問韓國同事香港有咩韓國餐廳食過覺得好食既 因為我好中意韓食 想搵正宗既韓國餐廳 但香港大多都好伏 完全比唔上真正係韓國食 正宗又好食既可能好貴 但貴既又唔敢試 驚又貴又唔好食揼心口 佢其中一間推薦我既就係依間 不過佢有講明係偏貴 但都想試下！ 重頭戲一嚟就梗係點我朝思暮想既生牛肉！ 《高級韓國生拌牛肉》$258 好・新・鮮！ 係香港食過好幾次韓國生牛肉 啲肉色又暗啞 又溶唔哂冰 又冇鮮味 通常都係撈埋唔同既醃醬料掩蓋生牛唔生鮮 睇見都唔敢食太多 重點係生牛肉價錢唔平 但依到既生牛肉完全唔會令人失望！ 肉色紅潤冇騷味 自信地同其他配料分開放 佢Menu有一個平啲既生牛肉簡 但因為我見得依個有配梨 生牛肉一定要配梨先正 所以就簡左個貴既 雖然好貴 但份量好大碟 又生鮮好味 完全冇令人失望 店員有提我要盡早食完 (因為我食食下又食其他野) 佢以為我唔識食又好心幫我撈埋碟上配料 但其實我中意分開食 同唔中意撈生蒜食 不過因為生蒜有殺菌功效 所以都唔緊要 《石板韓式海鮮炸醬麵》$198 話說自從我係韓國食過一次正宗炸醬麵 好食到清哂碗上既醬汁一滴不剩 就成日想係香港搵好食既炸醬麵但都搵唔到 而我男友就一直都唔中意食炸醬麵 因為佢從來都未食過好食既炸醬麵 睇韓劇成日見到啲韓國人食得津津有味 佢唔理解點解我地覺得炸醬麵好食 但因為我想試所以都係點左～ 當我重埋頭食梗我既生牛肉時 麵嚟到佢自己走去夾嚟食 然後佢好驚奇地同我講：依個.....係好食既炸醬麵... 我雙眼發亮即刻去試下 真係好接近我以前係韓國食過既味！！！ 然後本身唔中意食炸醬麵既男友自己食得津津有味 枱上另外有個白碗本身唔知係要嚟做咩 因為本身自己有碗碟 原來係專for食炸醬麵既碟 店員又好熱心幫我地夾入碗 擺靚靚 滿滿儀式感 韓食不少得滿滿小配菜 因為食炸醬麵配黃色甜蘿蔔係絕配的 但依到既小配菜得白蘿蔔 所以我問店員會唔會有甜蘿蔔配炸醬麵 佢話我識食喎（店員大部分韓國人，我用韓語溝通） 然後話因為佢地用白蘿蔔所以冇甜蘿蔔 所以佢偷偷拎左自己私夥野比我 超感動🥹 不過可惜佢個甜蘿蔔唔算係我中意果隻味 唔夠甜 但我都有食哂去唔好浪費店員一番心意 佢重有個超可愛迷你飯 比我地食完炸醬麵撈入啲醬到食 我真係好想食 但因為太飽食唔落 因為每樣份量都好多 《辣味肥牛豆腐湯配飯》$98 係好正宗的韓式豆腐湯 都幾辣下 係男友中意既韓食 好好味 都係因為太飽 想食多啲都食唔落 所以冇細嘗 但男友清哂食得好開心 《柚子梳打》$38 飲品樽好有誠意 係開罐膠樽 成間店都係滿滿車銀優但係我對佢無感🙈 btw柚子梳打足料 店員又驚我飲唔到入面啲柚子幫我搖混勻倒入杯 雖然確實如韓國人所說真係唔平 (因為係韓國食絕對平好多) 但香港食到咁既正宗韓國料理質素 而且份量大都算抵食 2個人食唔到咁多又想試多啲 好內未試過好飽好飽都依然想繼續食 好可惜自己咁快飽而食唔哂啲野 所以依個價錢都值得 貴唔緊要 最緊要好食就值得！ 一定會同朋友再嚟～多啲人試多啲野～

第一次去 Airside
同男友玩冒險樂園玩到好夜好多餐廳開始收
冇幾多餐廳可以揀
見少數開梗既當時都冇乜特別想食
最後揀左依間覺得比較食得落
所以本身無抱任何期待
入嚟安排左坐最入面果排2人枱
覺得有啲迫想轉去出面四人枱
店員態度都好好即刻比我轉
(*首先越南餐廳叫野食我一定要叫全走茜先)

《牛油果沙冰》$42

因為平時都好中意牛油果🥑
見到佢有牛油果沙冰就點嚟試試
但都冇特別期待
因為真係唔係好多地方既牛油果沙冰好飲
點知一嚟到我飲左啖 簡直係驚豔！
可以話係我飲過最好飲既牛油果沙冰！！！
首先最重要既牛油果味濃郁
唔會覺得佢溝稀左或加左好多糖漿
就係原汁原味既牛油果味
最出色既係佢既沙冰超級soft and smooth！！
完全唔似出面啲沙冰會食到碎冰塊
總之就係完美 絕對會因為依個沙冰特登嚟多次
希望佢可以keep住水準唔好變😭
我重介紹左同事去飲
佢帶埋家人小孩去個個都點左依個牛油點沙冰
個個都話真係好好飲～

《叁拼牛Combo粉麵》$98
※生牛肉、牛助條、牛丸，河粉


越南河粉又係唔係到到既湯底都出色
一飲啖湯 正！
完全係我中意既濃郁越南牛湯又唔會死咸或淡
因為我一定要食一啖要一口湯咁食
所以麵未食完啲湯就就嚟飲完
因為餐廳都就收店 抱住僥倖心態問下可唔可以加湯
又真係比左一碗仔牛湯比我 開心～
全程服務態度都好好
而生牛肉、牛助條、牛丸全部都好嫩好好食！
所以介紹比同事佢地一家都係每人點左一碗麵
都話好好食冇介紹錯～

《香芒蝦仁米紙卷》$78

今次食既芒果好彩係又甜又大粒
蝦都多肉大大粒係我個人中意既配合

《Jumbo特大越南大頭蝦配蝦頭油炒金邊粉》$158

由於我係因為想試佢既大頭蝦所以點左依道餸
不過就相比起前面既菜色就我個人覺得冇咩特別
可能我已經飽飽地 而我又比較淡口味
所以覺得金邊粉偏咸
大頭蝦都大隻多肉 但唔夠嫩同蝦膏唔算多
唔算話特別出色 因為有係出面食過超好食既大頭蝦
所以依道餸對我嚟講就還好


又食到人收舖 都唔會有趕客既感覺
雖然係新界人
但絕對會再嚟飲牛油果沙冰同越南湯河！
希望可以一直保持水準🥲唔好變質

最近想食中式菜 經過見到依間新新淨淨 放工就同朋友嚟左依間食上海菜 菜單包羅萬有 我地3個人就點左7碟餸 開胃菜 《雞絲拌粉皮》 $78 卷狀粉皮 晶瑩剔透又爽口 好有誠意 配合清新青瓜同恰到好處既芝麻醬 口感豐富 味道剛剛好 係我想要既味道 而且好足料 試過係其他地方食雞絲粉皮又水又淡味 量又唔多 唔係簡單就一定好食 《生煎包》$42 本來以為係入面有湯既生煎包 但其實係冇湯的 但都不影響其香口 底部香香脆脆 肉餡滿滿 《上海小籠包》$45 湯汁小籠包真係唔係到到都好食 食過有啲內餡湯汁太咸 亦食過淡而無味 但依到既小籠包湯汁肉餡好岩我口味 有肉味之餘不太咸也不會淡 食多幾個都唔會膩 《鮑魚大蝦粉絲煲》$188 足料鮑魚大蝦 適合撈飯一齊食 份量多到食唔哂 《腿蓉奶湯津白》$85 奶湯好清甜 而且樖樖菜都好大條又入味 成碟清哂 《干貝賽螃蟹》$88 依道餸好得意 口感味道特別 《高力豆沙》$58 係朋友話好食所以叫既餸 紅豆餡配合甜甜地糖粉 都唔錯 又食到人地收舖 環境乾淨舒服 又大又多位 好適合朋友傾計飯聚

本來對打卡餐廳既食物都冇太大期望 點知都重可以大失所望 而且主要想打卡既人留意翻 要坐係少數幾個有背景既位置先有得打 其他位置唔係好影到個背景靚 所謂背景都只係個大螢幕 唔講打卡 食餐飯最差既係 一間餐廳竟然叫咩冇咩 重要係主打菜 叫生蝦冇 叫龍蝦冇 叫海膽麵冇 重有好多小菜都係百無 咩都冇唔明點解重放係Menu大大張相 想食好啲都唔得 我地重要唔係walk in 係一早book左枱 本來想起身走人唔食 但因為肚餓廢事再搵其他餐廳唯有局住食 叫左啲唔係最想食既野 例如依個打卡麵 下面個醬食左幾啖已經愈食愈咸食唔落 咁樣都盛惠$238 芒果斑斕糯米飯 $168 正常發揮 依碟燒扇貝好笑 $38一小粒 但得個碟大 扇貝小得可憐 上次食另一間café $148已經有4粒比依個大好多既扇貝連海鮮意粉 而且有鮮味又好食 依到得個碟大過人 泰式牛油果大蝦沙律 $128 中間用左辣醬料撈牛油果 冇咩牛油果味 主要食佢側邊啲牛油果 燒虎蝦 $48 兩個字 極差... 肉明顯係又淋又霉既 好後悔咬左啖個蝦頭 係臭既 唔新鮮 唔怪得佢咩海鮮都冇 叫唔到龍蝦念住叫個虎蝦頂住先 點知中哂伏 最好笑係果頭同我講龍蝦賣哂 果頭食到中途 遲我勁內入坐既4-5個客人上菜上左幾隻龍蝦 但一開始完全冇講龍蝦要預訂／已經被預訂哂 理解唔到點解果頭話賣哂 果頭又上比其他遲嚟大枱客人 (點菜時大枱客人重未入座) 燒四季豆 $18 Sweet baby $118 椰青唔記得幾錢 總結 好睇唔好食 更加唔抵食 真係好內未試過食一個晚餐食到心情咁差 成為我第二間要特登上嚟打差評既餐廳

放工同朋友3個人行街 經過始創就上左去依間餐廳坐低傾計食晚餐 我地坐左係餐廳外既位置 即使係餐廳外環境都唔錯 而且重有個好處係即刻餐廳收工閂左門 都重可以繼續坐到商場閂門為止 岩哂有排吹水既我地 見到冇哂人因為我地真係坐到最後 商場職員趕先起身走😂 入正題 首先前菜有湯同沙津揀 是日餐湯係蔬菜湯 蔬果味好出 而沙津竟然有石榴粒 正 3個人都好似好肚餓竟然叫左3個意粉 野菌意大利粉配牛肝菌醬 $118 都幾有菇味 卡邦尼意粉配溫泉蛋 $118 撈埋啲流心蛋黃一齊食好達到水準 最有驚喜既係5 黃金帆立貝意大利粉 $148 帆立貝夠大粒而且唔硬又有鮮味 最重要係個意粉都好有海鮮香味 係3個意粉入面我最中意既一個 值得推薦 最後3人埋單$442 傾飽食飽 滿足

朋友介紹話依間餐廳好食 所以Girls Talk小聚就簡左依間Bella Shine 一入餐廳店員very nice又有禮貌 4個女仔苦惱緊食4人套餐定半自助放題好 店員就即刻推介我地嚟個2人套餐加2人半自助放題 咁就咩都可以試哂～ 首先係*2人套餐* $628 有一個2人份既【松葉蟹肉紅菜頭糊麻汁沙律】 好豐富足料 蔬菜新鮮亦冇苦味 主食簡左【香煎格蘭陵比目魚配白酒忌廉汁】 個比目魚令人驚豔左 煎香脆既表面內裡魚肉鮮味多汁香濃魚油入口即溶 根本唔洗沾其他調味 連唔中意食魚既我都抵擋唔住 其次簡左【蒲燒鰻魚海膽忌廉汁扁意粉】+$28 大大條香燒鰻魚配合甜甜既海膽忌廉汁 都幾岩我口味～ *半自助放題*方面 $348(升級) × 2人 首先嚟左個開胃前菜 雖然只係個前菜 都已經好有誠意 佢有一欄＜任你點飯麵小食＞ 我地簡左【脆炸薯棗】同【蒜味枝豆】 原本都好中意食普通鹽味枝豆既我第一次試新口味枝豆 竟然好有驚喜 直程唔理其他人搬到自己面前瘋狂吸入 反正依到係任點～！出面食枝豆好貴的ㅠ 主食方面我地簡左 【柚子蜜山椒燒雞扒】 鬆脆既外皮配上淡淡既柚子蜜糖香 同埋升級組合既 【麥啤燉牛面頰】係店員推薦 真係冇介紹錯！！牛面頰肉質軟熟多汁 醬汁調配得剛剛好又唔會搶左肉香味 重有紫薯同新鮮蔬菜點綴非常豐富 而出面既任食海鮮bar 有翡翠螺・海蝦・青口 竟然都好有驚喜 見到每次店員一fill就即刻被清空 心念應該很不錯 前排先去過一間餐廳 就咁見到擺放住啲海鮮霉髧墮咁就已經唔開胃 襯店員再fill第一時間衝出去 就咁睇賣相都已經好唔同 明顯有晶瑩剔透既新鮮感 食落口更加冇失望 海螺海蝦鮮甜爽口彈牙 而本來唔太中意食青口因為出面食既都好韌 但依到既青口一啲都唔會韌！ 雖然都係最簡單既海鮮 但依個價錢要食到新鮮既一啲都唔容易 唔怪得次次一fill都瞬間清空 自助除左有海鮮 重有沙律甜品同Movenpick雪糕！ 由於openrice只放到12張相ㅠ所以有啲相po唔哂 我地冇拎沙律因為2人套餐有包個大沙律 而甜品方面因為最後食得太飽所以淨係拎左泡芙 泡芙係・超・正！！！入面個cream好爆滿！！ Movepick雪糕都因為太飽我冇拎嚟食 但試左朋友拎既espresso口味一啖 好好味！ 真係可惜自己飽到食唔落ㅠㅠㅠ 最後我地每人叫左唔同既飲品 我簡左【羅漢果雪梨滋潤茶】+$20特飲 本來念住唔理好唔好飲 只想清清熱 一開始飲係冇咩味 但竟然愈浸愈清甜花香味 而且估唔到咁大壼一個人飲 一邊嘆茶一邊食下甜品 完美結束左一次性價比高質大餐 最嚇親既係食左咁多野 而且咁有質素 埋單除翻開都係3百幾蚊一個人！！！ 而且其實如果我地大食既話 有好多包左任點既野食都可以試埋 雖然可惜好多野試唔到 怪自己細食 但一啲都唔會覺得唔抵！下次再嚟就可以試埋其他～

簡唔中都聽人講蘇媽好食 今次經過就入去試下 簡左個【檳城白咖哩油麵】$83 小辣轉米粉 有食過正宗既檳城白咖哩麵係超好食 而依個個湯都算係我中意既味道 但偏淡 一啲都唔濃郁 但最差既係 佢上面既餸菜同餐牌上差勁遠 兩隻鮮蝦變左兩粒冰鮮小蝦 白烚豆角 一patpat豬皮 重有兩小圈魷魚 小到你唔信 一圈係套入手指尾既大小 一圈係套入手指公既大細 我以為重會有啲正常size既魷魚 所以冇影到相 點知食左先知原來真係得咁多 而且啲餸既味道全部都好似白烚完就咁放上去 就算撈埋啲湯都係冇咩味 而男友叫左【高佬麵配炸豬扒】$83 佢因為未聽過又未食過所以念住試下 佢已經唔算簡食既人 但都好後悔叫左依個麵 因為個麵睇落好似好深色但食落都係冇味 佢倒哂所有醬亦撈埋啲花生細魚仔蛋黃食 都係食唔出個麵味 而個炸豬排又乾又薄 炸粉厚度同肉厚度差不多 【四大天皇】$92 茄子，秋葵，豆角都係我中意食既 臭豆未食過 所以簡左依個 個味道係好味既 但茄子皮唔知點解咁韌好難咬開 未食過咁韌既茄子皮 重因為咬唔開而辣損左上牙肉 依煲野真係油到傻 尤其食到最底果啲基本上係飲油咁濟 所以最後都食唔落冇食哂放左上碟 飲品方面男友簡左【馬來西亞拉茶】$32 佢話覺得都ok既 正常馬拉拉茶水平 而我簡左【貓山王榴槤沙冰】$88 $88一杯榴槤沙冰真係好貴 但見佢賣得咁貴念住應該有質素保證 點知都係冇乜特別 就真係好普通 完全唔值$88 榴槤肉都冇乜 而且好質疑佢係咪真係貓山王 對於榴槤愛好者 覺得佢同出面普通榴槤製品冇咩分別 出面幾十蚊一碗已經可以食到好好食既滿滿榴槤肉糖水 總之完全唔值 以下係餐牌 總共食左400幾蚊

之前係粉嶺裁判法院舊址同位置有食過另一間Cafe 果陣覺得位置咁隱世 唔係住附近既話 食完都未必會嚟第2次 而之前果間試食過後 唔係話唔好食 只係即使住附近都冇特別想特登再去 之後得知果間執左後 新開左依家依間 Cohee 上年10月時有次週末唔想去太遠 就念住嚟試下新Cafe 見到佢Menu有個幾吸引幾特別 【小龍蝦沙律・牛油果・三文魚籽 吐司及蔬菜沙律】$98 吐司有酸種包同貝果簡 我簡左酸種包 蔬菜沙律簡左芝麻醬 原本中意食牛油果既我 去親Cafe都會簡啲有牛油果既吐司 但通常配既都係啲普遍既蔬菜/蛋或煙三文魚等 而依個見到係配小龍蝦沙律 由於冇乜點食過小龍蝦 好奇小龍蝦沙律既味道 覺得好似幾特別所以就點左 點知一試令我雙眼發光！！！ 首先唔係出面普遍Cafe可以常食到既味道 可以話算係我第一次食到既味道 有滿滿既小龍蝦肉 肉質鮮甜爽淋 醬汁令小龍蝦味道更突出 配合好輕微既芥末味同鮮甜既三文魚籽 下面重有我中意既牛油果 酸種包唔會太硬或太淋 口感味道配合得剛剛好 真係超驚喜 食完果次之後 今年1月既今日又忍唔住嚟多次 依然冇失準 雖然好似冇左上次食到既芥末味 但都依然不影響對佢既喜愛 只要佢未執我都會再嚟第3次 而男友上次同今次都係點依個 【明太子小龍蝦扁意粉】$98 個味道係唔錯的 但我覺得煮熱左既小龍蝦冇沙律既咁爽口 所以我個人對比起吐司就冇咁喜愛 但我男友話覺得好好食 所以佢嚟第二次都係點翻依個意粉 每人口味唔同～～ 依杯 【我無罪・邪惡朱古力沙冰】 $58 都一樣係兩次嚟都有點 因為佢凍飲選擇唔係好多 而上次飲過覺得都唔錯所以再點過 朱古力味都濃 賣相亦不錯～ 嚟兩次都坐唔到窗邊榻榻米位 希望下次嚟可以坐到 本來想叫多個甜品 咁就應該岩岩好夠飽（早餐連午餐） 但因為晏少少又再卜左餐廳食野所以冇再叫到驚太飽 正常既Cafe價錢 唔貴但夠特別 外面重新設置左木製鞦韆同搖搖板 可以去玩下打下卡～ 有興趣可以配合舊裁判法院開管時間入去參觀 影下相都唔錯～

新年第一餐 除夕到新年Staycation完後 係酒店附近搵餐廳食 由炮台山行到天后 男友醒起有間新開既店都幾想試下 係依間主打魚湯底既拉麵店 但對於好怕魚腥魚骨滑魚皮既我 係一個好大既冒險 如果唔係真係好味我真係會完全食唔落 嚟到餐廳門口係要係門口點餐 可能因為店內環境細位置亦唔多 但一嚟已經話沾麵賣哂 得翻清湯同白湯 店員話如果怕魚腥可以試清湯 雖然全部都係魚湯，但清湯係比較試魚既清甜味 白湯係比較濃厚既魚湯味 唯有信佢試一試 入店後 唯一美中不足既地方係 未食之前水杯感覺有輕微魚腥味(對魚腥味極敏感) 但水味道係冇問題的 可能賣魚食既餐具味道難以清得澈底 上菜既時候 店員確認左我地係第一次食之後 好正式咁逐碗詳細介紹同講解食法 感覺很專業 【鯛清湯】 $138 首先淺嘗一口湯 真係如店員所介紹 係有種清甜既魚湯味道 唔會好咸又唔會太清淡 味道剛剛好 佢塊薄片叉燒肉味濃郁口感嫩滑 上方重有啲香燒雕魚肉 而我最欣賞係佢果兩塊脆魚皮 同一般脆魚片完全唔同層次 即使佢有一半浸左係湯好內 內層都依然可以保持到外軟內脆感 而且非常香口 可惜只有清湯配有魚皮 另外有一碟蠔醬 第一次見有依啲醬 蠔味確實好重 店員話係用嚟將清湯提鮮 本來都驚腥 但加左落湯後先理解到佢所講既提鮮味！ 連我咁怕腥既人都食到並且覺得好食 就證明確實真不錯 而男友食既 【雕白湯】$138 如店員介紹係非常濃郁既魚湯 試左一啖後我都覺得好飲 男友問我覺得邊個湯好味啲 我答佢各有特色 因為真係各有各味道 碗邊黃色一抹係柚子醬 加入湯後會變左柚子魚湯 估唔到又幾夾幾得意 下次有機會可以再嚟試埋佢一早賣哂既雕沾麵 店內有幾個位置可以望住中廚們料理 小巧的骰都幾有日本風味

因為中意薑餅人 男友搵到置地廣場有兩間cafe都有小薑餅人 最後對比過性價比打卡優勢 就簡左依間 成set 真係好QQ 佢既鹹點全部都唔錯依層最中意佢個蟹肉春卷 而最底層既有 海蝦咯嗲 鮑魚燒賣 煙三文魚卷 重有2個可愛薑餅人 都很不錯 最頂層有兩個企鵝曲奇餅同甜點 重有一個隨機附送既熊仔頭公仔 不過最後我問人轉左隻企鵝仔 感覺得意啲 坐卡位可以同埋下面既裝飾一齊影相～ 好有氣氛 由於係主題第一定二日就即刻去 所以都唔算多人 因為要求坐卡位都係等左一陣 但都值得～ 食完重可以繼續落下面打卡