旺角波鞋街附近最近新開一間Cafe，由三位八十後主理，唔單止畀個空間大家坐低嘆杯咖啡，仲希望成為一個香港人嘅「聚腳點」。食物方面首推自家製窩夫，裡面嘅黑糖麻糬夾心係亮點。新出嘅龍蝦全日早餐同天使金栗牛角酥都有驚喜！
 

八〇顧名思義係由八十後主理，其中一位老闆Raymond曾經喺唔同媒體任職記者，包括喺有線新聞做咗16年體育記者！後來轉行做飲食，最近同細佬、弟婦喺豉油街新開呢間Cafe。Raymond指希望呢間小店可以成為大家喺旺角嘅一個「休閒加油站」，可以同朋友一齊傾計；亦計劃將香港人嘅成長回憶帶返嚟，例如康樂棋、唧唧冰等元素。
 

加拿大龍蝦全日早餐（$158）

糅合香港人鍾意嘅海鮮同全日早餐兩大概念，主角當然係加拿大龍蝦，肉質彈牙而且夠多膏，，配搭蒜蓉帶起鮮甜味道！其他菜式都落足心思，炸薯波外脆內軟，有粒粒薯仔口感；焦糖香蕉取代一般嘅沙律，同其他食材夾得嚟之餘又有新鮮感；脆皮腸配自家調配醬汁，鹹辣惹味更開胃；連茄汁焗豆都特別加入炸意大利火腿，增添味道同口感層次。
 

另一特色係窩夫裡面有台灣黑糖麻糬！窩夫係以老闆們研究多次嘅秘方製作，外面香脆裡面鬆軟，而且就算放涼咗都保持到脆度。黑糖麻糬口感Q軟，黑糖香濃郁但唔會太甜，加上窩夫嘅雞蛋香唔會覺得膩。
 

地獄雞排窩夫（$78，下午茶時段供應）

地獄雞排即係辣味嘅炸雞扒咁解，雞胸肉炸至金黃香脆，配搭生菜、秘製醬汁、Sour Cream，同自家製黑糖麻糬窩夫。初入口會先食到炸雞嘅香脆同Sour Cream嘅微酸同奶香，辣勁之後先慢慢喺喉嚨滲出嚟！原來醬汁用咗墨西哥香料，辣度適中之餘又富辛香料香氣。同時食到炸雞嘅鹹、窩夫嘅甜、醬汁嘅辣、Sour Cream嘅酸，加上凍Sour Cream同熱辣辣炸雞窩夫嘅冷熱衝擊，無論味道定口感都好豐富。
 

天使金栗牛角酥（$78）

打卡甜品就有呢款天使金栗牛角酥，特別訂製機器將栗子蓉壓成一條條好似天使麵咁幼，舖喺雲呢拿雪糕同牛角酥上面，再加自家製焦糖蜂巢脆餅同糖粉點綴。栗子蓉係其中一位老闆自己用栗子壓成蓉，再加部分法國栗子蓉，前者係要新鮮嘅栗子味道，後者就取其甜度同香氣，所以食落有栗子香得嚟又有啲一粒粒嘅口感，而且唔會死甜。牛角酥係用牛角包麵團放喺窩夫機壓成，即係最近大熱嘅Croffle，食到層層酥皮好酥脆。
 

 

Dirty（$40）

House Blend咖啡係偏Nutty風味，Crema夠厚身所以好啱做Dirty。飲落有黑朱古力嘅微酸同甘味，亦有啲焦糖香。主理咖啡嘅Raymond亦透露因為細佬兩公婆好鍾意旅行，希望之後會將多啲唔同國家嘅元素加到飲品當中，例如另一推介椰奶咖啡Smoothie（$52）靈感就嚟自越南嘅椰子咖啡冰沙！
 

八〇
地址：旺角豉油街27號地舖

文、相：Cathy