對於更生人士，可能你同我都好陌生，其實佢哋就生活喺我哋身邊，一齊喺香港社會奮鬥。但佢哋面對嘅困難、壓力，真係比我哋想像中大得多。住屋、工作同生活所有細節都要重新嚟過，喺等待社會重新接納佢哋嘅過程中，有人伸出援手幫一把，意義真係好大。

「甦爐」門外有多款包點選擇，亦有堂食座位坐低慢慢食。

除咗包點，店內仲有熱食、甜品同飲品揀。

靠自己　重新出發

「甦爐」麵包舖，正正就係更生人士重投社會嘅踏腳石，為佢哋提供工作機會，由零開始學做麵包師傅，亦幫手研發新食品、營運店舖，同時幫手製作美食到會，個人或團體都可以向佢哋訂到會服務㗎，仲會配合客人要求自製小食。喺工作過程學一技之長，日後就可以靠自己雙手打拼將來。

懷舊唐餅　新鮮蛋撻

「甦爐」設喺柴灣興民邨，係一個好多公公婆婆住嘅地方，所以店家以傳統包點同唐餅為主－蛋撻、菠蘿包、芝麻餅同合桃酥等，由麵包師傅教導下慢慢學整。從零開始，至而家靠自己焗到一盤盤新鮮包點出爐，其實都好有滿足感。

包點櫃好有懷舊感覺。

留意返，蛋撻每日9:30、11:30、14:30同16:30新鮮出爐。

有好多款唐餅揀，而家真係買少見少。

全部包點日日新鮮焗製㗎！

店家配合　逐步適應社會

更生人士剛重踏社會，最先要解決就係生活費問題，所以店家亦為佢哋安排即日出糧，為佢哋解燃眉之急。直至生活重上軌道，就慢慢安排由兩星期出糧，再發展至普遍嘅一個月出糧，等佢哋逐步適應社會步伐。

「甦爐」畀佢哋機會，從零學做麵包師傳。

想為佢哋打氣　去灣仔美食博覽啦　

如果你想試吓佢哋嘅手勢，順便為他們打氣， 8月可以去灣仔香港會議展覽中心舉行嘅美食博覽社企攤位(1E展覽廳A18號)喇，到時仲有其他社企擺檔㗎。喺首兩日(即8月15至16日)於社企攤位買夠一定金額，仲有精美紀念品送𠻹！(紀念品數量有限，送完即止)

傳統唐餅　手製月餅

「甦爐」會喺美食博覽開賣自製芝麻餅、曲奇、合桃酥、光酥餅等，呢啲舊式唐餅好少機會食到喇，一齊回味吓懷舊味道啦。店家仲特別為嚟緊中秋節，新推自製「迷你脆皮奶黃月餅」，餡料軟滑，幾好食㗎！

芝麻餅又脆又香。

鬆脆合桃酥。

仲有曲奇餅、光酥餅同馬仔等，好多舊式唐餅令人好懷念呀。

迷你脆皮奶黃月餅，預早買定手製月餅過中秋啦！

香港貿發局美食博覽 2019

日期：2019年8月15至19日 （星期四至星期一）

時間：10:00至22:00（8月15至18日）、10:00至18:00（8月19日）

地點：灣仔港灣道1號香港會議展覽中心

社企攤位：1E展覽廳A18號