一到農曆新年辦年貨，一定唔少得嘅就係年糕，貪佢好意頭又多口味款式揀，總有一款啱大家心水。以下介紹嘅無論係經典、創新甚至係綠色素食口味都相當有新意，食住新口味年糕過新年仲唔係特別爽歪歪？
一齊Go Green 素食年糕
紫薯黑糖椰汁年糕 Green Common
近年紫薯大熱，自問都係紫薯Fans之一嘅話一定要試下呢間素食店嘅紫氣東來紫薯年糕，其實即係紫薯黑糖椰汁年糕，一嚟軟糯紫薯粒可以增加口感層次，二嚟佢地用黑糖代替精製糖甜味就更自然。另外龍馬精神馬蹄糕就加入桃膠，更煙韌之餘仲有滋陰養顏功效，配合甘菊味道清甜。
招牌棗茸千層糕 心齋
其實除咗普通年糕同蘿蔔糕，紅噹噹又夠Sweet嘅棗茸糕同樣啱喺新年食。中環呢間素食中菜館今年就有棗茸千層糕，特別揀咗大粒飽滿嘅新疆和田棗，整成嘅千層糕唔單止充滿郁馥香甜嘅紅棗味，口感仲非常煙韌。而杞子桂花糕、蔗糖椰汁年糕同香菇蘿蔔糕都係由師傅每日限量手做，唔添加任何防腐劑同人造色素！
新春新意 創新年糕
芒果十勝紅豆糕 樂雅軒中菜廳
新一年不妨試下唔同新口味！油麻地呢間經典粵菜館今年搞搞新意思推出金箔芒果十勝紅豆糕，底嘅紅豆糕用咗日本十勝紅豆，雪硬後再用新鮮芒果製作上層嘅芒果啫喱凍，最後加上矜貴金箔點綴。芒果嘅酸甜加埋紅豆嘅口感，有新年氣氛食落又唔怕膩。另有經典金瑤臘味蘿蔔糕同黃糖椰汁年糕選擇。
日本元貝蓮藕糕 奇華餅家
除咗甜味年糕之外，鹹食嘅年糕亦有新力軍！呢間連鎖餅家今年就有全新日本元貝蓮藕糕，嚴選色澤金黃而味道鮮甜嘅日本北海道宗谷川元貝，配埋蓮藕、臘肉同蝦米，香味十足。而薑汁日本甘薯糕就用咗用頂級日本德島紫薯，特別綿滑香甜，配合生磨薑汁仲有驅寒暖胃嘅功效。
珍貴滋味 經典年糕
牛肝菌珍品蘿蔔糕 粵
如果已經食厭普通蘿蔔糕嘅話，北角呢間酒店米芝蓮一星中菜館嘅珍品蘿蔔糕或者幫到你！特別挑選味道清香獨特嘅牛肝菌，再配搭埋羊肚菌、姬松茸、杏鮑菇，同清甜嘅蘿蔔絲夾得嚟又保留到菇菌嘅清香。意猶未盡嘅話仲有金栗年糕，裡面既有幼滑栗子茸，亦有粒粒栗子粒，口感豐富而味道亦相當清甜。
金箔椰汁桂花糕 國金軒
想一邊應節，一邊滿足口福，仲要滋潤養顏？尖沙咀呢間高級粵菜館嘅金箔椰汁桂花糕就可以滿足到呢三個願望。一層層椰汁糕同桂花糕黃白相間，食落層層分明味道清新，加埋印尼燕窩同金箔點綴更有滋潤養顏功效。另外仲有甜而不膩嘅沖繩黑糖椰汁年糕，同香氣四溢嘅巴馬金腿蘿蔔糕選擇。
文：Cathy
開飯編輯推介：
2. 12月份好評餐廳十強
熱門文章推介：
隨時接收最新資訊
讚好OpenRice專頁！