啡迷最近好忙碌，因為有好多間咖啡店新開業，要忙住去朝聖同打卡。其中，呢間人氣咖啡店更一口氣喺旺角同銅鑼灣開咗兩間分店，一間係九龍區首間分店，更有限定咖啡雪糕牛角包；一間則係首間咖啡互動體驗旗艦店，客人可以自由選擇沖調工具同用水。

  咖啡雪糕牛角包

先睇睇旺角嘅分店，呢間分店加入咗多款以咖啡為主題嘅美食，首推一定係以自家烘焙咖啡豆製作嘅咖啡雪糕牛角包。每日新鮮用冷萃咖啡混埋Espresso製造，配埋自家工房製作嘅牛角包，灑上朱古力粉。雪糕咖啡味香濃仲有回甘，口感軟滑而牛角包鬆脆。

  炭燒雞扒咖喱定食

三款咖喱定食包括炭燒雞扒、豚角煮同鹿兒島一口牛都採用日本秋田小丁米，而重點係個咖喱汁，注入咗自家嘅精品咖啡啊！所以除咗有日式咖喱嘅甜香之外，食到尾尾仲有啲甘甘嘅味道。

 士多啤梨氣泡咖啡(左)、骯髒抹茶咖啡(右)

咖啡款式當然唔可以少啦，濃縮咖啡、冷萃、氣泡、骯髒系列等都有，而且仲花咗唔少心思做創新。好似冷萃系列咁，就以自家冷萃咖啡取代Espresso；而骯髒系列則以熱Espresso同冷凍明治牛奶做基調，加入朱古力漿或抹茶漿，，但係就唔加冰，一嚟可以減低稀釋度，突出兩者香味，二嚟更有冰火交融嘅效果。

 椰子抹茶咖啡Coco Chanel

要特別介紹嘅係椰子抹茶咖啡Coco Chanel。可能有朋友仔會覺得個明好熟，冇錯呀，係同集團Doubleshot by Cupping Room嘅招牌雞尾酒名，但今次就轉咗做無酒精版咖啡，層次分明，撈勻飲會感受到甜、甘、澀等幾種味道輪流散發。

至於銅鑼灣嗰間旗艦店，就為啡迷帶嚟新體驗。店內設有CReation Bar同Filter Bar。

 CReation Bar

  Filter Bar

前者由咖啡師同調酒師準備好12杯唔同配方嘅咖啡cocktail或mocktail，配搭多款生果、茶底甚至汽水沖調，打破傳統咖啡膠囊嘅框架；後者則讓客人可以自由揀沖調咖啡嘅工具同用水，咁就可以試到即使用同一種咖啡豆，但喺唔同因素影響下沖調出嚟嘅味道會有咩分別，了解各工具嘅特性。

 北歐風格三文治(左)、Egg benedict (右)

食物就以北歐風格open-face三文治為主，以自家製嘅酸種麵包做base，搭配唔同嘅食材同醬汁，例如五花肉、扇貝、牛油果等。另外亦有egg benedict同意粉等。

而La vina嘅招牌糕品，好似巴斯克蛋糕、磅蛋糕等，都可以喺呢兩間分店內食到呀！

CR² By Cupping Room
地址: 旺角彌敦道號639號雅蘭中心地下Kiosk 4

Cupping Room Coffee Roasters
地址: 銅鑼灣希慎道33號利園一期3樓306號舖

文、相、片：Kar