繼上年嘅「黑糖珍珠風」後，今年掀起嘅係石燒牛熱潮！簡單嘅餐廳裝潢、日本引入嘅自助購票機、燒到熱一熱嘅火山石……等開飯仔幫大家精選本年度5間各有特色嘅石燒牛店啦！

肉有所值日本牛 牛扒 ミディアムレア ステーキ

要食到「平靚正」嘅牛扒絕對唔係易事，呢間舖可以話係食肉獸眼中嘅恩物~300g西冷150蚊有找，即磅即煎。價錢親民得嚟仲要係日本牛牛，夠晒和味~

名星加持 神石焼きビーフステーキ專門店

RubberBand成員阿偉有份開嘅石燒牛店，主力提供日本A5黑毛和牛、澳洲M5黑毛和牛等，最平80蚊就有塊扒鋸啦，記住要點埋佢哋嘅神石燒汁，味道更鮮甜~食肉獸唔想大排長龍嘅話，可以試下午餐嚟鋸扒啦！（三餐都係肉，輕鬆啦~）

專食罕有部位 野郎Stone

呢間石燒牛店開喺尖沙咀條食街度，憑美國安格斯、日本A4黑毛和牛吸引到唔少食肉獸！燒到啱啱好一成熟，仲可以見到油花比例，再擺喺火山石度慢慢燒。最大賣點係餐廳提供6款部位，有牛肋間隔膜、牛舌芯、骨付牛小排等罕見部位，每日限量，非常矜貴呀！

$78鋸牛扒 牛極

呢間石燒牛提供$78-$328嘅牛扒，提供唔同部位，包括牛肋骨排、西冷、牛柳等，先由師傅以自家製和牛牛油煎至一成熟先上枱，食落肉味特別香濃同juicy~ 

最高級韓牛 堅石燒

食肉獸又點可以放過食韓牛嘅機會呢！？呢間石燒牛特別提供軟腍多汁嘅1++韓牛肉眼（最高級嘅1++！），仲有韓國豬腩肉添~不過呢間就唔係自助落單嘅，係同店員落。餐廳最貼心嘅係設有一部「去味神器」，咁就唔怕食完個身會好大陣燒肉味啦~

文﹕Kiko
編：Kar