2024年又就嚟到喇！新一年第一日當然要食好啲慰勞上年辛苦嘅自己，同埋好好咁迎接新一年啦～以下有幾間brunch推介畀大家，有特色菜同好chill嘅靚景餐廳都有，睇吓邊間啱心水啦。

7道葡萄牙菜節慶brunch Casa Lisboa  

屹立於中環超過14年嘅葡萄牙餐廳，提供正宗傳統葡萄牙料理，喺香港唔係咁易搵到㗎～7道菜葡萄牙節慶Brunch包括5款以海鮮為主嘅前菜，紅蝦他他嘅蝦味好香濃又鮮甜，另有蒜蓉欖油八爪魚及傳統葡萄牙白酒煮蜆等。主菜推介葡萄牙紅蝦蜘蛛蟹肉海鮮飯，依照葡萄牙Nazaré嘅傳統海鮮飯製法烹調，海鮮嘅鮮味滲晒入飯粒中；招牌葡式烤乳豬外脆肉質鮮嫩。食客更可以由餐廳清楚遙望到大館古典建築，悠閒寫意。

供應時間：即日起至1月7日（逢星期六、日及公眾假期）（第一節11:30 / 第二節13:45）

週日魚子醬香檳自助早午餐 Café bord de Mer & Lounge  

新一年想去綠化嘅地方嘆吓，愉景灣酒店呢間餐廳就啱晒！餐廳供應魚子醬香檳自助早午餐好豐富，首先有阿拉斯加蟹腳、皇帝大蝦、紐西蘭青口、磯燒鮑魚、翡翠螺、花甲蜆王等海鮮，重有冰鎮魚子醬配Moët & Chandon香檳及指定紅白酒。另外即場燒烤美食包括炭燒羊架、48個月西班牙黑毛豬配新鮮無花果、黑牌巴馬火腿、熱溶瑞士軟心芝士等，加埋各種甜品，一定食到捧住個肚走呀。

供應時間：即日起逢星期日，11:30-14:30

海傍嘆節日早午餐 Paper Moon  

來自米蘭嘅人氣意大利菜，可以欣賞維港景色。節日早午餐先以海鮮拼盤及意式凍肉拼盤喚醒味蕾，主菜選擇有好多，包括意大利辣肉腸意粉伴茄子、白松露牛乳芝士及意大利雞蛋披薩、紅酒燴羊膝伴蒜香薯蓉、燒澳洲M9和牛西冷伴松露薯蓉（另加$100）等～想更豐富嘅可以升級做香烤海鮮拼盤及燒澳洲安格斯斧頭扒。甜品就有招牌意大利芝士餅、意式朱古力布甸伴杏仁餅碎，以及意式聖誕麵包伴軟芝士忌廉。

供應時間：12月30日至1月1日

飽覽維港海景澳洲菜 Hue Dining  

全店座位都可飽覽維港海景，加上以大量藝術畫作作裝飾，好有氣氛～節慶brunch包括多款前菜，推薦炸蝦卷配香辣蕃茄昆布莎莎醬，香脆惹味嘅炸蝦卷配上酸甜辣都有嘅昆布莎莎醬無咁膩；另有蟹餅班尼迪、火雞炸丸子等選擇。主菜可揀一款，燒乳鴿同食開港式嘅唔同，會配上紅酒煮梨、紅菊苣、威士忌汁，味道層次更豐富；重有伊比利黑毛豬梅花肉、慢煮火雞胸，以及熟成油甘魚等。甜品就提供蛋白霜餅、南瓜撻同法式閃電泡芙畀大家揀。

供應時間：2023年12月及2024年1月

現代法式精緻料理 Ami

位於中環、由米芝蓮星級行政總廚主理嘅現代高級法式料理。佢哋嘅節慶brunch首先有蟹肉沙律、牛油果配炒蛋等，最吸引係呢個煙肉窩夫，配上糖漿及流心蛋係最佳嘅鹹甜配搭！手工蘑菇意粉簡單得嚟香噴噴，意粉口感煙煙韌韌，好出色～雞肉及鴨肝醬批都值得一試，外層酥皮好香脆，配埋滿滿幼滑嘅鴨肝醬內餡好滿足呀。

供應時間：2023年12月30日至2024年1月1日

文：Yanica
編：Cathy