唔少人食飯都鍾意食埋個環境，特別係食西餐，環境有格調食得舒服，連食物嘅味道都好啲。香港地食西餐選擇數之不盡，隨時揀都揀到頭痛，今次介紹以下呢兩間西餐廳，無論食物定裝潢都好有特色，啱晒情侶約會及朋友小聚！
G Place（尖沙咀） 
中式私房菜就聽得多，西式其實都唔少，但原來喺尖沙咀山林道盡頭一條小巷中，竟然藏有呢間咁有特色嘅西餐廳。正正因為餐廳位置較隱蔽，一行到門口就有種遠離煩囂嘅感覺，室內放滿古典裝飾品，充滿古典氣息，適合打卡。食物選擇方面貴精不貴多，每款都由大廚誠心誠意製成，而且每道菜都會用心介紹返畀食客聽。溫馨一提由於係私房菜關係只接受訂座呀。
松葉蟹肉沙律配椰菜花慕絲
作為一道出色嘅前菜，當然要成功打開大家嘅味蕾。呢味松葉蟹肉沙律配椰菜花慕絲，大廚特意選用鮮味嘅日本松葉蟹肉配以櫻桃蘿蔔製成沙律，底層配上混入高湯打成嘅椰菜花慕絲，蟹肉嘅鮮甜配上椰菜花嘅清甜，真係令人愈食愈開胃。
龍蝦湯
龍蝦湯係食西餐時常見嘅湯品，不過好多時坊間都會整得過鹹。餐廳用大量嘅龍蝦熬製，最後將龍蝦連肉及殼打碎，十分足料，啖啖都係香濃嘅龍蝦鮮味之餘鹹味恰到好處。
火炙原隻西班牙紅蝦配薯茸
識食嘅朋友都知道，西班牙紅蝦被譽為海蝦之王，皆因佢比起其他海蝦更鮮甜及帶有濃濃蝦味。餐廳選取King Size級數嘅西班牙紅蝦，足足接近兩隻手掌咁長，坊間真係好少可食到，大廚先將紅蝦烤焗再輕輕炙燒令蝦肉更香口，肉質爽口彈牙，而且隻隻都肥美飽滿充滿蝦膏，一入口蝦嘅鮮味及香味充滿晒成個口腔。
西班牙燒乳豬仔
西班牙乳豬仔先用香草及啤酒醃製一日，再慢煮8小時，最後放入焗爐烤焗，絕對係心機之作。因為用啤酒醃製令乳豬表皮有發酵作用，烤焗出嚟嘅乳豬仔皮脆肉嫩，仲帶有陣陣麥味。
礦加西汁燴羊膝
羊膝比起平時常食嘅羊架肉質更嫩滑多汁，大廚將羊膝慢煮5小時，再配以用紅酒及燒汁製成嘅秘製醬汁，同羊肉淡淡嘅羊騷味真係非常夾。
餓咗咁耐出街搵嘢食，當然要搵間好食嘅，對自己好啲。咁就要搵餐鋸下扒啦。呢間喺銅鑼灣同尖沙咀都有分店嘅西式扒房，主打法國同澳洲嘅菜式，主力供應炭燒食物同多款肉類，喺醬汁同配菜配搭方面，都落咗唔少心機。
燒斧頭扒配雜菌、雜菜、黑松露薯蓉 （限量發售）
嚟到扒房當然要鋸扒，1.5公斤重嘅安格斯斧頭扒嚟自美國，廚師利用燒扒爐，燒香斧頭扒嘅表面，同時鎖緊內裡嘅肉汁，再用焗爐慢慢煮至客人要求嘅熟度。當然，5成熟係最推介嘅，肉質又嫩滑、肉味又香，配埋香濃紅酒牛肉汁同香草醬更可以提升味道層次。
紅酒燴羊膝配自家製燒烤汁配黑松露薯蓉
廚師利用紅酒、雜菜同香草，以慢火將嚟自紐西蘭嘅羊膝燴大約三粒鐘，直至肉質變得軟嫩後，就再將燴羊膝嘅肉汁慢火煮至濃縮，混合埋自家製嘅甜酸燒烤汁，搽返上羊膝度，最後放入焗爐燒香。食落啖啖羶香，係惹味嘅。
鹽味焦糖汁燒豬腩肉配青蘋果沙律
肉食獸嘅選擇仲有豬肉，豬腩肉嚟自荷蘭，廚師以蒜片、百里香、紅椒粉同橄欖油醃製，再以焗爐80度低火煮12個鐘，最後用平底鍋慢火將豬皮烘脆，淋上鹽味焦糖汁。所以外皮香甜脆口，肉質仍然可以保持嫩滑。餐廳特意以青蘋果沙律做配菜，減低豬腩嘅油膩感，有心思呢。
三文魚他他配香草乳酪汁
廚師以刺身級嘅挪威三文魚同煙燻三文魚做主調，將乳酪、乾蔥同刁草加入，調成他他醬。面頭隻溫泉蛋絕對係畫龍點睛之作，配埋烘得香脆嘅多士，整體感覺清新爽脆，係開胃前菜啊。
慢煮三文魚配香草乳酪汁伴小麥米
另一道三文魚嘅菜式，同樣都係選用刺身級嘅挪威三文魚柳，塗上香草同乳酪，以70 度慢火烹煮，利用火鎗輕輕燒一燒三文魚柳嘅表面，魚油即刻出晒嚟，香味倍增，係加分位啊。配搭開胃嘅中東米沙律，感覺健康。
心動不如行動！有興趣就快啲約埋三五知己去嘆下美食！快啲bookmark定啦！
*以上圖片只供參考，所有食品以實物為準. 食品供應因餐廳而異
