近年有唔少朋友都由傳統月餅，轉投冰涼清甜嘅冰皮/雪糕月餅懷抱，用嚟送禮或自用，即刻睇下今年幾款冰皮/雪糕月餅又有咩新口味同造型先～

Häagen-Dazs™　3款嶄新禮盒

今年嘅Häagen-Dazs除咗保留舊有嘅經典口味，更推出3款嶄新禮盒，包括啱晒茶控嘅「茶‧亮月」禮盒，一次過試晒日本玄米茶、斯里蘭卡伯爵茶、中國烏龍茶同印度大吉嶺紅茶四種亞洲名茶口味；可可系列「醇‧伴月」禮盒就啱晒鍾意食朱古力嘅朋友仔，唔同濃度嘅朱古力外層令月餅甜而不膩～而第三款禮盒「迪士尼「友」歡聚」更乘聯迪士尼Tsum Tsum，將可愛嘅米奇、米妮等放入月餅，so cute～

聖安娜　至脆驚喜冰皮月餅

聖安娜今次喺8款口味嘅月餅中，都加入咗法國海鹽焦糖脆，令月餅增添一份口感，外軟內脆，更有咬口。 8款口味豆蓉包括京都抹茶紅豆、芝麻松子、雞蛋布丁、香滑奶黃、粒粒紫薯、粒粒杏仁、比利時朱古力同朱古力咖啡，配搭海鹽焦糖脆脆毫不違和，鹹鹹甜甜。

唐宮小聚  尊品三色冰皮

唐宮小聚今年繼續同新加坡著名糕點師傅 Daniel Tay 聯手推出３款創意滋味冰皮月餅，主打新世代口味，其中兩款冰皮月餅更以酒入饌：柚子馬天尼、冧酒提子黑朱古力珍珠，清甜嘅水果搭上淡淡嘅酒香，打破我哋對月餅刻板嘅印象。另外，仲有斑蘭椰糖味冰皮月餅，陣陣嘅斑蘭味就好似食緊新加坡嘅斑蘭蛋糕咁。

 圖：餐廳Facebook

王孖記果子係一間坐落於荔枝，略有人氣嘅港式生果店，今年佢哋推出自家製作嘅冰皮月餅斑蘭脆脆、烏龍珍珠、棉花牛奶同桂花桃膠，四款口味各切合唔同年齡層嘅喜好，配搭新穎有心思。但係因採用天然新鮮材料，不含防腐劑，所以要注意要喺15日內食用喔～

文：Hailey
編：Kar