平時食沙律係為咗清一清口腔，但呢份凱撒沙律有咁多炸蒜片喺面，似乎係想惹味開胃多啲喇。特別在原棵羅馬生菜上枱，自己鐘意食幾多就切幾多。炸蒜片唔油膩之餘，亦幫成碟沙律增加香味。
反而呢碟蒜頭番茄白酒汁煮藍青口睇落好溫和，但食落蒜蓉唔少，比凱撒沙律更辣！藍青口肉唔算大，但同番茄蒜頭醬非常夾，小心食下食下就食哂成碗。
嚟到蒜頭主題餐廳，又點會無蒜頭包供應呢？而且仲有三款任你揀。除咗原味蒜蓉包之外，仲有MFG 特色蒜蓉包塔：法包上先舖滿生蒜蓉，焗到金黃酥香之後再加紅椒粉。店員會幫食客將香辣蒜蓉壓到包心，再切開方便大家開心Share。
另外呢碟德古拉殺手，個名源自德古拉吸血鬼最怕嘅......蒜頭！原粒蒜頭加香料同橄欖油焗香，上碟時再配以切開咗嘅法包片。將蒜粒夾喺法包中間，食落蒜粒非常軟腍，輕輕一壓就已經變成鹹香誘人嘅蒜泥，有驚喜。
肉類嚟講，惹味蒜頭同肉味濃郁嘅牛肉最夾，所以呢間餐廳亦以牛扒做招牌菜。烤 MFG 招牌澳洲肉眼扒配蒜頭山當中嘅蒜頭山絕對童叟無欺，牛扒上面有50克生蒜蓉，上面再舖60克嘅炸蒜片，未計旁邊嘅蒜粒，單係蒜頭山已經有足足110克。但食落口，牛肉嘅嫩、蒜蓉嘅辣同炸蒜片嘅香恰到好處，唔會互相搶咗對方嘅味道。
唔食得辣，又想食蒜頭嘅朋友仔，就可以試下另一款招牌菜：蝦、菠蘿、炸蒜片 MFG 招牌意大利薄餅。薄身脆Pizza皮上面有香甜多汁嘅菠蘿，嚟中和炸蒜片嘅微辣，可以放心味道一啲都唔衝突。而且上枱時仲會加埋即刨巴馬臣芝士，突然間好似有韓劇飄雪效果咁浪漫。
相反如果想試重口味嘅，可以一試藍芝士野菌長通粉配香烤原個蒜頭，原個蒜頭特別選用韓國六瓣品種蒜頭，無咁辣同無咁嗆喉。店員會幫你用手將蒜肉擠出嚟，配埋香濃藍芝士汁，香上加香。
淨係品嘗蒜頭嘅香覺得唔夠喉？咁就要試埋招牌蒜片墨西哥辣椒炒意粉，唔好睇小醃漬過嘅墨西哥辣椒，初入口先食到蒜片嘅香辣，但墨西哥辣椒嘅辣勁會慢慢滲出嚟，after taste相當強勁！
完美嘅一餐以甜品完結，蒜頭香蕉朱古力醬薄餅配自家製雲呢嗱雪糕一樣係Pizza，不過今次配搭改為以香甜朱古力，配同樣甜美嘅蒜片。你無睇錯，呢道甜品上面嘅蒜片真係甜㗎，因為用糖水醃製，味道清甜之餘仲口感煙韌，同朱古力香蕉完全無違和感。
蒜頭全部嚟自韓國嚴選嘅慶尚南道昌寧郡，同慶尚北道義城郡嘅出品，因為昌寧郡蒜田含豐富磷酸及硫磺，所以蒜頭唔會太辣，但香味依然濃郁。蒜頭運到香港會用特製機器沖洗，再按菜式需要分別做成炸蒜片、原個焗蒜、糖漬蒜等11種食材。將蒜頭一種材料玩得咁出神入化，又的確係대박（tae bak，韓文嘅大發呀）嘅。
文：Kar，Cathy
隨時接收最新資訊
讚好OpenRice專頁！