元朗一向多嘢食，但一直都爭緊個大型food court，最近終於出現喇！YOHO Mall内開咗個佔地近萬呎嘅美食廣場，集咗12間餐廳，港、中、日、韓、台、泰式都有，小食正餐到甜品都齊晒。
梳乎厘班戟 Bove
主打梳乎厘班戟嘅小食店Bove，一早已喺掃街界深受歡迎，嚟到元朗當然繼續有即叫即做嘅pancake同雞蛋仔，其中瀑布花生醬梳乎厘班戟就最吸睛啦，成隻碟都係醬，不過呢間仲有得賣埋蛋撻、泡芙同軟雪糕，其他分店冇㗎！
香炸雞脾 三多
大家都好熟悉嘅三多，香炸雞脾絕對係佢哋最受歡迎嘅炸物，即叫即炸，熱辣辣相當脆口，薄薄一層炸皮內嘅雞脾肉仍然嫩滑。
肉餅漢堡 肉餅哥小炒料理
以肉餅創意款式多多而聞名嘅肉餅哥，仲首次推出burger，以肉餅代替漢堡扒，食落嘅口感比平時食開嘅實少少。而要撈飯嘅話，金沙蛋黃煎肉餅應該係首選，成曾都係金黃色嘅鹹蛋汁，夠晒juicy。
泰國船麵 泰麵膳
以泰國船麵為主打嘅餐廳，以八角、荳蔻、胡椒、花椒等正宗泰國香料餚製而成嘅湯底濃香，富香料味，仲有微微辣感。推介安格斯牛肉船麵，幾片安格斯牛輕輕放面，介乎半生熟之間，非常嫩滑。
韓式料理 炑八 Taste
Food court內做唔到韓燒，但就可以做到個人輕食鐵板！餐廳有多款鐵板選擇，最吸睛當然係鰻魚鐵板拌飯啦，原條釜山直送鰻魚橫躺喺鐵板上，加埋秘製燒汁好惹味。西冷鐵板就啱晒肉食獸喇，軟腍兼有肉汁。
黯然銷魂飯 叉燒丼家
睇個名就知嚟到一定要食叉燒啦，要碗「黯然銷魂飯」就啱晒，叉燒半肥瘦，仲有火槍輕輕燒過，微焦帶爐火香同埋蜜糖甜香，肉質軟嫩，至於精髓當然喺隻蛋身上啦，仲要係雙黃添，篤一篤流晒啲蛋汁，滲入飯中好香啊。
水果刨冰 甜舍
大家千其唔好漏咗呢間自成一角嘅甜品舖呀。甜品種類唔算太多，主要都係刨冰、日式蛋糕同埋冰糖葫蘆，刨冰口味包括抹茶、士多啤梨等，呢期季節限定係白桃~ 可惜醬汁唔算話落得好多。而中國傳統小食冰糖胡蘆，仲有變奏嘅生果版，畀糖漿包圍住嘅士多啤梨冰糖胡蘆，外層甜脆。
另外仲有呢5間粉麵同日、台小食店：
章魚大阪燒、章魚小丸子
正宗酸辣粉、蒜泥白肉
招牌麵
台南手工魯肉飯
燒賣、雜錦撈
各位元朗街坊可以mark埋呢個日期，7月15-17日，各間餐廳嘅指定食品仲有$1優惠添！例如買個梳乎厘pancake加多蚊就可以有杯軟雪糕、食個刨冰加多蚊就有枝冰糖葫蘆……
Foodeli
地址：元朗元龍街9號形點I期2樓2042號
文：Kar
相、片：Tom Li