一班好友相約聚會，如果有間氣氛悠閒、環境舒適、地點就腳、有嘢飲又有嘢食嘅餐廳就Perfect池？真係有！尖沙咀The Chop House呢間開咗無幾耐嘅扒房就符合哂以上要求！美國菜夠大份得嚟可以一齊開心Share，同時小食甜品又相當精緻，仲有室外座位可以飲返杯，咁至係Happy Gathering嘛。

先嚟一份沙律醒下胃，Chop Chop Salad with Grilled Prawns嘅大蝦口感彈牙，調味得宜嘅蜜糖芥末醬伴新鮮沙律菜，多汁嘅紅菜頭粒同香滑嘅羊奶芝士係Highlight！

小食方面，芝士控不妨嗌一份Roasted Chicken & Caramelized Onions Flat Bread做小食，爽色芝士舖面睇落已經好吸引，下面嘅雞肉同焦糖洋蔥減輕膩嘅感覺之餘又增加味道層次。

另外Mussels Mariniere亦係適合開心Share嘅Starter之選，青口肉質嫩滑又鮮甜，配白酒香草汁係無得輸嘅配搭。記得食埋中間吸收哂精華嘅西芹粒，清新甜美。

主菜就推介Slow Roasted Chicken & Smoked U.S. Baby Back Ribs，分量十足非常有美國菜嘅特色，大食嘅朋友可以切大份啲，想留肚食甜品嘅想輕嘗小小亦非常方便，因為無論係雞定豬都煮至軟身，用刀輕輕一切就可以輕易同人分享。雞肉嫩滑而豬肋骨惹味，而且一啲都唔油膩。

無飯不歡嘅仲可以點多份Garlic Prawns， 因為配嘅Saffron Rice充滿蒜香，加上帶少少辣同微酸嘅滋味，會令人忘記任何Keep Fit大計一啖接一啖咁不斷食。

完滿嘅一餐當然唔少得最後嘅甜品！尖沙咀分店獨有嘅Chocolate Fudge Cake有非常濃郁嘅朱古力蛋糕，配甜而不膩嘅雲呢嗱雪糕，細心一啲雪糕上面有一粒粒非常細嘅雲呢嗱籽，絕對唔係普通行貨。甜蜜由舌尖傳到大腦，大餐到此完全心滿意足。

當然開心時刻要好好把握！食完大餐想再繼續傾計談心可以飲返杯，餐廳位於尖沙咀商場當中，但都有個相當開揚悠閒嘅戶外用餐區，加上Drink Menu多元化得嚟仲有季節限定飲品，食完大餐想飲返杯就啱哂。美酒佳餚，一樂也。