各位識食嘅巴打應該都知道，想搵平靚正美食除咗留意地方小店之外，仲可以去街市嘅熟食中心尋寶！大埔墟街市就係其中一個好例子，無論係早午晚三餐，或者你係大胃王要食埋Brunch同下午茶，開飯仔都有好推介！
古早風味一盅兩件 林記點心
圖：Nata Wu
朝早先嗌返一盅兩件嘆下，一盅係指熱茶，而兩件就係點心。呢度嘅點心都係細細個上茶樓會搵到嘅款式：鵪鶉蛋燒賣、雞包仔、雞扎、蝦餃等，驚喜欠奉但經濟平實。想飽肚嘅話可以嗌呢度嘅蒸飯，用懷舊藍白花碗原碗蒸熱，當中以排骨飯最受歡迎，飯粒分明加上豬肉油香特別滋味。
Brunch無得輸西多 李記咖啡奶茶
Brunch就食西多士咁Heavy？無辦法，如果你三點三先嚟嘅話，好有可能已經賣哂無得食！佢地嘅西多士咁受歡迎，全因水準保持到。一上枱，已經切開9份嘅金黃色西多士賣相夠哂誘人，蛋香滲哂入件多士裡面，而且口感相當軟綿，有食家話好似食緊棉花糖咁！厚切多士無夾餡，不過就有得加糖漿或者煉奶。
平價蝦子雲吞撈麵 平記麵家
呢間麵店有唔少捧場客，一方面因為正如店名所言：平，Lunch食碗細蓉，即係雲吞麵$24就有交易。另一方面佢地嘅麵食的確有返咁上下水準，招牌雲吞細細粒但皮薄餡靚。而蝦子撈麵同樣無欺場，蝦子落得爽手，竹昇麵無一般麵店咁大鹼水味而且更煙韌，撈埋少少豬油夠哂香口。
邪惡炸醬豬扒麵 世記上海麵店
圖：keudrat
如果唔熟大埔呢區嘅朋友仔，可能都想問一句「既生瑜何生亮」，因為同一個熟食市場就有另一檔同樣買炸豬扒嘅東記，不過如果係熟客嘅話就會知道其實兩檔老闆係親兄弟，兄弟檔拍住上搵食至真。世記嘅炸豬扒一樣係同湯麵分開上，炸到金黃香脆，不過比東記就少一股豬油香。但勝在炸醬夠惹味，配上海粗麵一流。
搶手茶果缽仔糕 有記茶果
食完晏，不妨去埋呢間茶果店買埋缽仔糕做下午茶。呢度嘅缽仔糕得黃糖版本，不過有唔少紅豆粒，有唔少街坊都係老主顧。不過要注意嘅係佢地嘅缽仔糕比較淋身，鐘情彈牙口感嘅朋友就未必鐘意啦。另外仲有客家茶果，黑芝麻茶果賣相認真一般，不過食落黑芝麻同花生香兼具，難怪貨如輪轉。
心機八味鳳爪 強記鳳爪
圖：西打哥
多謝為食友報料，下午茶仲有呢檔鳳爪揀！檔仔主要賣鹵水鳳爪同齋滷味，最受歡迎嘅當然係招牌鳳爪，全部都浸過滷水入味，唔單止有無骨同有骨兩個選擇，而且調味仲有白雲、沙薑、泰式、魚露、香辣、黑椒、麻辣同酸甜八款任揀！另外雞翼尖同雞膝頭都係推介，有心想試嘅建議平日下晝6:30前去買。
街坊價清湯腩 鴻發牛什魚蛋專家
講到喺大埔食牛腩，第一時間當然係諗起群記清湯腩，不過如果咁啱遇到佢地無開，又或者Tea Time先去到發現已經賣哂嘅話，不妨嚟呢度碰下運氣，而且價錢更相宜。牛腩分量夠多，肥瘦均稱而且軟腍無渣。牛雜亦相當出色，牛肚，牛肺、牛膀同牛腸鋪滿碗面，全部都入味又唔過腍，值得一試。
那些年嘅魚蛋粉 欽記粉麵
有食家形容呢間小店相當有性格，皆因開業過半世紀都只賣魚蛋粉：五粒手打白魚蛋、三塊魚片加兩件炸魚皮，係咁多。食客最多有得揀要河粉、幼麵、米粉定鴛鴦（呢度嘅鴛鴦唔係咖啡加奶茶，而係河粉加幼麵）。主角手打魚蛋細細粒白雪雪，一啖一粒爽彈得嚟又有魚味。早去嘅話仲有得嗌厚皮，即係厚身嘅炸魚皮，唔怕畀湯浸淋。
小炒海鮮一樣掂 伍仔記
呢個熟食市場當中，就以呢間小炒店最受歡迎，一開始先嚟碟伍仔記冷盤，其實即係冰鎮苦瓜、生腸頭、鱔片同齋鮑片，最難得嘅係佢地嘅苦瓜多汁得嚟唔太苦。之後就可以嗌佢地嘅各式小炒，鐘意食海鮮嘅仲可以買埋海鮮畀佢地，加工費唔算非常平，但的確有屋企廚房炒唔出嚟嘅鑊氣。
照顧埋各位女士嘅甜品胃，雖然熟食中心無乜甜品選擇，不過附近就有買最近大熱腐竹雪糕嘅樹記腐竹全駿記，同就算唔係大埔街坊都會聽過嘅亞婆豆腐花。最後，如果想食宵夜嘅話，呢篇大埔宵夜介紹啱就攞去用，唔洗還。
開飯編輯推介：
1. 【專訪】有故事的Man 手紋母親心電圖 以上門私房菜延續愛
2. 11月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！