今次真係要同各位榴槤Fans講一句機會嚟啦，因為120分鐘榴槤放題今年再度回歸！唔單止可以任食馬來西亞榴槤果肉，仲可以學到榴槤相關知識。今年榴槤質素係點？有邊啲品種可以任食？唔同品種有咩特色？嚟睇開飯仔親身直擊報告啦。
 

榴槤BB同馬來西亞聯邦農業促銷局再次合作舉辦任食品鑑Party，Party全長120分鐘，頭30分鐘可以一邊聽住介紹，一邊先試五款唔同品種嘅榴槤肉。之後90分鐘就係各位榴槤Fans最期待嘅任食環節！
 

如果你都係榴槤Die Hard Fans嘅話，或者都有留意到今年年初開飯仔亦有介紹過呢個榴槤品鑑Party，當時有九款唔同品種，但就有冰鮮嘅問題。而今次就貴精不貴多，縮減到五個品種，但今次終於唔係冰鮮榴槤肉，而係前一晚送到場地，吹咗一晚冷氣嘅室溫榴槤肉，無論香味同口感都進步咗唔少！
 

而今次任食嘅品種包括：888純種老樹、特別介紹嘅名種、D13金包、D24山頂XO，同D197老樹貓山王。食嘅時候記得順左至右嘅次序食，由淡味食到濃味咁先試得清楚嘛。
 

888純種老樹係馬來西亞土生土長嘅品種，平時主要用嚟接枝用，所以野生純種老樹榴槤真係買少見少。榴槤肉比較淺色，味道比其他品種淡，以甜味為主。對於普通人嚟講係入面級，對於榴槤Fans嚟講就只係熱身！
 

呢一輪嘅特別嘉賓係名種，最特別嘅地方係佢每舊榴槤肉嘅風味都有少少唔同！在場有朋友食到花生、朱古力同椰子香。開飯仔試咗三舊，分別係帶果仁香、少少酒香同少少酸。畢竟名種用嘅係野生榴槤，品質的確係難啲控制嘅。口感Creamy不過果核就比較大喇。
 

D13金包係在場唔少榴槤Fans嘅最愛，果肉金黃色因而得名，喺新加坡都相當受歡迎㗎。果核細而且甜度較高，有榴槤獨特嘅回甘。
 

D24山頂XO嚟自果園裡面超過30年樹齡嘅果肉，喺山頂栽種，而XO嘅名係嚟自榴槤有陣陣酒香嘅特點。口感柔軟而回甘餘韻悠長，同樣受歡迎。
 

最後最濃味嘅D197老樹貓山王一樣出自超過30年樹齡嘅榴槤樹，香味同甘味都係最重嘅，有少少似黑朱古力。而且亦帶少少酒香，最後先食到榴槤甜味，味道層次最豐富，亦係感覺比較「大人」嘅口味。不過如果平時係食開泰國味道比較甜貓山王嘅話，可能就會有啲唔慣啦。
 

試清楚哂五款品種嘅特色之後，就輪到90分鐘任食環節啦！首先每枱（一枱八個人）都會有一碟唔同品種嘅榴槤肉，食完之後可以無限添加。就開飯仔觀察Refill速度都算快，不過部分品種例如較受歡迎嘅D13金包數量比較少，去到後期就唔係一碟碟咁Refill而係指定數目，不過大部分客人指定Refill嘅數量都滿足得到。
 

而且主辦保持到一貫嘅細心，枱上有齊膠手套、裝榴槤核嘅紙碗、紙巾同濕紙巾，夠哂衛生。而且今次仲特別提供夾，方便大家喺任食時段夾鐘意嘅榴槤肉。而水一嚟就畀大家解渴，二嚟可以食完一舊榴槤先飲啖水清清口腔，咁就可以試清楚每舊榴槤嘅真味喇。

你都想參加任食品鑑Party？可以去榴槤BB官網訂購，而家11月19、25同26號共四場仲有空位，手快有手慢無呀。而如果呢一輪你都參加唔到嘅話，亦可以留意佢地Facebook Page。希望各位榴槤Fans都食得開心啦。

文、相、片：Cathy