烏克蘭被俄羅斯入侵近一個月，戰火仍然未息，每日睇新聞都會令人覺得好難過同沉重。我哋喺香港做到嘅嘢唔多，但都可以透過唔同途徑，略出一分力，支援烏克蘭。香港有餐廳陸續發起及推出唔同嘅產品、活動，為烏克蘭籌款，支援人道救援。大家呢排要選擇餐廳時，不妨都可以支持下佢哋。也願天祐烏克蘭。
烏克蘭餐廳蛋糕義賣 Dacha Restaurant & Bar 
圖：餐廳Facebook
香港少數供應烏克蘭菜嘅東歐餐廳，由一對烏克蘭姊妹經營。家鄉有難，佢哋當然出力支持。世界飲食業界有人發起咗#CookForUkraine運動，邀請各餐廳透過籌款活動或設計同烏克蘭相關嘅食物作支援等。Dacha亦有參與其中，義賣自家製作嘅招牌蜂蜜蛋糕（Medovik），訂單日日爆滿，至今已籌得超過16萬港元。
支援詳情：(按此)
圖：餐廳Facebook
呢2間人氣café同飲品店聯手合作參與 #CookForUkraine 運動，即日起推出期間限定飲品「F🇺🇦K Putin」，賣一杯捐一杯，將不扣除成本，全數捐贈支援烏克蘭嘅人道救援。喺佢哋Facebook透露，所得款項將直接捐到英國Save the Children，而該機構現時喺羅馬尼亞同烏克蘭邊境，為難民提供人道物資。
供應分店：Beans（全線）、我想和你無所事事（德福、沙田、屯門、將軍澳及葵廣分店）
日系café 義賣掛耳咖啡 Favilla Café
圖：餐廳網站
呢間日系café推出「Stand With Ukraine 2.0 義賣掛耳咖啡」，boxset採取預售形式募資，目標希望可以喺一星期內（由2022年3月22日起至2022年3月29日 11:59）預售出250盒，並將所得款項（唔扣除任何成本手續費）暫定全數捐款至comebackalive.in.ua，協助烏克蘭人重建家園。而且喺掛耳包上，更預留咗位置畀大家可以親手寫上祝願，再轉發畀烏克蘭人。不過留意返，是次義賣，將會喺預售數額滿足後先至開始進行生產同出貨，如果預購額不足，將全數退款予預售朋友。
義賣詳情：(按此)
本地精釀啤酒廠 釀酒籌款 Yardley Brothers
圖：餐廳Facebook及網站
響應烏克蘭啤酒品牌「真相釀酒廠」（Pravda Brewery）嘅呼籲，本地精釀啤酒廠Yardley Brothers參與計劃合作。真相釀酒廠而家已經停止釀造啤酒，並將釀酒廠改成庇護所，為婦孺、難民同有需要幫助嘅人提供食物援助。另外佢哋會向合作酒廠提供釀造秘方，希望將所得利潤捐返畀烏克蘭做人道援助。Yardley Brothers就同佢哋聯乘釀製酸啤Putin Huylo Dry Hopped Sour Golden Ale，每賣出一支，YB就會捐出$10畀真相釀酒廠同Lviv City Council，主力幫助婦孺、行動不便人士同埋孤兒等。
支援／買酒詳情：（按此）
雪糕乳酪店 捐款援助 Hushush
圖：位於西貢嘅雪糕乳酪店，應該係香港第一批支援烏克蘭嘅餐廳。佢哋早於2月26號時，已經宣佈會將兩間分店指定時間內嘅15%營業收入，全數捐贈予UNHCR，協助逃避戰亂嘅烏克蘭人。捐款活動喺日前已經完成，佢哋喺Facebook上載證明，連埋自行補數至齊頭尾數，已經捐出4位數字嘅美元。
文：Kar
