即將又到一年一度嘅美食博覽，今年係第30屆，分公眾館、尊貴美食區同貿易館三個部分。單係公眾館就有接近600間參展商！咁多攤檔行唔晒，不如參考下我哋嘅攻略，先嚟介紹大家每年都最關心嘅：$1優惠！
 

$1任扒花膠扒　安記海味（1C-A10）

優惠：第一日（15/8）頭10位喺場外排隊購票進場嘅人士，可以用$1參加「花膠扒．扒花膠」，有成100斤花膠！將花膠放入2米長花膠池，參賽者要分成兩隊，一人負責扒出池內花膠，另一人負責接扒出嚟嘅花膠，每隊都可以獲得相等重量嘅花膠，嬴嘅隊伍可額外獲得一斤花膠。
 

$1任夾鮑魚罐頭　華泰海產貿易有限公司（1E-E02）

優惠：第一日（15/8）頭5位，可以以$1，15秒內用夾任夾唔同款式嘅鮑魚罐頭，罐頭價錢最高價值$850/罐！
 

$1/30件雞　Rankingdak（1A-E20）

優惠：頭三日（15-17/8）每日頭5位，可以用$1購買30 件雞胸肉產品（只限於指定Loveeat Soft 嫩滑雞胸），總值$900。
 

$1 雙星盈月流心月餅　鴻星食品（1C-D10）

優惠：第一日（15/8）可以用$1購買一盒雙星盈月流心月餅，限量50盒。
 

$1 盡情擸擸擸　歐洲食品有限公司（1B-C10）

優惠：每日最早排隊5位入場人士，可以用$1參加「盡情擸擸擸」，戴住指定特大手套10秒任擸幾十款唔同產品，擸到幾多就得到幾多！產品有成幾十款，當中西班牙愛比素竹蜜糖、意大利馬素尼松露醬等都係單價比較高嘅，法國金樂絲薄脆都好受歡迎。
 

$1 盡情啜啜啜　嘉心思亞洲有限公司（1B-C27）

優惠：頭四日（15-18/8）每日11:00起頭4位位到攤位嘅客人，可以用$1參加「盡情啜啜啜」，二人同時進行並限時30秒。用設置好嘅膠管啜烏龍茶（每條膠管定必經過徹底消毒及清洗，絕不循環使用），飲到每10毫升可抱走1支500ml冷山茶王蜂蜜綠茶。
 

$1黑松露福袋　四海環球食品有限公司（1A-E28）

優惠：每日10:00開始頭10名顧客，可以用$1買到黑松露福袋，裡面有黑松露魚皮餃、黑松露包心魚丸、黑松露炸魚皮各一包。
 

$1/粒原粒黑松露　 Dolce Dolce Kitchen & Gourmet（3B-C08）

優惠：每日10:00開始，可以用$1買到原粒黑松露。每日限10粒。或購買兩盒月餅，其中一盒係松露奶黃月嘅話，亦可獲贈原粒黑松露一粒。
 

$1/盒芒果糯米飯·榴槤糯米飯　金京發現有限公司（1A-B24）

優惠：$1買到一盒凍乾芒果糯米飯，或凍乾榴槤糯米飯，每日限30位。
 

$1/10粒魚蓉燒賣　陳記食品有限公司（1B-A21）

優惠：第一日（15/8）頭100位客人可以用$1買到一盒魚蓉燒賣（10粒裝），每人限買一盒。
 

$1/隻鮑魚　合泰海產貿易有限公司（1D-A28）

優惠：每日10:00同18:00開始，首60位客人可以用$1買一隻即食鮑魚。之後就係試食價$10/隻。
 

$1/包黑松露薯片　義生洋行（3B-C14）

優惠：每日12:00開始，可以用$1買樂其雅牌黑松露薯片（100g）一包，每日限量20包。

第30屆美食博覽
活動日期：2019年8月15至19日
地址：香港島灣仔博覽道1號香港會議展覽中心
購票指南及其他詳情：香港貿發局美食博覽

文：Cathy、Yanica
相、片：Tom、Cathy