「煮個麵你食吖？」呢句對白真係好親切，唔得閒自煮的話，落中環都有得食！呢間主打東南亞麵食嘅麵，雖然店子小小，但款式有齊泰、日、韓及越式，仲可以好似車仔麵咁，自己剔紙仔揀湯底配料添！麵店由幾位年青人開設，當中有前甲一籃球員，想做一啲健康、便宜又可以每日食嘅食物，於是就決定主打麵食喇。湯底無味精，肉類盡量以慢煮，少油少鹽，可以食得健康啲。

餐牌主要有6款選擇，分成湯麵及炒麵。湯麵有四個湯底，牛骨湯同雞湯都係熬足48小時，牛骨湯以泰式船河混合越成牛河湯底做法， 15公斤牛骨燒香，加埋泰越香料及香草好似南薑、香茅等熬製，但就以椰奶代替豬血較健康。另有純素蕃茄湯及季節限定湯底，當日係冬蔭功，遲啲就可能推出叻沙。

泰式香濃牛肋骨湯金邊粉（$88），牛肋骨慢煮而成，入味而且鬆化，湯底濃郁又唔過鹹，配料仲有美國肥牛、炸豬皮、通菜等。

特色檸檬雞湯烏冬（$78）相當清，湯底用原隻雞熬成，奶白色好鮮甜。值得食嘅係加咗檸檬慢煮4小時嘅雞胸肉，肉質好腍而且淡淡檸檬香氣，好特別。

炒麵都唔錯，用日式鐵板炒，快炒可以落少啲油，食落夠熱辣辣。款式有慢煮手撕雞炒金邊粉、8小時慢煮秘製叉燒炒日式烏冬同韓式辣醬24小時慢煮牛肋骨炒蛋麵。叉燒用西班牙豬腩肉製成，上枱前用火槍炙燒，好香口。

8小時慢煮秘製叉燒炒日式烏冬 $88

自選除咗揀湯底，亦有超過30款配料如海鮮、丸類及蔬菜可揀，5款慢煮系列要加錢，但比其他配料值得試。麵條亦可揀有蛋麵、烏冬、油麵、金邊粉及米粉可以揀，除咗湯烏冬選用日本貨，其他都係香港麵廠新鮮製造。

韓國特色辣醬鮮蝦雞髀菇西蘭花炒蛋麵（自選$58）

布冧慢煮鴨胸 加$18

香辣蒜蓉雞翼 $58

以中環呢個地區，$58呢個價食到大大碗東南亞車仔麵都算唔錯，而且食材製法都有心思，附近返工嘅朋友又多個lunch好地方。

麵

地址：中環域多利皇后街2號地下

文、相、片：Perrins