幾時都話，要搵好嘢食，就要識瓹窿瓹罅。中環有條唔起眼嘅巷仔盡頭，最近新開咗間新派嘅日式串燒店，主打雞肉串燒，仲有主食同清酒/啤酒等供應，細細間但幾好氣氛。
老闆係位90後嘅後生仔，佢希望餐廳可以成為中環上班族嘅減壓點，全店裝潢以木系同白色為主，燈光微暗，一坐落就容易放鬆。餐廳主力供應唔同部位嘅雞肉串燒，雞肉選用新鮮三黃雞，每日都喺中環街巿入貨。老闆更特意花上5位數字，由日本訂製最高可以高達2000度嘅燒爐返嚟製作串燒。
（左起）雞胸軟骨、免治雞肉串、紫蘇葉雞腿
每款串燒都係即叫即燒，配以唔同嘅醬汁，既能突顯原材料嘅風味，亦為之增加層次感。紫蘇葉雞腿係最受歡迎嘅串燒之一，雞肉軟嫩juicy，仲有陣紫蘇葉獨有嘅清香。另外推介免治雞肉串，內有乾坤呀，師傅混入軟骨製作，啖啖肉之中又有啲軟骨咬下，爽脆有口感。平時食雞軟骨多，嚟到可以試下雞胸軟骨，肉感比雞軟骨多，但一樣有嚼勁同埋脆身，口感唔錯。
（左起）雞心、雞腎、雞皮
雞皮燒至外脆內軟，帶有陣陣油香，係肥㗎喇，但嚟得食就唔好就住就住諗咁多喇。內臟選擇有雞心同雞腎等，師傅特別為前者調配咗個黑糖黑蒜汁，雞心食落彈牙兼帶有微甜；後者則如expect中嘅爽口。
芝士麻糬
鋪上紫菜嘅芝士麻糬，啱啱燒完唔好等即刻食就最好，煙韌軟糯。
（左）鵝肝炒飯、（右）鰻魚炒飯
如果怕串燒食咗好多串都唔飽，點都要有啲飯落肚嘅朋友仔，餐廳亦有主食供應。鰻魚炒飯混有粒粒肥美多汁嘅鰻魚；鵝肝飯大大塊鵝肝鋪喺面，份量十足！鵝肝亦以燒爐燒製，外層帶微脆，內裡軟滑香口。
明太子烏冬
而明太子烏冬亦落足料，烏冬軟滑，條條都索滿明太子汁，又鹹香又creamy。溫提大家食之前，記得要撈勻先啊。
Masumi Sunrise
食串燒點可以冇酒？精釀啤酒同清酒、紅白酒之外，不妨試試以清酒做基底嘅雞尾酒，4款cocktails大多都以橙同檸檬調製，橙紅色嘅Masumi Sunrise橙皮甘香味突出，感覺清爽。
Bentori
地址: 中環鐵行里10號地舖
文：Kar
相、片：Wilfred Chui