尖沙咀呢間新店，可以滿足大家想搵個地方放鬆下、影張偽出國打卡相，同享受精緻西日料理嘅三個願望啊！佔地約3,600平方呎，唔同區域有唔同裝修主題，好似中間放滿綠色植物係模仿緊日本嘅公園，後面仲有個榻榻米走廊。主打日式同西式Fusion輕食，用三層木盒奉上嘅Picnic Box同可以自己動手烘麵包嘅Toast Set最受歡迎。
餐廳內設有榻榻米座位，坐喺度食西日料理感覺更有儀式感！
MUTA Restaurant位於尖沙咀，係同區主打藝術甜品ATUM Restaurant嘅姐妹店，秉持求變、創新嘅理念，同時新店會更著重於打造一個感覺輕鬆悠閒、畀大家放空嘅空間。菜式絕不添加味精，而且以少鹽少油方式製作，盡量以昆布高湯等天然調味去提鮮。
Picnic Box（$428/2人用）
打卡首選係呢個以木盒送上嘅套餐！負責人阿邦笑指近年大家都無得去旅行，唔少人就轉而去行山或者野餐，所以就諗到呢個好有戶外野餐Feel嘅Picnic Box。唔少茶點都糅合日式元素，例如英式鬆餅除咗原味，仲會有綠茶、黃豆粉口味。
好似珠寶盒咁打開木盒後，係放滿三層嘅英式鬆餅配自家製果醬同精選鹹甜小點。茶點會定期更換款式，拍攝呢日嘅鹹點就有三文魚子吞拿魚最中餅、鵝肝慕斯最中餅、蟹肉伴柚子啫喱，甜點就有朱古力檸檬撻、焦糖杏仁撻、血桃撻、迷你布朗尼、馬卡龍同泡芙。
鵝肝慕斯最中餅、馬卡龍
雖然無特定次序，不過都建議可以先食兩款最中餅以免變腍，鵝肝慕斯最中餅最有驚喜，熊仔造型可愛加分，而且慕斯柔滑甘香令人回味。而三文魚子吞拿魚最中餅加咗柚子醬油調味，帶出鮮味又清爽。甜點平均水準都唔錯，特別係血桃撻嘅血桃相當香甜多汁。套餐亦包括日式玉米奶油湯或南瓜奶油開心果濃湯，鮮果汁或茶或咖啡。兩款濃湯都相當Creamy香甜，而鮮果汁更會以高腳杯奉上，打卡更搶鏡呀。
（前）季節鮮花甜蔬菜沙律/接骨木花（$108）
叫得西日輕食餐廳，當然有唔少輕食選擇，季節鮮花甜蔬菜沙律/接骨木花選用多款新鮮蔬菜，拍攝當日就有坊間少見嘅寶塔菜，配搭櫻桃蘿蔔、紅菜頭、蕃茄仔等蔬果同味道微酸嘅醬汁，清爽開胃。加上本地農場出產嘅可食用鮮花點綴，非常吸引。
富士蘋果/三文魚/柚子醋沙律（$118）
如果無肉不歡就可以點富士蘋果/三文魚/柚子醋沙律，以富士蘋果嘅爽甜同柚子醋嘅酸香平衡三文魚嘅油脂感，同時唔會蓋過其鮮味。分量十足，細食嘅女士當Light Meal完全無問題。
更多【新店直擊】： |
壽喜燒牛肉蛋汁意大利飯（$158）
主菜推介之一，顧名思義牛肉以日式壽喜燒醬汁煮過，微微甜味襯托出醬油鹹鮮同牛肉本身嘅肉香，識食當然係要篤穿生蛋黃撈埋一齊食，更滑溜更香口！另外值得一讃嘅係意大利飯係正宗帶米心、外軟內硬嘅口感。
軟奶油巧克力/大黃/紅桑莓（$88）
姐妹店ATUM Restaurant以招牌藝術甜品起家，呢度嘅甜品可想而知亦有水準。呢道軟奶油巧克力/大黃/紅桑莓就令人印象深刻，主角Chocolate Ganache口感厚滑，喺口腔融化後滿嘴濃郁可可香氣！配搭以大黃莖（紅西芹）同紅桑莓製作酸酸甜甜嘅醬汁，增添味道層次又平衡甜膩。
海鹽焦糖咖啡（$48）
未飲先聞到好夾嘅焦糖同咖啡香氣，咖啡選用Fruity Blend，所以入口微酸，之後係焦糖嘅苦甜同咖啡嘅香醇交織，口感順滑。
雲呢拿蘋果批茶（$46）
熱茶以茶壺奉上，紫紅色嘅雲呢拿蘋果批茶帶肉桂香同蘋果嘅微酸，無論香氣同味道都的確有還原到蘋果批呀。
餐廳負責人阿邦指新店理念係希望可以令大家嚟放鬆一下，因而從裝修到食物擺盤等都花咗唔少心機
MUTA Restaurant
地址：尖沙咀彌敦道132號美麗華廣場1期地庫B131號舖
文：Cathy.H
相、片：Wilfred Chui