香港嘅唎酒師唔算好多，甚至好多朋友連呢個名都未聽過。今日我哋有機會請到隱町嘅唎酒師Diana去介紹下呢個專業！

 如果對唎酒師呢個行業有興趣嘅朋友，可以喺「餐飲筍工」內揀「品酒師工」，踏出你哋嘅第一步啦。

問：唎酒師係做咩㗎？

答：我哋會先深入了解基本清酒同品酒知識，再為餐廳嘅客人推介清酒、講解清酒知識，細緻至安排適當嘅飲用溫度同酒杯畀客人享用清酒，都係我哋嘅職責。另外，我哋又會去日本同酒商接洽、試酒，協助酒商打入香港市場。

問：點解想做唎酒師？

答：我自己從事葡萄酒行業超過十年，但有次參觀日本酒藏嘅經歷令我對清酒嘅興趣大增。清酒嘅製法同其他任何酒類比較，係最複雜嘅。所以我希望自己成為唎酒師，透過專業資格去推廣清酒文化畀香港人。

問：一般唎酒師係點入行？而你自己又係點入行？

答：通常首先都必須要考到日本官方機構SSI（Sake Service Institute）相關課程同專業資格，先至叫做唎酒師嘅。而家香港日本餐飲業市場仍然缺乏專業資格嘅唎酒師，相信大家考到呢個資格之後，好容易會受聘。

至於我自己，一直以嚟都從事葡萄酒買賣，近三年先開始接觸日本酒。咁就順利成章推廣埋日本酒啦，開辦不同清酒會及講座。

問：咁入行以嚟，你最難忘嘅經歷係咩？

答：最難忘嗰次係我建議客人可以將一支清酒由凍飲開始飲到熱飲，隨住溫度嘅變化，會令酒嘅香氣都跟住變化，客人試過之後大讚，嗰種開心係非常滿足嘅，令我更加有動力去推廣清酒。

問：如果有人想入行做唎酒師，你會畀咩建議佢？

答：可以不妨參加多啲清酒品酒聚會，儘量去試更多口味嘅清酒，不斷學習同測試自己嘅味蕾，重點係可以講返品嚐過嘅清酒嘅口感，同埋配搭咩食物最適合，咁就成功咗一半喇。

OpenRice餐飲筍工專區，無論前線營運以至後勤部門，致力為各飲食及服務業界配對最啱你嘅工！(詳情按此)