新年期間大魚大肉，而家不妨食返啲少鹽少糖嘅清潤料理平衡下。今次介紹呢9間參加咗少鹽少糖食店計劃嘅中菜館，以各式時蔬炮製健康粵菜，配搭肉類、海味都畀人清新嘅感覺，大人小朋友都啱食。
家常豆腐
中菜好多時會用生抽同老抽調味兼令餸菜上色，而呢道家常豆腐只需用少少就夠，無需額外加糖同鹽，皆因用薑米起鑊，而肉片、小棠菜、冬筍片、青紅椒、雲耳、冬菇伴自家炸嘅豆腐同炒，香甜又爽口，一次過品嚐晒各種食材嘅鮮味同口感。
炒田園菜
顏色豐富嘅炒田園菜，用上萵筍片、甘筍片、蓮藕片同紫椰菜，蓮藕片重切成花形𠻹。當中萵筍、甘筍本身甜味突出， 又以天然嘅薑米起鑊增加香氣，所以糖同鹽嘅用量減少1/3，反而能夠品嚐蔬菜天然甜味。
鮮腐竹雞毛菜
雞毛菜又名小棠菜，入口爽甜，而新鮮枝竹則充滿豆香，用薑米起鑊炒香後，只需1克糖同鹽提味已經足夠，係一道清新健康嘅素食。
尖沙咀分店
茶樹菇銀線小豆苗
用清潤嘅上湯浸煮蔬菜，可以突出食材嘅天然甜味，加上小豆苗、銀芽、茶樹菇散發蔬菜嘅甜味同菇菌香氣，即使減少1/4糖、鹽嘅用量，味道層次依然好豐富。
芋頭南瓜茨實煲
呢個煲將南瓜、芋頭、百合同茨實一齊燘煮，迫出瓜果嘅香氣，而南瓜同芋頭本身甜度較高，鹽用量減少1/4亦不失風味，食落飽肚又有咬口。
如意竹笙豆腐
新年梗係嗌道好意頭嘅菜式啦！如意竹笙豆腐嘅如意，即係菌類食材榆耳，加埋爽口嘅竹笙、豆腐同香菇一齊用水燘煮至收乾水就可以，而且無需添加油、糖、鹽，入口清新潤喉。
美心皇宮（中環大會堂、沙田）、八月花（九龍塘、東涌）、翠園（尖沙咀、太古）
尖沙咀星光行翠園
花膠絲瑤柱泡菜苗
傳統粵菜嘅花膠扒夠晒貴氣，但一班人食難啲share，呢道花膠絲瑤柱泡菜苗則較方便。鹹香嘅花膠絲同碎瑤柱配翡翠苗，再以用雞肉、豬肉同豬骨猛火熬煮4個鐘嘅奶湯浸煮，鹽同糖嘅用量分別減少1/3都好夠味！
生拆海蝦炒滑蛋
唔少人都鍾意蛋料理，呢味炒滑蛋用上大量蛋液，而新鮮生拆嘅活海蝦肉，爽口又帶鹹味，以減少1/3分量嘅鹽同糖快炒，鑊氣十足，再灑上蔥花更加色香味俱全，食完更寓意來年笑哈哈。
米湯雲耳浸菜遠
大餐中不妨食啲正氣嘅菜心平衡下，餐廳選用鮮嫩嘅菜遠部位，配搭爽口雲耳、甜甜地嘅杞子用粥水浸熟注入米香，鹽、糖用量減少約1/3已達到提味效果，入口好清爽㗎。
