如果你以為香港嘅熟食中心嘅餐廳種類選擇唔多嘅話，少年你太年輕了。上環市政大廈嘅熟食中心就係例子之一，其實除咗港式經典一盅兩件同茶記樽仔奶茶，仲有最「潮」打冷、泰式咖喱，同日本人主理嘅定食！早午晚想食邊款得，甚至同朋友一齊嗌多幾款都得！
街坊自助茶樓 利香茶居
圖：糖小妹
朝早嚟呢間茶樓特別醒神，皆因呢度無姐姐幫你落單，想食咩點心都要自己出去，打開蒸籠自己搵。甚至如果你喺星期日或公眾假期嚟嘅話，連茶都要自己沖！不過煎炸點心都係即叫即整嘅，推介佢地嘅香煎芋絲糕，因為係真·芋絲，食到啖啖香口芋頭肉。夜晚嚟就可以改食特色雞煲，仲要係大胃王最愛嘅任食形式！
水準潮州打冷 聯興潮州飯店
夜晚想嗌幾碟小菜送啤酒嘅話，潮州打冷係其中一個好選擇。呢間嘅鹵水唔錯，包括唔係周街都有嘅鹵水鵝肝、鹵水雜拼等都係推介，前者口感非常Creamy後者勝在大堆頭，重點係鹵水味道夠濃又帶少少酒香。另一街坊推介係沙爹牛河，河粉夠乾身但沙爹汁濃稠度啱啱好。嗌多碟凍烏頭或者韭菜豬紅就Perfect喇。
經典樽仔奶茶+多士 瑞記咖啡
就算瑞記呢個名你無乜印象，但一講到樽仔奶茶你就一定會記得。港式茶記經典凍奶茶先沖好，唔加任何冰放入窄身玻璃樽雪一晚，所以飲起嚟夠凍但又唔怕被冰水沖到淡茂茂，不過甜度已經校好無得揀少甜。另外煎西多士配煉奶、足料蛋牛包同名副其實嘅鮮牛麵都係唔少食家嘅推介。
惹味泰式咖喱 泰之味
圖：浪子 夜默
三五知己想「啤啤佢」，仲有呢間泰式料理，最啱送啤酒嘅應該係佢地嘅咖喱，以紅、黃、青三款咖喱為主，可以自己揀牛、雞、豬或海鮮，有種茶餐廳任搭嘅靈活性。紅咖喱顏色同辣味都相當豐富，黃咖喱就比較接近香港人食開嘅普通咖喱，而青咖喱唔太辣以椰奶香味取勝。蝦醬炒飯、泰式豬手同泰式飛天通菜都可以一試。
最啱送飯小菜 棟記飯店
就算唔下下送啤酒，咁送飯都總要兩道惹味小菜嘅。呢間飯店嘅招牌之一鹽焗烏頭原條上夠霸氣，可以放心嘅係魚肉已經焗到骨肉分離，非常易夾而口感保持少少濕潤。土魷蒸肉餅就夠多肥豬肉同土魷粒，啱哂特別鬆軟或者香口嘅為食友。仲有泰式豬頸肉、霸王雞等小菜，同魚香茄子煲、啫啫滑雞煲等熱辣辣煲仔菜選擇。
日本大廚定食 家和熟燒
呢間店就咁睇招牌已經唔太似日本料理店，但更令人驚喜嘅係老闆兼大廚都係日本人！雖然食物賣相同環境就係一般熟食中心水準，但味道就毫不輸洩！唔少人會Lunch Time嚟食佢地嘅定食，咖哩豬排飯跟返日本風格，咖喱汁偏甜好開胃。燒魚定食嘅燒魚火候掌握得啱啱好，唔係即叫即燒不過都Keep到皮脆肉滑。
文：Cathy
開飯編輯推介：
2. 12月份好評餐廳十強
熱門文章推介：
隨時接收最新資訊
讚好OpenRice專頁！