【飲食潮流】零食新星！可樂味薯片 + 韓風泡菜粟一燒試唔試得過？

平時口痕嗰陣，最鍾意就係一邊飲可樂一邊食薯片，肥都係咁話，爽吖嘛！不過而家唔使一手一樣嘢喇，登登登鄧！卡樂B出咗隻二合一呀！係可樂味薯！同場加映海鹽雲呢嗱雪糕味薯片，同埋今日開始先有嘅韓風泡菜味粟一燒！

嗯，其實日本卡樂B之前都聯同Namco出過一次可樂味㗎，Anyway，嗰陣淨係得葡萄人，而家終於有自己嘅可樂薯片，梗係買返嚟試下！一開包薯片，即刻聞到好勁嘅可樂味，但係抱住咁大期望去食呢，又通常係會有少少失望嘅……

食落都食到可樂味，但就冇聞到嘅咁重喇，不過食完feel到個喉嚨涼涼地，好似冰薄荷咁，仲有些少，輕微嘅sparkling 感覺，又幾得意。如果好奇心重嘅朋友仔，可以買埋另外嘅海鹽雲呢嗱雪糕味，兩塊疊埋一齊試，官網話會食到Ice Cream Soda嘅味喎。

講下隻韓風泡菜味粟一燒，係香港獨家優先發售㗎！今日新出。倒出嚟睇，泡菜色係有嘅，食呢？都有酸酸地嘅味，微辣，溫馨提示，要一次過擺多幾條入口先至食得到多啲嘅泡菜味！

如果未有時間或者唔行開灣仔，但有想試新嘢嘅話，就要等下喇，應該過多排就會陸續喺巿面有售㗎喇！

Okashi Galleria x Calbee Plus
灣仔皇后大道東200號利東街地下G14-15號舖