又到四處覓食既日子，今日跑到中環揾好野食，老婆話想食意大利菜，左揾右揾揾到Aria。Aria位處蘭桂芳核心位置，身處加州大廈24樓，一片大玻璃窗可以飽覽中環夜景，食好野之餘眼睛都可以大飽眼福。 看畢餐牌就點了幾道菜，等食期間一邊望住夜景一邊食餐廳既餐前麵包，Pan Focaccia上枱就聞到香濃麵包味，麵包外皮脆香，内裏鬆軟，中間添加了牛油，食落滿滿小麥味同牛油香，沾上橄欖油更增風味。 烤八爪魚配奧西特拉鱘魚子醬及芝麻味車厘茄 八爪魚肉質軟淋，入口燒烤味十足，上面既魚子醬提升鮮味，配菜既車厘茄甜酸度剛好，撩起食慾，作為一道前菜相當適合。 龍蝦湯配鮮蝦他他 待應會席前將龍蝦湯倒入放了鮮蝦他他既碗內，落碗之際一股濃烈既龍蝦味隨之爆發，入口鮮甜，鮮蝦肉伴上龍蝦湯達到雙重鮮味，不期然一口接一口，好快就見到碗底。 香烤鹿兒島A4和牛肉眼扒 烤出完美既五成熟，一開始感受到燒烤味同油香，然後係強烈既肉感，雖然係和牛但唔會太油膩，加上有烤蒜調劑，食完都唔會太大負擔。 烤春雞 雞身烤出網紋，以檸檬牛油調味，食落外皮微脆，肉質滑嫩。 蕎麥貓耳朵麵配西蘭花苗及鯷魚 貓耳朵麵口感煙靭，食到蕎麥顆粒，醬汁用西蘭花同鯷魚煮成，西蘭花味濃香配上鯷魚調味，相當惹味。 來到意大利餐廳當然要食pizza，配料有香濃茄醬，水牛芝士，火箭菜，巴馬火腿及帕馬森芝士。Pizza上枱就感受到濃烈帕馬森芝士味，遠處就聞到，Pizza上滿滿巴馬火腿，咸香得來同香脆既簿餅底好配合，簿餅佈滿豹紋，火喉剛剛好。 總括來說，餐廳食物質素好之餘服務態度表現出色，成餐飯既體驗都相當不錯，加上Aria位置便利，飯後仲可以去蘭桂芳小酌一杯，真係夫復何求。

四戰道拉麵，今日品味最新作品鹽雞清湯拉麵，為菜單最後一道拉麵，前三次每碗拉麵都令我眼前一亮，未知今次可否再比驚喜我。 拉麵上枱呈現出一種潔淨感，雞湯淡黃色而清澈，每條拉麵，每種配料都清晰可見。食麵前先品嘗一下湯底，想不到一口湯過後就驚艷非常，一股濃烈既雞湯味在口中爆發，香濃而清爽，單單飲湯都好滿足。跟手到食麵時間，每一條麵都沾滿湯汁，每一口都係滿滿既雞味，估唔到清湯底都咁掛湯，配上雞叉燒食又係一種享受，叉燒肉質滑嫩，煙燻味十足，食完雞既鮮味係口中徘徊，回味無窮。要留意拉麵附上的流心蛋蛋味濃厚，如果蛋黃唔小心流入湯底會破壞雞清湯既純粹感，食用時要注意。 今次一樣加點了唐揚炸雞，炸雞外皮金黃色，雞肉炸得剛剛熟，鮮嫩多汁，係一道上佳之作，不過炸漿既調味會破壞雞清湯既潔淨感，所以不建議一起食用。 鹽味拉麵一直係拉麵既功夫菜，要做得好非常考驗師傅既功力，道拉麵稱得上實力派，可以呈現一碗咁純粹既鹽味雞清湯拉麵，一碗絕對要飲哂湯既拉麵，期待下次再來享受。

上次來到英皇駿景酒店頂樓chill左晚，無意中發現酒店一樓有間中菜廳駿景軒，睇落幾精緻，今晚路經灣仔就順便試一試。 一到餐廳問下前枱有冇位，好彩今日係閒日，未全院滿座，不過都提醒我哋下次來預先訂座比較好，皆因駿景軒枱數有限，真係手快有，手慢無。 坐低點左壺香片就研究下菜單，原來駿景軒係粵菜川菜皆精，上至鮑參翅肚，下至川粵小食，都一一精通，最後我哋點左五道小菜品嘗一番。 先上菜既係川味口水雞，雞同口水醬分開上，可以自由調味，雞肉本身已經鹽焗雞，肉嫩皮Q彈，就咁食都好好味，口水醬辣椒味香濃而微辣 ，一食就感受到師傅係川菜上既功力，兩者合一更加惹味，唔會徒有色而無其味。 之後係百花炸釀松葉蟹鉗，每人一隻唔使爭，蟹鉗沾上炸粉炸得脆香，食落外層蝦肉彈牙味鮮，入面蟹鉗肉質一絲絲，蟹味濃烈，添上甜酸醬後提鮮錦上添花。 緊接著既椒鹽鮮魷，炸皮簿脆，內裡魷魚肉經師傅刀功處理，一咬就開，黑醋一沾，更添風味。 主菜揀左瓦罉焗胡椒蝦，一開蓋濃濃胡椒味，見到滿滿原粒胡椒將蝦掩蓋，餐廳選用了大頭蝦，外殼炸得香脆，肉質結實，胡椒味與蝦味溶為一體，又唔會太過火，值得推薦。 最後以醬油安格斯牛肉石窩炒飯來作結，炒飯上堆滿木魚絲，石窩既熱力令木魚絲起舞 ，增加香味之餘亦撩起食欲，炒飯炒得粒粒分明，配料細切，每一口肉與飯都均衡分佈。淡淡醬油香配上木魚香同牛肉油份，三者溶為一體，越食越惹味，有驚喜既係鍋底熱力迫出飯焦，增加口感，又有一番風味。 五道菜份量剛剛好，唔會太多又唔會太少，每道菜味道質素都相當好，老婆都食到好滿意！駿景軒的確係一間隱於鬧市既高質素中菜廳，絕對值得推介。

為振興本地消費，今晚成班老友左揀右揀，上埋打邊爐關注組揾下香港有邊間打邊爐好食唔會中伏，見到滾得棧好多人推介，啲食物都幾是是正正，就決定會一會佢。 滾得棧位處食肆林立既棉登徑，門面黑底紅色大字非常搶眼，上一層到餐廳大堂，座位唔算多但係枱與枱之間相當闊落，唔會好迫，而且通風幾好，食完應該唔會成身味。 人齊開始點菜，火鍋湯底揀左特濃花膠雞湯，可以飲完雞湯先慢慢打邊爐，雞湯唔算好濃，飲落唔會好咸同渴，花膠質素不錯，仲有半隻雞食，絕對對得住個價位。 打邊爐梗係唔少得食牛，先來一碟招牌手切牛頸脊，牛味十足，口感軟淋，份量都好足，七個人食都好夠。然後一碟爽脆金錢𦟌，食落去好有口感，越食越有牛味，同樣份量唔少。 另外我哋仲點左韭菜餃，珊瑚蚌，三秒腐皮，炸魚皮，竹笙等等，個韭菜餃尤其出色，算得上皮簿餡靚，值得一試，每樣邊爐料都好有質素，滾得棧仲有好多海鮮，牛內臟可供選擇，不過朋友唔太好，所以無辦法一試，相信質素都應該唔錯。 食飯當日係閒日，餐廳到8點幾都係得3成滿，真係感歎生意難做。最後一提係滾得棧店員相當有禮，服務周到，成餐飯都食得好舒服。

大圍小館首間分店揀左大老遠既元朗，係美食雲集既元朗，究竟可唔可以係元朗站穩陣腳，重現本店既風彩呢，今晚就來一探究竟。 門面一面大牌匾，大圍小館四隻金漆大字，配上一串串紅色燈籠，有如本店般的裝潢，古典之餘又不失現代感，分店座位不多，一定要預先訂枱。 今晚一行十二人剛好一圍，睇過餐牌就開始點菜，前菜先來個煙燻鵝肉卷，擺盤精巧，入口一股煙燻味夾雜淡淡鵝香。沙薑豬手仔外皮Q彈，切得小巧，剛好一口一件。 來到大圍小館必點第一叉，叉燒上枱後待應會塗上新鮮菠蘿醬，然後用火槍燒到表皮焦香，入口肉嫩味濃，不過真係太大舊，食得幾用力。再來一整隻琵琶鵝，斬件前原隻上枱，睇到外皮燒到啱啱好，食落鵝皮脆口，肉嫩有油香。 之後再來小菜兩碟，分別係椒鹽鮮魷，炸皮脆薄，鮮魷肉質彈牙，相當新鮮。另一道蜜薯和牛柳煮到半熟，入口軟淋肉味濃。 椒鹽九肚魚上枱後有驚喜，每條九肚魚以竹簽串起再炸，食落粉簿酥脆，觀感味道都上佳。食飯當然唔少得食菜，馬拉盞蝦乾肉末生啫芥蘭煲上枱熱辣辣，芥蘭每條都好嫩口，用料有質素。 最後以蝦籽豉油王炒麵作結，炒麵炒得乾身有鍋氣，沾上蝦籽食別有一番風味。整頓飯可以體驗到每道菜都用料上盛，對得住個價位，不過調味偏濃，老人家食就會有啲辛苦，希望下次再食會有所改善。

難得收早同老婆食飯，見食完飯仲早打算揾個地方chill下，碌一碌附近有乜choice，比我睇到呢間The Crown，係灣仔英皇駿景酒店25樓，入到酒店仲有專𨋢上落。 𨋢門打開後，入眼係一副貴麗堂皇既裝修，好似置身宮廷般，The crown仲有室外雅座，可以一邊飽覽夜景，一邊聊天飲酒，成個人都好relax! 我哋決定坐室外欣賞個夜景，睇完menu點左兩杯店員推薦既cocktail，店員相當友善專業。 Pink Dahlia聞落去好重花香味，入口甜甜地好舒服，好啱女仔飲。 Jade 有別於一般cocktail，用茶杯盛酒，好特別，入口酸酸甜甜，淡淡酒味。 食完晚餐坐係到飲住cocktail，同老婆拍下拖，真係舒服。

一年一度大日子，🐻花盡心思揾一間餐廳來慶祝下，左揾揾，右揾揾，都係覺得Bacchus氣氛好，食物有水準，所以決定返來食佢。 今晚揀左Bacchus Opera Tasting Menu，有七道菜同一道甜品，點好菜就坐定定等食。 Parker house係餐廳homemade，上枱瀰漫著濃烈香味，感受到麵包既熱度，係一種剛出爐既味道，口感鬆軟，盛載既餐具都加熱過，相當細心。而伴麵包既Whipped brown butter都係homemade，添加左黑蒜同白醬油，黑蒜味顯得牛油有一種鮮甜既感覺，配麵包食相當一流。 Kanpanchi油甘魚產自日本，切成細粒，肥美鮮甜，搭配caviar既咸香味，相當開胃。 Pollard Beef Tartare with smoked pike roe 牛他他配煙薰魚子，造成一口既size，牛肉同魚子完美配合，每次咀嚼就感到一種衝擊，檸檬葉既調劑恰到好處。 Ceps Mushroom soup口感細膩，牛肝菌同奶油忌廉既融和，on top加上雅枝竹炸片，添加口感之餘亦增加香味。 Red Snapper煎得香脆，魚肉緊緻，蕃茄薄片同羅勒香蒜煮成既醬汁，帶出魚肉既鮮甜。 Linguine口感彈牙，醬汁加入海膽，鮮味滿滿，加左wasabi既青芒又甜又刺激，好特別，紅蝦肉質彈牙鮮甜，相當好食。 US Prime Short Rib用左蘋果木煙薰，配丄黑蒜海鮮醬配西米，牛扒口感軟糯，肉味香濃，醬汁有濃烈蒜味，少少辛辣味，好惹味。 65 Degree Iberic pork belly 外皮煎得香脆，肥瘦適中，肉質鮮嫩，紫薯既甜同落神花山渣醬既酸提升肉味，係一道出色既豬肉料理。 最後上枱既Petit Four 以四款精美既甜品作結，老婆同我都相當滿意成餐飯，待應細心有禮既招待，每道菜都會一一講解，餐廳環境寧靜開揚，係慶祝聚會既一個好地方。

今日三顧道拉麵，為的是一碗濃醬油雞清湯拉麵，今次一開店就來訪，得以首輪入席，無須在外日灑雨淋。 目的明確，一坐低就點好拉炸雞，靜靜等待美食，道的店員比上次三個人加了一個，烹調備料的速度好像紅彗星三倍速般，未幾拉麵炸雞就左眼前。店員依舊細心講解拉麵的用料，食法，得知濃醬油拉麵除左以慢煮雞湯作基礎，配以一層烤過既雞油，原來還加入煮干提鮮，而醬油殊不簡單，由五種醬油混合而成。 一啖湯入口，醬油香混合雞湯味衝擊味蕾，細細品味下會有一股鮮味，湯底果然無令人失望，拉麵今次煮得剛剛好，有彈性之餘唔會失去麵粉味，奈何湯底太出色。另一驚喜係雞叉燒尤勝上兩次，入口煙薰味好強，肉質細嫩，雞味依然保持，外皮呈棕色，有如火雞般的顏色。店員建議食到中段可以加黑胡椒改變口味，添加後湯味鮮甜感增加，不過黑椒味太強烈，蓋過湯底細膩的地方，所以個人不太喜愛。 炸雞依舊大大舊，不過水準有啲下降，雞肉無左嗰種嫩滑感，感覺有啲為快而失去質素。整體食感都係相當滿足，一碗拉麵就可以令人回味無窮，道拉麵暫時係我心目中既頭幾位。

中環真係好多餃子舖,淨係石板街附近都有幾間,行幾步就有一間，有時真係覺得多過便利店，唔知點解會有咁多間，唔通中環嘅人特別鍾意食餃子🤣 呢間餃掂lunch時間特別多人排隊，可能因為餃子嘅價錢比平時嘅飯盒平啲,不過我就覺得淨係食幾粒餃子唔夠飽所以好少食,今日因為食咗嘢所以唔算好肚餓就嚟咗呢間度排隊買嚟試吓,揀咗韭菜豬肉餃都唔錯幾好食個皮都算煙靭餡料亦都好足料同埋夠味,下次會試埋其他嘅餃子比較吓睇吓邊間好食啲。

方榮記呢個打邊爐傳統老字號，未食過都一定聽過，當年首創手切肥牛，同以沙嗲湯底打響名號，今日來打下卡同試下係咪真係咁好食。 來到方榮記一定點沙嗲湯底，叫左碟機切牛肉，牛肉大大塊，唔算太肥，配上濃郁既沙嗲湯底食都有牛味。響鈴放入湯幾穢，輕微沾上沙嗲味，又可以保持脆口;豬潤鮮紅色，感覺好新鮮，食落少少沙感，唔錯。反而叫左魚腸係一個敗筆，魚腸好肥美，放入去鍋到好快就融化，完全食唔到。 最後梗係以公仔麵配午餐肉作結，公仔麵吸滿沙嗲汁，配上厚切午餐肉，一碗完美既沙嗲公仔麵就完成。 一邊係方榮記食飯，一邊諗返起電影PTU的情節，真係幾特別。