開始涼涼地，打邊爐嘅癮又發作。佐敦有幢大廈咪好多火鍋店嘅，最近又開多間新㗎。晚巿百幾蚊任食，有肥牛有海鮮，都幾抵，即刻同大家八下有咩食先！

嗱，佢分兩part嘅，有啲肉類同手打丸之類，就落單叫，即叫即切；其餘啲腸呀菜呀等等呢，就可以自己出去個雪櫃度任拎。

首推油炸鬼釀蝦膠，唔好淥太耐，蝦膠熟咗就OK，淥完條油炸鬼仲係脆㗎。

仲有比目魚！好少火鍋店會有比目魚揀，放入西班牙海鮮個湯底，啲味幾夾，魚肉好滑。花枝片亦夠爽。

一碟牛拼盤有牛展花、牛脷托、一口肥牛粒同美國肥牛，係幾精緻嘅。不過啲肥牛，就唔多肥喇，略嫌細片咗少少，未必滿足唔到牛魔王。

鍾意內臟嘅話，豬肚、肥腸、鴨血等都有，爽口嘅，配辣鍋應該幾襯。

另外仲有好多其他嘢淥，例如：

鮮蝦滑、鮮墨魚滑、帶子

蜆

青口

意式香草鴕鳥肉

五花豚肉、牛脷托

米線、油麵、鳥冬

仲有，打邊爐點可以冇嘢飲？汽水、涼茶任飲，想啤啤佢嘅都好抵，指定時段人頭計每位第一杯生啤都係1蚊咋，另有買一送一優惠。但講到最呃like，就點計都係坐落就會按人頭送嘅七彩cocktail或mocktail，有青檸梳打、黑加崙子、菠蘿乳酸等味。

呀，不過講定先，甜品款式暫時嚟講……就只得雲呢嗱雪糕任唧。聽講話遲下會多啲款喎。

不過，呢間舖都已經足夠令選擇困難症嘅朋友頭痕，事關佢湯底都有10款揀，仲有得玩雙拼，啲款又每月都會轉下。好多人都喜歡叫嘅係西班牙海鮮鍋同自家製香辣鍋，前者加入蕃茄去熬，所以除咗有海鮮嘅鮮甜味之外仲有微微嘅酸味，幾開胃。比較特別嘅就有花果茶酸辣鍋同綠茶青木瓜湯，不過如果係女生，通常都會鍾意人蔘白肉鍋，滋補呀，蔘味幾出㗎。

調味醬料又有10幾款咁，除咗一般嘅豉油、麻醬、生蒜等，仲有黑松露醬、蜆肉芥末醬等，特別推介自家製香辣醬畀鍾意食辣嘅朋友，辣度適中，既能吊味又唔會搶味。

溫馨提示一句，想食嘅最好預先訂咗位先呀，佢分幾個時段，幾個價錢嘅，最後嗰場，夜鬼可以打到凌晨三點半呀喂。

蒲頭島
地址：佐敦彌敦道219號莊士倫敦廣場10樓

文、相：Kar