香印青提蛋糕 東海堂
鍾意食生果嘅朋友應該就會好熟悉每種生果當造嘅時間，而家係七月中，夏日炎炎，正正就係日本香印青提盛產嘅季節。東海堂就第一次引入呢種清清甜甜又多汁嘅生果作為食材，製作咗一系列嘅提子糕點！
香印青提芝士慕絲蛋糕，內層嘅芝士mousse比較輕巧幼滑，配埋白提子果凍、提子乾及杏仁酥餅，冇咁膩之餘又唔會搶咗青提嘅甜味。成個蛋糕面頭密佈青提同奶凍，仲有閃下閃下嘅銀箔，淨睇賣相都加分。巨峰提子慕絲蛋糕 上面嘅巨峰提堅係巨，大大粒好多汁，而下層就係巨峰提子mousse同朱古力蛋糕，食到落最底仲食到白朱古力脆脆同巨峰提子果凍，可以話係由頂到底都充滿住唔同口感嘅巨峰提！
日本人氣楓糖蛋糕 THE MAPLE MANIA
其實喺香港都可以食到好多日本嘢，呢間人氣手信店即將會喺7月15號登陸香港。其中最出名嘅一定係佢哋嘅楓糖年輪蛋糕，鍾情焦糖嘅朋友仔應該見到佢黑黑黃黃嘅面層已經心心眼咗，未食已經感覺到嗰種甜。切開再見住一層層嘅蛋糕中間夾住一層層嘅焦糖楓糖粒，蛋糕口感濕潤軟熟，滲透住焦糖同楓糖嘅甜，啱曬甜魔。
玩味冬蔭公蛋糕 帝京餅店
見到呢兩件蛋糕，第一個反應應該會問：下？真係蛋糕嚟？因為佢嘅造型都真係太似一碗冬蔭公湯同牛丸河喇！但佢堅係一個蛋糕嚟㗎！咁第二個問題就會問：咁冬蔭公蛋糕係咩味？
少年你真係太年輕，畀呢兩個蛋糕嘅樣呃咗喇。冬蔭公海鮮蛋糕個底其實係椰子蛋糕嚟，再加青檸慕絲同啫喱，而面頭嘅「冬蔭公」就係椰汁糖水、提子、朱古力等等，反轉隻大蝦仲會見到係脆米朱古力軟心餡嚟。而「牛丸河」嘅「牛丸」就都係朱古力嚟，而「湯底」同「河粉」呢就係伯爵茶、椰子啫喱，至於蛋糕底就係芒果mousse同海綿蛋糕，有芒果果肉㗎。呀，牛丸河蛋糕8月先有㗎留意返，我做定預告㗎咋。
文：Kar
隨時接收最新資訊
讚好OpenRice專頁！