母親節仲未諗到同媽媽去邊度食飯慶祝？不如帶媽媽去社企餐廳啦！現時好多社企餐廳為弱勢社群提供培訓同就業機會，協助佢哋投身社會，就好似媽媽咁勞心勞力，照顧同埋孕育佢哋嘅仔女一樣。以下介紹嘅3間社企餐廳，特別喺母親節推出應節餐飲、購物優惠，等大家同媽媽慶祝之餘同時支持社企，過個更有意義嘅母親節。

生生餐廳 優惠價嘆母親節晚市西式套餐

喺灣仔開業6年嘅生生餐廳，佔地4,000多呎，環境雅致，主打西式料理。為慶祝母親節，生生餐廳會喺5月3日至8日期間推出「頌親恩4人晚餐」（優惠價$1,388｜原價$1,788）。

餐廳一直嚴選食材同醬汁配搭，以帶出食物嘅鮮味。「頌親恩4人晚餐」有5道菜式，包括頭盤、沙律、餐湯、主菜及甜品。頭盤2揀1 ，可揀香煎鴨肝配意大利黑醋汁或甜薯蓉焗法式田螺；然後以紅菜頭蘋果沙律清一清味蕾，就可以品嘗熱辣辣嘅香濃蘑菇忌廉湯配香脆蒜蓉包。

頌親恩4人晚餐主菜之一，可選1/4隻西班牙乳豬

左：威靈頓牛柳配紅酒燒汁｜右：香煎紐西蘭羊扒配芥末籽燒汁

主菜則可以喺4款之中揀2款，其中包括招牌菜西班牙香烤乳豬配黃梅甜燒汁，以及香煎紐西蘭羊扒配芥末籽燒汁；鍾意食牛嘅話，亦可以揀由英國28日熟成牛柳製作嘅威靈頓牛柳配紅酒燒汁。如果媽媽鍾意食清淡啲，就可以揀煎原條紐西蘭龍利魚配牛油檸檬汁。最後食埋朱古力心太軟伴雲呢拿雪糕，包保媽媽甜到入心。

餐廳由「生生慈善基金」成立，為年輕嘅更生人士、特殊學習需要嘅學生、邊緣青年等提供餐飲業培訓同實戰機會，等佢哋可以喺過程中發掘個人專長，活出多采人生。過往有學員培訓時被發現入廚天賦，之後更前往香港中華廚藝學院或外地深造𠻹。

生生餐廳
地址: 灣仔交加街7B囍匯5座1樓

so330 母親節限定養生定食+購物優惠

同樣位於灣仔嘅社企咖啡店so330，今年都推出咗健康養生嘅母親節「食養料理」。「食養料理」係想傳達「身土不二、一物全物、細味咀嚼」嘅概念。透過提倡食用本地種植嘅農作物，可以更配合我哋身體嘅能量，同時支持永續環境。呢種餐飲文化喺日本已經好流行。今次母親節so330 特別悉心準備咗有機南瓜釀雜穀定食，當中採用本地南瓜、健康雜穀同傳統方法釀造嘅調味料，天然又滋養身心。其他輕盈嘅葷素菜式，部分更由自家工場製作，例如甜品杯、芝士蛋糕、醬料等。加上餐廳環境優美，擺放咗好多綠色盆栽、部分座位又以竹簾相間，配合高樓底，為咖啡店塑造出日式嘅寧靜氛圍，啱晒慰勞媽媽兼打卡。

食養料理之一：有機南瓜釀雜穀定食

店家自己種植洛神花製作茶飲

5月凡惠顧指定「食養料理」套餐，so330仲會免費請你飲「有機洛神花桂圓有機蜜」熱飲1杯𠻹。

有機椰子花糖Family Farm Organics

餐廳嘅營運機構更自設農場，店內亦會賣有機食物，用餐後可以買返啲同媽媽返屋企一齊嘆下。今個5月凡消費滿HK$200，可獲贈「有機椰子花糖」1包，呢款純天然糖採摘自印度嘅野生椰子樹花蜜，略帶焦糖風味，連糖尿病患者同素食人士都啱食㗎。

so330咖啡店由新生精神康復會營運，主要幫助精神病康復者，以及弱勢人士、受情緒困擾嘅青年等，為佢哋提供訓練同工作機會。店內員工有50%係精神病康復者，過半數員工更從認受性高嘅「英國咖啡調配師課程」畢業，具有專業咖啡師資格。so330咖啡店製作健康美食，同時強調健康咖啡、身心靈空間及共融嘅概念，推廣關愛共融及身心靈健康。

so330
地址: 灣仔太原街38號太源閣地下A-C號舖

Coffee Bunnies 輕食Cafe新出咖啡掛耳包

如果媽媽好鍾意嘆咖啡，咁就一定要喺母親節帶佢去位於大坑嘅Coffee Bunnies啦！
話明叫Coffee Bunnies，呢間Cafe就係由一班有志成為咖啡師嘅青年人，好似兔仔喺大自然周圍走一樣，由一部流動咖啡單車開始發展。單車上放有沖調咖啡嘅工具、各式咖啡豆、咖啡掛耳包等，讓呢班青少年可以踩住呢部單車，去到邊沖到邊。佢哋最近喺大坑開咗Coffee Bunnies實體店，希望透過實體店舖營運及經驗，讓青年人可以發揮潛能，並為自己未來定下方向 。如果青年人發現自己有志成為專業咖啡師，機構會安排合適課程畀佢哋讀。而依家無論喺店內工作、為社區人士舉辦沖咖啡工作坊、抑或負責咖啡到會服務嘅青年人，正正就係課程訓練出嚟嘅咖啡師。

Cafe以灰色為主調，環境開揚，畀人一種悠閒嘅感覺，最啱母親節同媽媽一齊嚟chill下。Cafe主要提供輕食同甜品，例如牛油果煙燻三文魚多士、蘑菇多士、無花果曲奇、Cream Puffs等，好啱行街後食少少嘢唞下放鬆身心。呢度不時開設咖啡工作坊，亦即將開設網店，等大家方便啲買到佢哋新出嘅咖啡包。

如果媽媽平日鍾意喺屋企沖返杯咖啡飲下，不妨買啲Coffee Bunnies最新推出嘅咖啡掛耳包啦。佢哋嘅咖啡掛耳包全部真空包裝，合共有4款口味，產地、烘焙度同甜度都唔同，全部都有手沖咖啡效果，適合唔同口味嘅媽媽。

蘑菇多士｜圖：餐廳（FB）

Coffee Bunnies
地址: 大坑施弼街6-7號地下B號舖