雖然唔知新年有冇得出返街食團年飯，但年糕都係要食嘅，惟有希望食完年糕，虎年事事順境，步步高陞啦。今年有好多賀年糕品呀，除咗傳統口味外，亦有黑松露、陳皮、野生花旗參伯爵茶，甚至蟹粉等食材，都可以用嚟製作糕品，認真夠突破。
上三兩 蟹粉糯米糕
呢間以蟹為主題嘅專門店，夠晒創新，居然諗到將蟹混入糕品中，首創蟹粉糯米糕！團隊花咗超過3個月研究，以自家調配嘅蟹粉入饌，蟹肉同蟹膏嘅黃金比為3：7，一半混入並喺糯米糕內，糕面亦再灑上另一半份量嘅蟹粉。原粒糯米吸收咗蟹油，啖啖都係甘香蟹鮮，夠晒特別。佢哋另外有黑松露蘿蔔糕，都係香氣濃郁呢。
Feast 手製椰香班蘭年糕
一向以提供一站式到會服務嘅Feast，賀年糕點都充滿誠意，無論係黑松露蘿蔔糕定係椰香班蘭年糕，都係手製。前者用上約60克黑松露醬炮製，非常足料，蘿蔔清甜，香氣層次分明；後者以新鮮班蘭葉同椰子水製成，口感軟糯煙韌，兼有淡淡班蘭同椰香，灑埋香脆花生糖碎同椰絲一齊食，口感更豐富。
Little Bao 大紫芋頭糕
以原創「中式漢堡」小包包為主打，一向都主意多多嘅Little Bao ，今年推出咗2款糕品，分別係大紅蘿蔔糕同大紫芋頭糕，顏色大膽鮮豔，異常吸睛，食材同口感亦交足功課，其中蘿蔔糕有別於傳統，特意選用三興隆玫瑰露酒臘腸、日本干貝、日本香菇幹、泰國蝦乾、有機葵花籽油，再佐以龍舌蘭花蜜、海鹽同柚子皮製作；而芋頭糕則以沖繩紫薯為主打食材，另加入泥浦芋頭等，口感軟糯。
皇玥 年糕禮盒
由前5星級酒店同米芝蓮師傅創立嘅品牌，今個新春首次推出年糕禮盒！包括黃金糕同黑糖年糕，兩款都係用傳統石磨將香米磨製成質感細膩嘅米漿，保留返香米原始香甜同風味。黃金糕鹹香味濃郁，仲有粒粒鹹蛋黃，煙韌彈牙；而黑糖年糕加入薑汁令黑糖香氣更突出。
營致會館 全新椰香紅豆錫蘭年糕
呢款全新嘅椰香紅豆錫蘭年糕加入錫蘭紅茶，一入口散發醇厚茶香，混入象徵吉祥好運嘅紅豆，清甜不膩，食多兩件都無問題。
香宮 日本黑糖柿乾年糕
全新日本黑糖柿乾年糕以沖繩純黑糖製成，黑糖味夠晒香濃，加埋日本杮乾，兩者結合甜味清而不膩，年糕口感仲好軟糯～
唐人館 赤崁糖有機紫糯米鮮椰汁年糕
唔嗜甜嘅朋友呢款糕點就啱晒。特別採用來自台灣赤崁以古法煉製嘅黑蔗糖，甜味自然，更以新鮮純椰汁代替水分，令糕點清新帶椰香。
龍景軒 全新洋金菊茶香馬蹄糕
以洋金菊茶入饌，大廚以85度水温沖泡茶葉，過程同時間掌控相當嚴謹，確保茶味甘滑醇厚、濃淡均匀，令傳統馬蹄糕味道更清甜芳香。
皇御園 紫米馬蹄糕
加入紫米嘅馬蹄糕你又食過未？馬蹄糕清新爽甜，加入富含抗氧化花青素及膳食纖維嘅紫米，令香味層次更加豐富。
寬巷子 鰹魚湯如意臘味蘿蔔糕 + 平安馬蹄糕
餐廳同藝人黎諾懿合作推出嘅糕點~ 臘味蘿蔔糕今次唔用雞湯，轉用鰹魚湯製作，再以優質白蘿蔔配瑤柱、惹味臘肉、臘腸同蝦米等，既食得到蘿蔔鮮香味，亦有陣陣魚香滲出，蒸又得煎又得。而平安馬蹄糕就係今年全新推出嘅，集清香馬蹄味同爽脆口感於一身！
由酒店行政總廚黃永強師傅同大師姐麥麗敏女士共同推出嘅限量遠年陳皮蘿蔔糕。加入新會15年嘅陳皮，每一啖都散發柑橘陳香，帶有淡淡甘甜。
Green Common 南瓜薑黃紅藜麥燕麥奶年糕
人氣推介「黃金滿Oat」即係南瓜薑黃紅藜麥燕麥奶年糕，係同英國品牌Minor Figures合作，以輕盈燕麥奶製作出全新配方，低脂又健康。
帝苑軒 日本蘿蔔牛肝菌素糕
特別為素食人士而設㗎！選用日本大根，蘿蔔味重又清甜多汁，再加入雲南牛肝菌，菇菌香氣好突出。最後加埋炒香過嘅黑木耳、冬菇同榨菜，有口感又惹味。
國金軒 黑松露純素山藥糕
純素人士重有另一款選擇——黑松露純素山藥糕，以意大利黑松露牛肝菌醬、香菇粒同雞髀菇粒製作，菇味香濃，加入山藥同沙葛口感仲豐富咗。
老行家 X LHK Doux Cadeau 野生花旗參伯爵茶年糕 + 珍珠粉綠茶紅豆糕
野生花旗參伯爵茶年糕帶有人參甘香味，配上茶香濃郁嘅伯爵茶，呢個配搭又幾有驚喜；而珍珠粉綠茶紅豆糕加入100%純珍珠粉製作，另外重有綠茶、紅豆同煙韌麻糬，估唔到食糕都可以養顏。
ate18 芫茜蘿蔔糕
呢個本地90後創立嘅品牌推出芫茜蘿蔔糕，標榜由⾃家⼯場全⼈⼿製作，無味精、無防腐劑、無添加劑，好似屋企食到嘅味道咁。芫茜蘿蔔糕更喺蘿蔔糕粉漿內加入⼤量新鮮芫茜，唔單止聞落有芫茜味，食落更係啖啖芫茜香，同蘿蔔嘅清甜味好夾！
奇華 x LINE Friends 孖裝年糕禮盒
鍾意卡通系列又點可以唔買LINE Friends年糕禮盒，包括BROWN「亞嫲糖年糕」同CONY「椰汁糖年糕」。前者以泰國出產嘅上等優質糯米生磨米漿蒸製而成，口感煙韌細滑。而後者則混入咗清香嘅椰汁，甜而不膩。
恆香 x 輕鬆小熊 年糕禮盒
呢間餅店今年同輕鬆小熊合作推出5款產品，糕點系列有蔗糖年糕同椰汁年糕，前者甜味天然醇厚，後者椰香四溢，重點係好可愛呀～
文: Yanica
編：Kar
