各位榴槤Fans仲記唔記得12月開飯仔同大家開心Share咗個榴槤放題嘅消息？好快就有人留言話應該係「人類史上最臭放題」，到底係咪真係有咁大「味」力？榴槤放題真係任食唔嬲？質素有無保證？即睇開飯仔直擊報道！
任食榴槤寶鑑Party係榴槤BB同馬來西亞聯邦農業促銷局合作，呢一輪足足有9款唔同品種嘅榴槤肉，當中包括第一次出口嘅太源！不過呢個特別品種就每人只得一粒，無得Encore。不過唔洗咁快失望住，其他8款唔同品種都係任食嘅。
咁質素又點呢？所有榴槤都係原隻冰鮮到港，再請馬來西亞師傅喺會場即開。而且工作人員會先插上旗仔，畀各位榴槤Fans分清楚唔同品種。
叫得任食榴槤品鑑Party，當然唔係任食咁簡單。馬來西亞榴槤出口商會會長拿督 Paul Mak專程嚟到Party逐一介紹唔同品種嘅特色，一邊聽講解一邊就到大家期待已久嘅第一輪品鑑環節！
第一輪品鑑環節每人會有一碟，9款唔同品種嘅榴槤肉各1-2粒。拿督建議大家試食次序按住旗仔上面嘅數字由細開始食到大，因為咁樣就啱啱好由清甜食到比較濃味。而且枱上面亦有支裝水提供，Fans可以慢慢嗒真啲，試出自己心頭好。
9款唔同品種各有特色，第一次出口馬來西亞嘅太源果肉口感細滑，而且香甜之中帶微酸。而純種老樹888係無駁枝嘅老樹品種，果肉較實味道亦唔太甜。
奶油包D28係9款當中口感最為Creamy香軟嘅，有一絲絲嘅口感，味道先甘後甜。葫蘆D163果肉就比較黏，有少少堅果同朱古力香味。紅蝦D175果肉最軟，味道香濃帶少少回甘。
紅肉D101口感亦相當細滑，回甘味道濃郁但唔會覺得苦。金包D13亦相當Creamy，比紅肉D101多一份甜味而少一份回甘。
山頂XO D24名副其實食落有少少XO酒香，不過略嫌酒香有少少遮掩咗榴槤味。最後老樹貓山王D197係唔少人嘅最愛，皆因榴槤味道最為濃郁，有少少奶香而餘韻最長。拿督介紹嘅時候仲特別介紹呢個品種有時候會有回甘味，如果食落覺得有啲苦，絕對唔係變壞反而仲代表係靚嘅𠻹。
30分鐘嘅品鑑環節過後，就係大胃王最愛嘅90分鐘任食環節！喺呢90分鐘裡面參加者可以任嗌唔同品種嘅榴槤肉（今次太源呢個品種例外），就睇各位食到幾多粒喇。老闆KK同大家分享嘅時候提及，過往榴槤放題當中最高紀錄係有位男士一口氣食咗90粒！而女士平均都食到20粒㗎。
一個任食榴槤品鑑Party就可以食到9款品種榴槤，講解同介紹亦清晰，任食90分鐘當中仲會有遊戲同各位參加者互動一下送下禮物咁。而且配套都唔錯，有齊手套、水、紙兜、乾紙巾同濕紙巾。
不過有讃亦有彈，始終年初唔係榴槤旺季，雖然已經盡量安排用接近Party日子前自然喺樹上熟嘅榴槤，但冰鮮咗一段時間加上解凍時間不足，食住凍嘅榴槤肉味道點都係扣咗啲分。而且因為呢次人數較多，放題安排比較混亂，任食後加嘅榴槤肉都無插到旗仔，容易撈亂品種。
無論如何，如果你想嚟一次一入到會場就聞到濃郁榴槤香嘅Party，同各位榴槤Fans一齊交流心得，學多啲唔同榴槤知識，兼任食唔同榴槤肉嘅Fans可以留意，老闆同開飯仔講準備最快3月會有新嘅一輪任食榴槤品鑑Party！想知道最新消息可以留意佢地Facebook。
最後溫馨提示一句，要去任食榴槤嘅為食友最好帶定香口膠等除味工具，因為開飯仔發現食咗兩個鐘榴槤之後，真係會成身榴槤味㗎......
文：Cathy
相：Kar、Cathy
開飯編輯推介：
2. 1月份好評餐廳十強
熱門文章推介：
隨時接收最新資訊
讚好OpenRice專頁！