辣味，夠開胃。 雞肉串燒 燒得金黃，加上獨特沙嗲醬，味道可口。 鹹蛋炒大蝦 嘩，份量唔少，擺得像一個小山丘，大蝦沾滿了鹹蛋黃，不但香脆，而且鹹蛋香味十足，食到停唔到口呀。連擺碟嘅炸芋頭鳥巢味道都唔錯，我地連鳥巢都拆埋清碟呀。