喺筲箕灣諗唔到食咩好？可以去試一試呢間越南菜，近街市嗰頭，位置會偏少少，但都幾受街坊歡迎！主打傳統越南菜式，米紙卷、檬粉嗰啲，叫主食類可以半價加配飲品，幾抵食，唔怪得咁多街坊支持！ ------------------------------ 🌯◖汁燒牛肉米紙卷◗ $98 汁燒牛肉甜甜地，每舊都包住幾片牛肉同沙律菜，幾足料！建議淋埋佢哋自家製嘅酸甜醬汁，一啖食落去好滿足！ 🍲◖熟牛肉湯粉◗ $78 揀咗金邊粉底，湯底清淡但更加突顯牛肉嘅味道，金邊粉好食吸晒啲湯汁，但略嫌牛肉嘅份量唔夠～ 🦑◖燒原條魷魚筒◗ $68 大大隻汁燒魷魚筒，食落幾香，味道偏甜口，滿滿醬汁好香！ 🍊◖柑桔梳打◗ +$19 🍋◖鹹檸梳打◗ +$19 🌟 Encore指數：8/10

有時假日冇乜嘢做，會同朋友約埋去長洲Hea返一日，行吓沙灘食吓嘢，夠晒chill！最近呢度多咗好多特色打卡Cafe，行去東灣會經過一間Cafe，簡約風設計，掛滿大大小小嘅鹿角蕨，有超多唔同嘅植物，成個迷你綠洲咁，坐得幾舒服！餐廳冇乜堂食座位，只有少量凳可以小休一下 ，行路攰嘅時候可以入嚟揀返兩杯特色精品咖啡，叉叉電先⚡️！ ----------------------------- 🍳◖OXY芝士蛋手抓餅◗ $68 加咗腸仔（$8）、火腿（$8）同蛋（$5），配上士拉差醬，酸酸辣辣特別惹味！ 🍳◖OXY芝士蛋手抓餅◗ $45 自己配搭咗一個鹹嘅手抓餅，加咗肉鬆（$10）同蘑菇（$5），成個手抓餅好爆餡！肉鬆鹹香配上爽脆多汁嘅蘑菇，仲有芝士蛋，味道都幾夾香濃！ 🍪◖焙茶曲奇◗ $30 棉花糖焙茶曲奇口感煙靭，中間棉花糖仲有拉絲嘅效果，但略嫌甜咗少少～ 🍋◖Iced Candied Lemon Coffee◗ $68 蜜漬檸檬微甜，加入冷萃咖啡，帶啲檸檬嘅清新感，飲落解渴消暑，打卡都一流！ 🥥◖Cococold Brew◗ $68 加入新鮮椰皇水，有些微天然甜味同椰香，配合香氣濃郁嘅咖啡，係比較清新嘅選擇！ 🌟Encore指數：8.8/10

講起食泰國菜，一定會去九龍城，有好多泰菜館可以選擇，而且價錢都幾抵！呢間泰菜館每次經過都坐滿人，餐廳有分室外同室內座位，菜式選擇好多，除咗傳統嘅炒粉麵，仲有多款炭燒串燒，夜晚時段仲有live music🥁，超熱鬧好feel！ -—————————————— 🍢◖泰皇咖喱青口◗ $38 每日有至筍優惠，星期一同二就係呢個咖喱青口，份量都唔少，有成六隻青口，超抵食！咖喱香氣濃郁偏甜口，加咗蛋去炒，口感特別順滑，青口肉質亦都唔柴，彈牙爽口！ 🌋◖曼谷夜市火山骨◗ $198 有六大枝排骨，而且每條都啖啖肉，份量十足！淋上秘製酸辣汁，酸酸地零舍開胃，但略嫌排骨肉偏瘦而且多，冇咗吮骨嘅樂趣～ 🐂◖燒安格斯西冷牛扒◗ $268 餐廳嘅招牌菜，西冷牛扒有兩大件，邊位少少脆口帶炭燒香味，揀咗六成熟，肉汁豐富且牛肉味濃郁！ 🧋◖泰式乾炒海鮮米粉◗ $108 炒米粉好香好有鑊氣，配料都幾多：有魷魚、大蝦、帶子，仲有啲芥蘭，味道口感都幾豐富。米粉炒得乾爽夠香，但調味偏淡，另外加咗啲咖喱一齊食，味道香濃惹味！ 🥥◖椰皇沙冰◗ $42 🍍◖青檸菠蘿沙冰◗ $42 兩杯沙冰都叫咗走甜，飲落會偏淡。椰皇沙冰食到椰蓉嘅口感，青檸菠蘿沙冰酸酸甜甜，飲落相對上清爽。 🌟Encore指數：8.6/10

呢間粥粉麵店喺天后嗰頭，相對上平民嘅餐廳，主打粉麵、生滾粥同腸粉，款式都好多，而且價格親民，食物都有返咁上下水準🤩！餐廳環境光猛企理，有種溫馨嘅感覺，堂食同外賣都唔少，好受街坊歡迎！ ------------------------------ 🍜◖柱侯牛筋腩撈粗◗ $52 牛筋牛腩都煮得好入味，牛筋好Q彈滿滿嘅骨膠原，牛腩就煮得硬身少少，但肉味都幾濃有肉感！粗麵加咗少少蠔油一齊撈，口感爽脆，食到有鹼水味同蛋香，麵質唔錯！ 🍲◖及第粥◗ $53 豬雜足料份量夠，有豬潤、豬肚、豬心、豬肉丸、粉腸，而且都係大大嚿，洗得幾乾淨唔會食到豬味，粥底軟綿濃稠，加啲胡椒粉更正！ 🐖◖叉燒腸粉◗ $37 腸粉外皮軟糯，包住半肥瘦嘅叉燒，配甜豉油食，口感滑溜，但就唔算好驚艷呢～ 🥟◖上湯淨雲吞◗ $40 有八粒足料雲吞，皮薄餡大，每粒都有兩隻鮮蝦，帶有淡淡胡椒粉味，味道鮮甜，整得幾出色！ 🥬◖蝦籽芥蘭◗ $30 蠔油芥蘭見得多，蝦籽芥蘭真係第一次試，蝦籽鹹鹹地，整體食落唔會好濃味，清清地帶淡淡嘅鹹香。 🍋◖熱檸水◗ $16 🥛◖凍豆漿◗ $18 竟然有豆漿飲，豆味濃郁甜度啱啱好，幾好飲 🌟 Encore指數：9/10

講起日式串燒，一定會諗起燒鳥！呢間日式串燒居酒屋主打燒鳥，有唔同嘅部位可以選擇，$28起就有一串，仲要用備長炭火明爐燒，食落充滿炭香！環境好闊落，仲有四人卡位，闊落而且私隱度幾高！🈹Sapporo生啤仲做緊買一送一優惠，$48有兩杯，同朋友啤一啤佢啱啱好！🍻 -—————————————— 串燒以燒鳥為主，有好多少見嘅雞內臟🐓，尤其推薦佢雞腳筋、雞腎、雞心、雞肝，用上燃燒同汁燒嘅方法，食落炭香味十足！🔥雞柳同雞髀肉都唔錯，燒到七成熟💦，多汁唔乾柴。雞肝醬多士都幾特別，多士烘得香脆，雞肝醬軟綿香滑🥴；味噌松阪豬🐖甜甜地，帶有少少焦香，好似即燒起嘅豬肉乾咁，推介必食！👍🏻 💕雞柳（芥末） $28 💕雞腎 $28 💕雞心 $28 💕雞肝 $28 💕雞胸軟骨 $28 💕雞腳筋 $28 💕雞心管 $38 💕熟成雞腿肉 $38 💕雞肝醬多士 $58 💕味噌松阪豬 $28 💕黑松露帶子燒 $58 💕鹽燒牙帶魚 $42 💕銀杏 $28 💕芝士年糕 $38 🌟Encore指數：9/10

之前嚟試過佢個brunch，今次幫朋友慶祝生日，嚟試一試佢晚市個tasting menu！餐廳位置比較隱蔽，喺擺花街嘉寶商業大廈停車場上一層扶手電梯轉左，門面少少隱蔽～推開道門好似去咗第二個世界咁，好鍾意佢個設計，整體燈光偏暗，用上異國風情嘅裝飾🪇，幾有夢幻感覺好靚🤩！餐廳有set menu，人均$700唔洗，大時大節過嚟食飯慶祝，淨係食個環境都抵！ ✨餐廳會事先發送確認短訊，適逢朋友生日，remark咗生日，員工拎甜品上嚟仲唱埋生日歌，超搞笑！🤣 ------------------------------ 🧑🏽‍🍳◖ᴛᴏᴋʏᴏ ᴛᴀꜱᴛɪɴɢ ᴍᴇɴᴜꜱ◗ $680 p.p. 呢個價錢食到成個full set，每道菜都好精緻特別，前菜到甜品嘅出品水準都好高，食到中間已經飽飽地～🤰 — ɴɪᴋᴋᴇɪ ɪᴄᴇ ʙᴏᴡʟ — 🐟/ᴄᴇᴠɪᴄʜᴇ ᴄʟᴀꜱɪᴄᴏ 醃製油甘魚刺身加入甜粟米同薯仔，，^_^魚生刺身口感軟腍，配上秘魯「虎奶醬」，酸甜清新又開胃 🍤/ʟᴀ ᴄᴀᴜꜱᴀ 大蝦天婦羅肉質緊實，配上牛油果醬同蝦肉他他醬，加入咗啲洋蔥辣椒，比較辛辣，仲有軟滑薯蓉，幾特別好食 🍉/ᴛᴜɴᴀ & ᴡᴀᴛᴇʀᴍᴇʟᴏɴ ᴛᴀʀᴛᴀʀᴇ 用上赤身吞拿魚，配西瓜呢個組合好新奇！西瓜清甜juicy，意外地夾吞拿魚他他，微微芥末香嘅柚子醬油，層次豐富 — ꜱᴇᴄᴏɴᴅ ᴄᴏᴜʀꜱᴇ — 🌮/ᴛᴀᴄᴏ ᴅᴇ ᴀᴅᴏʙᴏ Taco夾住慢煮牛頰肉，配上牛油果醬同莎莎醬，一啖咬落去好滿足口感豐富 🐂/ʙᴇᴇꜰ ᴛᴀᴛᴀᴋɪ 食落去唔似生牛肉，口感軟糯，配上日式醬汁同洋葱，唔腥有啲似食緊刺身 🍙/ᴘʀᴀᴡɴ ᴀᴄᴇᴠɪᴄʜᴀᴅᴏ 成個Menu最好食嗰道菜！外表平凡，飯卷包住炸蝦同牛油果，上面放上厚切油甘魚，配上秘製醬汁，味道酸酸地感覺好清新 — ᴍᴀɪɴ — 🥩/ᴛᴏᴋʏᴏʟɪᴍᴀ ꜱᴛᴇᴀᴋ 牛扒煎得好香，外層超脆口，裏面嘅肉質呈鮮嫩嘅粉紅色，可以點上伴碟嘅蒜蓉牛油醬一齊食，但感覺有少少過火，食落有少少乾柴 🐟/ꜱᴀʟᴍᴏɴ 香煎三文魚厚肉大件，外層脆皮鎖住肉汁，入口啖啖魚油香，搽上芥末醬油，好有日式風味 🍛/ᴀʀʀᴏᴢ ᴄᴏɴ ᴍᴀʀɪꜱᴄᴏꜱ 海鮮燴飯好足料，有藍青口、帶子、蝦八同爪魚，飯粒鮮甜濕潤，面頭仲加上芝士絲，一啖食落去全部都係料超滿足🥰 — ᴅᴇꜱꜱᴇʀᴛ — 🍪/ᴏʏᴇ ᴘᴀᴘɪ 大大個朱古力批夠兩個人share，用黑朱古力唔會好甜，好好味濃郁，配上椰子味gelato，口感軟滑帶淡淡椰奶香，整體超正！ Encore指數：9/10

呢間日系甜品Cafe喺旺角小食街嗰頭，舖頭唔大，主打大阪燒、烏冬同烤蛋糕，主食跟配飲品有半價優惠，性價比之選！餐廳走日系簡約路線，用上木系暖色調設計，感覺特別溫馨～ -—————————————— 🥘◖帶子大阪燒◗ $98 大阪燒唔會好多醬，上面加咗海苔粉同大量木魚絲，所以食落特別香！蛋漿中間夾住帶子粒，底層仲有少少椰菜絲，整體口感豐富又唔會好鹹！ 🐓◖炙燒慢煮雞叉燒蕃茄湯烏龍麵◗ $88 雞叉燒燒得好香，用慢煮嘅方法，令到佢肉質keep住嫩滑，仲有個糖心蛋口感都好正，但蕃茄湯底偏酸，同埋烏冬煮得偏軟容易爛～ 🍧◖伯爵茶刨冰杯◗ $58 伯爵茶刨冰杯買一送一，片狀刨冰加上軟滑伯爵茶忌廉，配多一片焦糖餅，甜度啱啱好，仲有少少伯爵茶粉嘅口感，個人幾鍾意🤣 🍵◖焙茶豆乳◗ +$29 🍵◖抹茶豆乳◗ +$29 兩杯茶味日式豆乳都唔會話好甜，而且飲到茶嘅回甘。個人咁鍾意焙茶嘅味道，帶有炒過嘅茶葉香，記得飲之前要撈勻佢！ 🌟Encore指數：8/10

沿住觀塘鴻圖道行，見到一棟橙紅色嘅建築物🧱，好有復古建築物嘅感覺，地下係茶餐廳，二樓係傳統舊式茶樓，喺度飲茶夠晒風味！點心款式多，13:45就係下午茶時段，星期日$21.8起就有一籠點心，而且茶位費$12，同屋企人行開呢頭都可以嚟飲個茶🫖，超抵食！ ------------------------------ 🤎◖潮州靚粉果◗ $21.8 外皮黏糯煙靭，裏面有好多爽甜嘅沙角，仲有啲蝦米，增添咗啲鹹香 🤍◖山竹牛肉球◗ $25.8 牛肉球夠彈牙，鍾意佢唔會太多肥肉，但略嫌喼汁唔夠酸～ 🤎◖蟹籽燒賣皇◗ $28.8 蟹籽燒賣加入咗冬菇同豬肉，豬肉餡肥瘦適中，口感彈牙，食落更香更有層次 🤍◖北菇棉花雞◗ $28.8 雞件大大嚿，爽滑肉質超嫩，呢個做得幾出色！ 🤎◖蜜汁叉燒腸◗ $28.8 叉燒腸皮煙韌，屬於偏厚身，你鍾意佢包偏瘦嘅叉燒餡，點上甜豉油食超正！ 🤍◖黑竹炭奶黃流沙包◗ $28.8 包身好鬆軟，搣開佢裏面真係見到粒粒鹹蛋黃碎，起晒沙有少少流心嘅效果，記住趁熱食！ 🌟Encore指數：8.5/10

如心酒店喺海之戀附近，自助餐場地唔算太大，但食物款式出奇意料地多！而家嘅做緊Surf & Turf海陸盛宴主題，有唔同海鮮同肉類提供！🌟即燒和牛、清酒鮑魚、藍鯨吞拿、椒鹽蝦、薑蔥龍蝦、冰鎮海鮮等，仲有多款同法國Valrohna聯乘嘅朱古力甜品，適逢母親節，仲有好多節日限定嘅原個蛋糕💝！ -—————————————— 🐟◖海陸盛宴自助餐◗ 自助餐場地唔算大，但食物款式算好多，有好多凍海鮮魚生、鐵板燒料理，仲有中西式嘅熟食，好似蒜蓉蒸鮑魚、焗生蠔🦪、椒鹽蝦、薑蔥龍蝦🦞呢啲，一次過試晒咁多款！ 🦐/海鮮 自助餐回本必食嘅凍海鮮有麵包蟹、清酒鮑魚、雪花蟹腳🦀、翡翠螺同凍蝦🦐！麵包蟹超多蟹膏；蟹腳都唔錯，幾多肉，唔會死鹹；凍蝦超彈味道鮮甜～ 🍣/刺身壽司 有六款刺身🐟：吞拿魚、三文魚、油甘魚、鯛魚、八爪魚同北寄貝，最驚喜竟然有任拎嘅藍鰭吞拿魚！刺身整體質素都唔錯，最鍾意佢嘅油甘魚三文魚同藍鰭吞拿魚，吞拿魚油脂豐富，入口即溶，味道超甘甜！另外仲有啲日式小食、涼菜同冷麵提供。 🥗/冷盤 有啲cold cut可以做吓前菜，有煙三文魚、火腿同四款芝士🧀：埃丹、車打、瑞士大孔同布里芝士，可以配上麵包或者梳打餅食！有啲沙律菜同埋魚鮮撈好嘅沙律，款式唔會太多～ 🍖/熱葷 佢熱菜款式好多，而且質素都唔錯，入面試過薑蔥炒龍蝦、金銀蒜蒸鮑魚、焗蠔、紅酒燴牛肉、清蒸魚、白酒忌廉汁香煎盲鰽，仲有啲印度咖喱，全部水準都唔錯！ 🍨/甜品 門口位就係甜品專區，一入嚟就見到幾個大大個又精緻嘅蛋糕，今期仲要聯乘法國Valrohna推出蛋糕，每個都好靚好精緻🤩！尤其是個麵包布甸，雲呢拿味好香又唔會好甜，焗朱古力🍫撻半流心，而且用上黑朱古，可可味特別香濃！仲有個黑白朱古力噴泉，拎啲生果去點一點佢，形成一層薄薄嘅脆皮，好食又好玩！ ☕️/飲品 有果汁、咖啡同玻璃樽裝汽水提供 🌟Encore指數：9/10

大喜屋一向以高質見稱，仲會定期推出新菜式，每次去都有新鮮感👀，已經去過數唔到咁多次！呢間新開嘅殿大喜屋，坐落帝京酒店二樓，環境闊落企理，樓底夠高空間感十足！呢間放題出名佢嘅任食榴槤蓉，晚市8:30之後去，依然爆棚要等入座，人氣超高企！ -—————————————— 💕◖晚市放題◗ $398 晚市8:30之後入座，$398一位，放題嚟講唔算平，但絕對抵食！佢食物款式多，而且食材一啲都唔劣，無論刺身、熟食定甜品雪糕，品質都有返咁上下，而且冇乜漏單嘅情況出現，上菜速度都好快，抵讚！👍🏻 /刺身壽司🐟 大喜屋刺身壽司都做得唔錯，刺身厚切鮮甜，而且壽司款式好多！刺身種類幾多，基本上都冇伏，大推佢嘅三文魚、油甘魚、池魚、吞拿魚腩、帶子同甜蝦，超鮮甜！三文魚、油甘魚、吞拿魚腩油脂豐富，食落甘甜；池魚嘅韌勁同甜蝦嘅黏糯嘅口感好正！除咗刺身，仲有多款壽司同手卷，推薦厚燒鰻魚玉子、鵝肝芝士鰻魚卷、北海道海膽軍艦🍣！ /一品料理🧆 新推出好多熟食，今期係避風塘炒蟹同黃咖喱大頭蝦！必食嘅有川燒珍寶廣島蠔🦪，連殼原隻上，上面放咗蒜蓉，肥美飽滿超爆汁，可以直接一打上；金銀粉絲蒸扇貝都係大大粒，咬落好juicy鮮甜！仲有大大隻燒乳鴿、鐵板鵝肝厚多士、椰皇燕窩燉蛋白，高質又好食！ /燒物🍢 有牛舌、鰻魚、羊架、燒菠蘿、翠玉瓜呢啲，上枱全部熱辣辣，燒得香口！菠蘿同翠玉瓜都好清甜，啱晒消膩！另外仲有一啲居酒屋嘅菜式，好似西京燒比目魚、鱈魚乾，食材用料高質，調味亦做得啱啱好，帶得出食物嘅味道！ /炸物🍘 日式天婦羅有皇帝蟹棒、虎蝦、南瓜同番薯仔，另外仲有芝麻雞翼、榴槤炸彈同香芋丸、芝士年糕同炸鮮奶，款式唔算太多～必食嘅一定係佢嘅流心榴槤炸彈同鹹香芝士年糕，兩個都熱辣辣，煙韌香口，正！ /煮物🍜 有雪花牛肉鍋、牛肉湯烏冬、黑蒜油豬骨拉麵、清酒煮蜆、蟹黃粥呢啲，做得都幾出色！食落相對上容易飽肚，啱晒喺食生冷嘢之前食少少墊一墊胃！ /甜品🍨 多數甜品都係自助區自取，除咗自家製嘅奶凍、布甸之外，仲有任拎嘅雪糕櫃，Häagen-Dazs雪糕杯都係任拎，竟然有開心果Häagen-Dazs雪糕杯😍！ /飲品🧃 有咖啡機同多款自取包裝飲品，仲有樽仔奶茶、珍珠奶茶、清酒同自家製冷泡茶可以選擇～ 🌟Encore指數：9.1/10