今年聖誕想過得更有意義？一班朋友準備開 Party 但煩惱緊食咩好？今次為大家介紹三間社會企業推出嘅聖誕到會，由單點美食到 50 人嘅大型套餐，選擇應有盡有。慳返準備時間、一同品嘗美食，仲可以幫助弱勢社群，一舉三得。
 

銀杏館 聖誕到會美食套餐  必食蜜桃 BBQ 燒豬仔骨

銀杏館聖誕到會美食套餐有多國料理選擇

銀杏館可以話係香港首批推出到會服務嘅社企之一，有 20 年餐飲經驗。加上作為一間支持長者就業嘅社企，今次聖誕到會美食套餐都由有多年經驗嘅老師傅主理，質素更有保證！套餐由 4-6 人、8-10 人、15-20 人，到 40-50 人都有得揀，加上全港送貨服務，無論係一家人開細 Party，定係公司搞大 Party 都好啱！
 

蜜桃 BBQ 燒豬仔骨

多款盆裝美食亦可以單點，任意配搭、彈性更高。必試之選係銀杏館太古店廚師研發嘅蜜桃 BBQ 燒豬仔骨，顧名思義係用蜜桃結合烤肉醬，令醬汁帶天然果香同甜味，用嚟醃豬仔骨更可以中和豬肉嘅油膩感。呢道烤至外層金黃，入口肉質軟嫩嘅蜜桃 BBQ 燒豬仔骨，絕對係大人小朋友都會鍾意。
 

（左）原隻聖誕燒雞跟配菜及金巴利汁，（右）西班牙海風帶子蝦仁車厘茄雜菜

其他精選菜式包括聖誕必備嘅原隻聖誕火雞跟配菜及金巴利汁，味道香濃嘅招牌法式紅酒雜菜燴牛肋肉，同海鮮控必試嘅西班牙海風帶子蝦仁車厘茄雜菜。如果 Party 有素食者參加，銀杏館亦有法式黑松露野菌炒時蔬、特濃蕃茄香草素肉醬三色雜菜扁意粉等素食可以加點。
 

（左）法式黑松露野菌炒時蔬（素），（右）金光蒜香煙肉南瓜炒長通粉

銀杏館於 2003 年成立，係香港首間策動長者就業嘅機構，為長者提供就業機會，業務多元化，包括餐飲到會、餐館、食品製造、烘焙、有機農莊、長者樂隊、銀髮士多及長者就業中介服務。
 

銀杏館
訂購網站：https://bit.ly/3ucWXMw
截止日期：12 月 29 日 （需至少 4-5 個工作天前預訂）
送貨詳情：訂購滿 $5,000 新界／九龍／港島免地面交收運費（偏遠地區除外），可到火炭工場（新界沙田火炭坳背灣街 38-40 號 11 樓 15 室）免費取貨
查詢及聯絡方法：WhatsApp：5117 7695／9062 7721，電話：8209 3088
 

樂「膳」堂營養膳食中心 聖誕派對美食  冬至軟餐盛盒九宮格

樂「膳」堂營養膳食中心聖誕派對美食有唔同人數嘅派對套餐選擇

12 月大家除咗共聚慶祝聖誕節外，仲有冬至呢個傳統重要節慶！因此樂「膳」堂營養膳食中心今年除咗提供聖誕派對美食到會，更特別同耆艦店聯乘，推出冬至軟餐盛盒。而聖誕派對美食，有 8-10 人、10-15 人及 15-20 人嘅派對套餐選擇，到土瓜灣工場自取更可享 9 折及 250ml 紙包飲品送𠻹！
 

（左）中式點心拼盤，（右）香脆牛角包

派對到會提供多款中、西美食，例如中式點心拼盤（山竹牛肉、潮州粉果及魚肉燒賣）、香草雞扒、Party 必食雞中翼、地道風味嘅咖喱魚蛋、香脆牛角包等，方便一人一件一齊分享。樂「膳」堂營養膳食中心更請嚟註冊營養師擔任顧問，為膳食提供營養諮詢並設計餐單，確保膳食質素！想食健康啲，亦有沙律、炒雜菜、焗時蔬等選擇。
 

到會美食中，亦有以蔬菜為主嘅至「營」推介

至於冬至軟餐盛盒，就係特別為有咀嚼或吞嚥困難嘅長者而設。每一道都經過精心擺盤同選材，節慶氣氛濃厚！例如鴻運當頭紅豆麵包、象征年年有餘嘅日式燒汁烤魚。加上全部使用日本 Marhua Nichiro 素材，通過 UDF 3 可用舌頭壓碎級別嘅認証，咁長者都可以喺冬至過節時開心品嚐美食啦！
 

冬至期間限定軟餐盛盒九道菜餚

九龍樂善堂於 1880 年創辦，並於 2013 年獲民政事務署「伙伴倡自強」計劃撥款資助，開辦社企項目：樂「膳」堂營養膳食中心，提供多元化膳食服務，包括為長者及有需要人士提供營養餐送遞服務，為上班族提供至「營」飯餐外賣服務，為企業、團體、學校提供節日到會服務等，亦為區內低技術嘅青年人及中年人士提供就業及培訓機會。
 

樂「膳」堂營養膳食中心
到會訂購、查詢及聯絡方法：WhatsApp：9883 1343，電話：2334 5009，電郵：meal@loksintong.org 
軟餐訂購：https://caramall.hk/mitfa002.html
截止日期：12 月 31 日 （需至少 2 星期前預訂）
送貨詳情：詳情請與社企聯絡，到土瓜灣工場（九龍土瓜灣美華工業中心 11 樓 A 座 16 室）取貨可享 9 折
 

良膳廚坊 聖誕節美食到會  新推出蒜子牛肝菌雜菌忌廉燴雞

蒜子牛肝菌雜菌忌廉燴雞

良膳廚坊今年亦再度推出聖誕節美食到會，六款套餐由四至三十人都適用，絕對係家庭、學校、教會或者公司開聖誕 Party 嘅好幫手！為咗要照顧唔同年齡層客人嘅喜好，佢哋一直努力推陳出新，研發新菜式。今年嘅新菜式推介就係蒜子牛肝菌雜菌忌廉燴雞！特別加入香氣馥郁嘅牛肝菌，單係聞到都忍唔住開始流口水啦。
 

（左）香甜柚子蜜焗雞翼鎚，（右）千島蜜桃煙鴨胸雜果螺絲麵沙津

香甜柚子蜜焗雞翼鎚亦係今年新出嘅菜式，以柚子蜜增添清新香氣，提升雞翼味道嘅層次。而千島蜜桃煙鴨胸雜果螺絲麵沙津就加入蜜桃果肉，一樣係清爽之選。佢哋嘅魔鬼麻辣雞中翼亦好受歡迎，魔鬼麻辣聽落有少少恐怖，不過可以放心，其實辣度唔會太高，反而麻感就真係幾明顯，最啱鍾意刺激嘅朋友仔。
 

（左）魔鬼麻辣雞中翼，（右）龍蝦忌廉汁雜錦海鮮飯

良膳廚坊嘅出品都係以少鹽少油為準則，希望大家食得開心又健康。除咗聖誕節美食到會，今年佢哋亦再度推出聖誕薑餅人禮盒同聖誕雜錦曲奇禮盒！薑餅人禮盒共有六件薑餅人曲奇，雜錦曲奇禮盒就有六件朱古力味、燕麥味、綠茶味及雜果仁味曲奇，全部由良膳廚坊嘅婦女全人手製作、獨立包裝，最啱送畀朋友，或者交換禮物呀。
 

（左）雜錦香腸拼盤配甜酸椰菜及橄欖，（右）日式炭燒雞肉串

良膳廚坊喺透過提供餐飲到會服務、學校午膳供應、企業及團體餐膳、盤菜及烘焙等製作，為弱勢社群提供工作機會及在職培訓，讓佢哋提升自信、回饋社會，體現助人自助嘅精神。
 

良膳廚坊
訂購網站：https://fantastickitchen.store/  
截止日期：需至少 5 個工作天前預訂
送貨詳情：套餐已包括新界、九龍區及港島區運輸費（只包括貨到客人於車上自行取貨）
查詢及聯絡方法：WhatsApp： 6761 6438，電話：2466 9800，電郵：sefk@fmchkssd.org
 

想知多啲社企有咩聖誕美食同禮品? 即刻 Click 入 www.sehk.gov.hk/tc/xmas.php 睇吓啦，即使係小小嘅禮物，都可以有大大嘅意義！支持社企，你我建樹！