疫症已經橫行咗超過一年，對我哋嘅日常生活當然有好多影響，亦改變咗大家唔少嘅習慣。不過即使喺疫情下，我哋都可以從新常態中，尋找趣味！年度盛事「OpenRice優秀開飯熱店大賞」即將開始接受投票喇，今年以「日嚐作樂」為主題，希望大家從每日品嚐到嘅美食中創造樂趣，從探索餐廳中感受香港「味」力。3月24號就開始可以一人一票投選你心目中嘅本土出色熱店！而喺未開始投票前，大家都可以先參與「有獎分享活動」，有機會贏取獎品總值超過30萬！想知點玩？記得睇到最尾！

平時戴住口罩已經好侷促，食飯梗係想搵啲空氣流通啲、地方大啲嘅餐廳，食都食得舒服啲吖！今次就會介紹五間餐廳，佢哋都係一啲空間感比較大嘅餐廳，比大家有返多啲私人空間嘅感覺，可以自在啲放鬆啲～
 

樓高兩層＋落地大玻璃  Gochi  

圖片：ahhbe、Joannakawai

兩層高、空間大、上層仲有落地大玻璃，聽到都覺得好吸引。樂富呢間西餐廳環境闊落，令到食客好容易就投入到自己同朋友嘅世界。提供日式西餐，佢哋嘅手工意粉口感彈牙，意粉醬都好Creamy嘅。餐廳招牌Tiramisu口感好滑，咖啡味濃郁，食過返尋味！
 

天台露天座位  蟲二

呢間咖啡室係開喺頂樓嘅，坐喺露天座位可以一邊曬下太陽、吹下風，一邊邊嘆下甜品。喺露天座位嘅區域仲有個吊住嘅藤籃，坐落去搖下搖下咁，都咪話唔寫意。主打日式料理，套餐以「一汁三菜」作為靈感，好似去咗日本咁。而招牌班戟口感鬆軟，裏面仲有煙韌麻糬，口感層次豐富。
 

3,380平方呎韓式素食餐廳  土生花

踏入餐廳，暖暖嘅燈光，闊落嘅環境，淺色為主嘅裝修，全部都令人哋感覺好放鬆。呢間韓式素食餐廳足足有3,380平方呎，環境寬敞，度度都係打卡位。餐廳旨在將新素食概念帶入香港，喺素食中加入韓國寺廟飲食文化，食客可以體驗不一樣嘅素食。
 

高樓底 ＋戶外座位 NOC Coffee Co

圖片：korala、sherryyu01

NOC Coffee Co喺香港已經足足開咗六間分店，而呢間紅磡分店特別嘅點就係佢哋嘅高樓底同埋勁IG-able嘅戶外座位！加上落地大玻璃，當陽光透入嚟，令咖啡店充滿暖意，配合埋高高樓底嘅設計，感覺好悠閒。咖啡店提供全日早餐同各種輕食，係一個放鬆嘅好地方～
 

5,500呎中菜館 夜上海

唔單止西餐廳，中菜館都可以裝修得好靚好有空間感。呢一間佔地5,500尺嘅中菜館樓高兩層，食客同其他客人距離遠，有種二人世界嘅感覺～仲可以邊食邊欣賞維港靚景。而佢哋風格、氛圍、裝飾擺設都充滿上海特色，古色古香。佢哋開業廿幾年嚟，合共獲得13粒米芝蓮星，食物當然有水準！

投票未正式開始前，您可以先分享一張與美食的快樂時刻😋到個人FB/IG (必須設定為公開)，加Hashtag #日嚐作樂 #OpenRice。完成整個投票活動後，即有機會贏取獎品總值超過30萬！

投票和獎品詳情將於3月24日正式公佈，密切期待：https://bit.ly/3bRsGaH
*活動須受條款及細則約束

文：Hailey
編：Cathy