天氣熱要食刨冰是常識吧？日本Pablo、Mister Dount同麥當勞嘅McCafe不約而同都喺六月推出新刨冰同冰沙，返鄉下...應該話去日本玩嘅話除咗小店之外又多幾個食冰選擇。不過邊間嘅冰最吸引？咁就要嚟睇下介紹啦！
Pablo 最「芝」味 芝士撻刨冰
Pablo最出名嘅就係佢地嘅芝士撻，就算平時出每月限定口味都係以芝士撻做主角。所以繼之前期間限定嘅宇治抹茶芝士撻刨冰之後，今次一口氣推出士多啤梨、芒果同朱古力芝士撻刨冰！
無論係水果味定係朱古力味嘅刨冰上面都加咗同芝士撻一樣嘅Cream Cheese，芝士控大愛！
發售日期：2016年6月1日至8月31日
發售分店：表参道店、ららぽーと立川立飛店、道頓堀店2階、神戸元町店、姫路店
Mister Donut 最多款 水果口味綿綿冰
以為Pablo有三款口味已經夠多？Mister Donut一次過出八款！
當中四款綿綿冰仲係加咗果汁，連埋果醬一齊食味道一定更濃郁。不過雖然話有八款口味，其實都係以芒果同士多啤梨為主，唔同款只係綿綿冰或者Topping嘅分別。另外亦有朱古力同白桃口味。有選擇恐懼症嘅朋友今次會唔會頭痛？
發售日期：2016年6月1日至8月下旬
發售分店：全日本Mister Donut分店（指定分店除外）
McCafe 最醒神 早晨乳酪冰沙
連McCafe都加入戰團賣清新嘅士多啤梨乳酪冰沙同熱情果乳酪冰沙，而且仲話係早餐嘅好選擇？
雖然食凍嘢做早餐好似唔係幾符合中國人養生嘅概念，不過無論係士多啤梨定係百香果都係香得嚟有酸酸甜甜嘅味道，加埋乳酪感覺更清新。就算唔係當早餐，行到攰飲返杯應該真係幾醒神嘅。
發售日期：2016年6月1日至6月下旬
發售分店：全日本McCafe分店
隨時接收最新資訊
讚好OpenRice專頁！