隨住愈來愈多店舖加入中秋節月餅戰場，鍾意試新嘢嘅朋友仔，今年可以開心自肥！事關各大餐廳、餅店同酒店都推出全新口味嘅月餅迎戰。今次開飯仔分咗幾個系列介紹畀大家，無論你係鍾意口感豐富嘅流心、清新嘅茶香、香濃嘅朱古力定係高級酒店系列都無問題！

流心系列：

Valérie Pastry 流心伯爵茶月餅

呢間本地人氣餅店承傳經典風味之餘同時揉合無限創意，皇牌產品流心奶黃月餅及流心宇治抹茶月餅一向都好受歡迎，今年更首推流心伯爵茶月餅，餡料幼滑帶有香濃伯爵茶香，仲有淡淡佛手柑獨特香氣，配埋新鮮即焗嘅牛油曲奇皮係絕配！

網上訂購: (按此)

花玥 流心蜜瓜芝士手工月餅、流心焦糖咖啡手工月餅

舊年先成立嘅全新本地品牌，除咗繼續推出往年熱賣嘅精緻手工月餅套裝，今年會有兩款全新口味，包括流心蜜瓜芝士手工月餅及流心焦糖咖啡手工月餅。前者加入鮮忌廉及多款芝士混合成流心芝士餡料，蜜瓜嘅清甜能夠中和芝士膩感；後者以焦糖及咖啡製作，一咬落去就食到咖啡豆甘﹑酸及甜嘅細微轉變，焦糖同濃濃嘅炭培咖啡香氣瞬間充滿口腔，咖啡愛好者必買。

網上訂購: (按此)

茶香系列：

LIFETASTIC 茗茶月餅禮盒

主打西瓜蛋糕嘅餅店首度推出茗茶月餅禮盒！禮盒以精美小茶几概念設計，由普通月餅盒搖身一變精美小茶几只需幾秒，啱晒打卡。一共有三個口味，包括茶香濃郁甜⽽不膩嘅伯爵茶奶皇月餅、以⽇本宇治抹茶粉製成嘅日本宇治抹茶奶皇月餅同埋味醇回⽢嘅台灣紅茶月餅。

網上訂購: (按此)

Fortnum’s 茶香口味月餅

來自英國嘅百年茗茶品牌，今年出咗三款全新口味月餅，包括伯爵紅茶、玫瑰包種茶及抹茶口味嘅奶皇迷你月餅，每款月餅都會根據口味配返合適嘅罐裝茶葉。其中伯爵紅茶月餅搭配伯爵紅茶，味道更清爽；玫瑰包種茶月餅就會配上帶豐富麥芽香氣嘅阿薩姆茶，同錫蘭紅茶配製而成嘅安妮女皇混合茶，而抹茶月餅會配維多利亞伯爵茶，呢隻茶帶有薰衣草氣息及蜂蜜天然甜香，同抹茶好夾。一啖月餅一啖茶，簡直係享受～

Paul Lafayet 中秋茶香奶皇月餅禮盒

主打法式甜點嘅餅店今年以四種矜貴茶葉研製出四款特色月餅，每款月餅均採用減糖配方加上全天然食材製成，相對傳統月餅健康啲。四款口味包括玫瑰花茶、日本焙茶、茉莉花茶同伯爵紅茶，味道唔太甜兼帶有陣陣茶香，食多兩件都唔怕太膩。

網上訂購: (按此)

朱古力系列：

GODIVA 黑松露杏桃牛奶巧克力月餅、荔枝烏龍茶白巧克力月餅及抹茶金桔白巧克力月餅

呢間朱古力專門店今年選用來自意大利嘅黑松露醬等西式材料同埋柚子蓉等具中國特色嘅食材，創作三款全新朱古力月餅，包括黑松露味好香濃嘅黑松露杏桃牛奶朱古力月餅、帶有果甜嘅荔枝烏龍茶白朱古力月餅及入口回甘嘅抹茶金桔白朱古力月餅。

網上訂購: (按此)

Schoggi Meier 繁花盈月燕麥脆心朱古力月餅

香港自設廠房嘅朱古力品牌，採用瑞士原材料Couverture 100% 可可脂朱古力，今年推出全新繁花盈月燕麥脆心朱古力月餅，濃郁嘅朱古力月餅中加入燕麥脆心，配合香脆堅果及乾果，口感層次豐富且甜而不膩。

網上訂購: (按此)

酒店系列：

香格里拉酒店 五十年陳皮豆沙玫瑰月餅、迷你香茶奶黃月餅

為慶祝集團成立五十週年，呢間酒店推出五十年陳皮豆沙玫瑰月餅禮盒，以珍貴嘅五十年陳皮入饌，配合香甜紅豆蓉及清香玫瑰，自用送禮皆相宜。另外首推迷你香茶奶黃月餅，包括清香回甘迷你日本抹茶奶黄月餅，同甘香醇厚迷你斯里蘭卡伯爵茶奶黄月餅，啖啖茶香加上香脆黄金月餅皮及香軟奶黄，茶香撲鼻，甜度又啱啱好。

網上訂購: (按此)

香港四季酒店 甜腿五仁月餅

鍾意食脆口嘢嘅，呢款桂花甜腿五仁月餅係必試！今年更上一層樓以六款果仁製作，包括合桃、腰果仁、松子仁、南瓜子仁、葵花子仁及杏仁，口感豐富之餘，堅果香氣仲好濃郁。

網上訂購: (按此)

帝港酒店集團 迷你焦糖碧根果仁月餅及迷你花生醬紅桑子月餅、迷你純素白蓮蓉月餅

全新雙色月餅禮盒包括三個迷你花生醬紅桑子月餅及三個迷你焦糖碧根果仁月餅，前者餅皮由法國可可粉及紐西蘭牛油製成，包裹住花生醬餡料，中間為紅桑子果醬，酸酸甜甜幾開胃；後者以傳統嘅五仁口味為靈感，先烤焗碧根果仁，再混入由楓糖漿、馬達加斯加香草精油及忌廉等製成嘅焦糖漿，唔會過甜。

其他：

台北‧寬巷子 X 店小懿 二十黃白蓮蓉月餅

有無食過二十個蛋黃嘅月餅？今年呢間來自台灣嘅人氣過江龍同名人黎諾懿開設嘅店小懿合作，推出全港最多鹹蛋黃嘅【柳影庭花】二十黃白蓮蓉月餅！一入口係滿滿嘅鹹蛋黃香氣，甘香油潤。無論點切，抽中邊個位，都一定有蛋黃食到唔使爭！

網上訂購: (按此)

文: Yanica
編：Kar