好快就到感恩節、聖誕節同除夕呢幾個食大餐慶祝嘅日子，如果挑選健康啲嘅食物，自然密密聚餐都冇有怕。多人共聚，一般會揀口味大眾化嘅日本菜同韓國菜，但呢兩種菜喺烹調時一般會用唔少醬料，咁大家就無形中好容易攝取過量鹽同糖，影響健康。以下呢3間參加咗少鹽少糖食店計劃嘅日韓餐廳，特別提供幾道少鹽少糖菜式，令大家喺佳節依然食得盡興，亦能品嚐食材本身嘅鮮味！
特上雜錦刺身拼盤
尚善主張健康飲食，亦已參加咗少鹽少糖食店計劃，所以本身嘅菜式都注重健康。要喺成個用餐組合上做到更少鹽少糖，首先由特上雜錦刺身拼盤開始，提點食客盡量唔蘸醬油，細味食材原味。
銀鱈魚西京燒
食材夠新鮮嘅話，唔使點落調味料，都已經好美味。銀鱈魚西京燒將高質銀鱈魚扒烤至外皮微微焦香，會逼出天然嘅海鮮鮮味同魚油獨特嘅香氣，故當混合以清酒同味醂自家製嘅醃料時，即使減少1/3鹽，都仍然好夠味。
北海道海膽炒飯
飯類係聚餐時容易同朋友分享嘅菜式，而北海道海膽炒飯以三文魚、深池魚、章紅魚、油甘魚同海蝦入饌，口感豐富之餘，大量海產亦使炒飯嘅鮮味瞬間提升。再加上新鮮空運到港嘅北海道海膽，將其甜味同香味融入炒飯之中，烹調時減少1/3鹽都仍然香氣撲鼻。
壽喜燒牛肩肉雜菜鍋定食
壽喜燒係日本人喺大節時嘅熱選菜式之一，而家凍凍地食就更加適合喇。壽喜燒牛肩肉雜菜鍋定食配有津白、金菇、豆腐、小唐菜、紅蘿蔔、冬菇、大蔥、鳴門卷同葛絲9款食材，唔只蘊含大量纖維，蔬菜天然嘅清甜味令湯汁變得更加香，故減少1/5鹽同糖後，湯汁仍甜味十足，同時更突顯牛肩肉本身嘅鮮味。
照燒雞扒定食
日本菜之中有唔少香口菜式，好似呢份照燒雞扒定食將新鮮雞扒用生燒方式製作，不但雞肉無預先醃製，連自家製嘅醬汁都減少1/5鹽同糖。雞皮香口微脆，肉質嫩滑多汁，滋味程度不減。加上沙律做配菜，同雞扒一齊食更多份清甜味。
鹽燒大西洋比目魚定食
肉質軟滑嘅鹽燒大西洋比目魚定食啱晒海鮮控！進口嘅大西洋比目魚自帶點海水味，無需醃製，故烹調時減少1/5鹽反而讓人能夠品嚐魚肉本身嘅鮮甜味。同樣以沙律做配菜，為菜式增加清爽嘅感覺。
澳洲M9和牛西冷
節日慶祝又點少得鋸扒呢？！石燒方式供應嘅肉本身只作輕微調味，方便大家按喜好自行加味。澳洲M9和牛西冷嘅肉味比較濃，簡單以岩鹽調味，再將鹽用量由1/2茶匙減至1/8茶匙都依然足夠為牛肉提味。而且和牛油脂豐富，先煎香一角牛脂再煎扒，無需另加牛油提升香氣；再將附上嘅迷迭香、蒜片同京蔥呢啲天然香料一齊煎，就可以帶出唔同層次嘅肉香。
美國牛板翼
美國嘅牛肉都出名肉味濃郁，所以美國牛板翼都唔需要太多調味料，同樣轉用岩鹽，再將鹽量由1/2茶匙減至1/8茶匙，並配備蒜片同京蔥畀你煎扒時提香。
石燒巨型雞扒
牛肉之外，雞扒亦係鋸扒時受歡迎嘅選擇。石燒巨型雞扒都轉用岩鹽調味，而用量亦減少3/4。自行加工時先將附上嘅京蔥鋪喺雞皮上，煎至微微焦脆會令香氣更濃郁，咁就無需再落餐廳提供嘅岩鹽，只係加少量即磨黑胡椒就好夠味，最後食埋車厘茄解油膩就啱啱好喇。
* 資料由客戶提供
