又到年尾聖誕，當然要食返餐好慰勞吓辛苦咗一年嘅自己！今年每間酒店嘅聖誕自助餐都好精彩，快啲bookmark約埋家人朋友去食啦～

松露主題奢華節日自助餐 嶼坊  

餐廳今年推出咗以松露為主題嘅奢華節日自助餐，真係勁吸引！晚餐限定現煮車輪巴馬臣芝士蟹肉意大利麵，廚師將車輪形意大利麵拌上濃郁嘅巴馬臣芝士，加入鮮甜蟹肉，再灑上少少松露油提香，每一啖都係芝士嘅香濃同蟹肉嘅鮮味完美結合。另有香濃嘅松露牛油扇貝都值得一試，仲有豐富嘅新鮮海鮮同節日甜品，包括傳統核桃批同開心果櫻桃慕絲蛋糕，甜到入心～

冬日佳節盛宴 Three on Canton 

自助餐提供多款精選美食，冰鎮海鮮、新鮮環球佳餚應有盡有，絕對滿足各位食客嘅味蕾。重點推介經典聖誕火雞同法式燴牛肉，牛肉配埋小洋蔥、蘑菇同煙肉，濃郁香滑。甜品控要留意造型可愛嘅朱古力聖誕樹同朱古力柑橘慕斯聖誕樹幹蛋糕，甜中帶柑橘酸酸地嘅味道，外觀同味道都一樣出色，為你嘅節日帶來更多甜蜜氣息。

聖誕盛宴自助餐 The Place   

無論午餐定晚餐，都準備咗滿滿聖誕氣氛嘅美食，等你大快朵頤！海鮮控必試冰鎮海鮮區，午餐有龍蝦鉗、時令生蠔同鱈蟹腳，晚餐仲加碼供應麵包蟹，鮮甜味美。冷盤區每日新鮮供應刺身、壽司、日式冷盤，配埋特選芝士同沙律，12月24日同25日晚餐更有即切意大利巴馬火腿，鹹香濃郁。節日烤肉亦係重頭戲！烤火雞每日供應，假日及其前夕仲有威靈頓牛柳，外皮酥脆，內裡肉質鮮嫩；特色熱葷包括焗蟹蓋、叉燒醬烤豬肋骨同意式海鮮燴飯，晚餐則加碼供應香煎鵝肝！甜品方面平安夜及聖誕日特別供應火焰雪山，睇得又食得～

華麗盛宴．自助晚餐 Le Menu  

呢場盛宴包含多款節日經典美饌，更以「龍蝦．花膠．扣鮑魚」為題，並同時供應新鮮冰鎮海鮮、片皮鵝、鐵板燒同高質刺身壽司，讓你一次過食盡環球美食！推介必試包括肉質Juicy嘅聖誕火雞配雞肝汁、濃郁惹味嘅西班牙海鮮飯，以及口感豐富嘅葡式燒乳豬，每一道都充滿節日滋味！海鮮迷絕對唔可以錯過波士頓龍蝦、雪花蟹腳同蒜蓉粉絲蒸扇貝，鮮甜爆汁。現場仲有廚師即席烹調嘅鐵板燒，甜品就有聖誕樹頭蛋糕、紅絲絨蛋糕、巴斯克芝士蛋糕、核桃批同朱古力慕絲蛋糕等，款款都精緻又吸睛。

聖誕及新年自助晚餐 雅苑座

置身110尺高嘅空中花園享用節慶自助餐，而12月24、25及31日自助晚餐時段，免費為每位客人送上一份「海膽醬焗波士頓龍蝦併阿拉斯加蟹腳配香檳魚子忌廉汁」，更設有現場樂隊表演，氣氛滿滿又難忘呀！另外仲有冰鎮波士頓龍蝦、九款即切刺身（如吞拿魚、𩶘魚、帶子、油甘魚、甜蝦等）、聖誕燒火雞配栗子釀餡、聖誕朱古力栗子樹頭蛋糕、聖誕布甸配白蘭地汁等；指定日子仲有燒特級有骨肉眼配燒汁及黑掓汁、美國核桃批（12月24、25及31日供應）、蜜汁有骨火腿（12月31日供應）等特備菜式𠻹。

文: Yanica、Cathy