【飲食潮流】行便利店有新發現紫薯牛奶 X 新出抹茶雪糕（有片）

人總係貪新鮮嘅，每次行過便利店、零食舖都會望下呢期有咩新嘢。最近就發現到呢幾樣，就咁睇個樣就好似全部都好吸引，起碼吸引咗我買先！究竟食唔食得過呢？

Kit Kat - 花生醬、混醬朱古力

最近7仔獨家出咗兩隻新口味，花生醬同混醬。花生醬嗰隻幾好食，真係有好香花生醬味，不過我貪心，如果有埋一粒粒花生粒食到就仲好。另外嗰隻混醬，3格3隻唔同味，分別係焦糖、曲奇同軟朱古力味，焦糖嗰格仲有少少流心添，不過講真，食晒3格，結論係一個字，甜！

開心指數：****

十字牌 - 紫薯味牛奶

見到呢隻最新出嘅紫薯味牛奶，當然要第一時間買嚟試下啦……雖然上次抹茶味嘅回憶不算太愉快。今次隻紫薯味又點呢？一打開盒就聞到陣紫薯味，隻色倒出嚟都好粉紫。嗯，好彩，味道都唔差，係甜嘅，都飲到紫薯味，紫薯控試得過呀！（追加：睇埋仲有咩紫薯味嘅零食）

開心指數：*****

長薯片 - 芝士味

呢隻長薯片，喺包裝上面就寫住可能係世界上最長嘅薯片，仲話有成20cm喎。拎一塊出嚟睇，又真係好長喎，但個感覺好唔薯片，長方形嘅？是但啦，食之前梗係要求真，睇下是咪真係有20cm啦。一度，咦，得19嘅喂！BTW，薯比平時嘅薯片薄，但又冇話特別脆咗，味就係芝士粉嘅味道啦。同款另外仲有煙肉味。

開心指數：***

森永濃厚焦糖鹽布甸

森永出開嘅焦糖產品，無論係雪糕、糖定奶，畀人嘅感覺都係超甜。今次出嘅呢隻焦糖鹽布甸，出奇地，隻焦糖味冇平時咁甜，但依然都係咁香，幾有驚喜，而且混和咗鹽味嘅鹹，甜同鹹嘅比例做得唔錯。食到最底仲有一層深色啲，鹽味再重啲。

開心指數：*****

樂天抹茶雪糕

呢款樂天雪糕有好多種味，除咗你哋嘅最愛：抹茶同蜜糖紅豆之外，仲有好多生果，例如芒果、蘋果、提子同士多啤梨咁。試咗隻抹茶味，甜度都算適中，嗒真啲仲有少少回甘。

開心指數：****

森永MOW抹茶味雪糕

呢款好似係近期大熱嘅雪糕，有紅豆同抹茶兩種味嘅，但好多間7仔都賣晒綠茶得返紅豆，呢盒係行咗好多間先買到㗎。食落都幾重奶味，不過都可能因為咁，所以係幾香滑嘅，而抹茶味都好濃郁，但就略嫌甜咗少少咁啦。聽講話另外隻紅豆味好多紅豆，好食啲添呀，下次不如買晒兩隻味返嚟自己溝埋變抹茶紅豆味咯？

開心指數：****