三文治同鐵板燒相信大家都食過，但混合兩者嘅鐵板燒三文治大家又食過未呢？尖沙咀新開一間本地創作嘅三文治新品牌，主打全港首創嘅鐵板三文治！餐廳以意想不到嘅食材組合同烹調技巧，喺麵包中融入世界各地美食同埋潮流玩味元素，為大家帶嚟多款「不平凡」嘅三文治！

拉麵叉燒鐵板三文治($56)

好多時睇日本卡通或節目都會出現一款炒麵熱狗，而呢個拉麵叉燒鐵板三文治靈感就係嚟自佢！廚師團隊巧妙咁將拉麵經典配料融入三文治之中，包括自家製日式叉燒片、浸泡48小時嘅味付溏心蛋、味噌拉麵、味付筍絲同牛油粟米粒，主廚更特登加入以西京味噌調製嘅味噌蛋黃醬提鮮，食落真係有種食緊拉麵嘅感覺，有趣有趣。

歐陸監獄鐵板三文治($54)

呢個三文治餡料就夠晒豐富！有由唔同蔬菜同番茄醬燉煮而成嘅法式普羅旺斯燉肉丸，再配上玫瑰芝士燴通心粉、本地水耕水晶生菜、香港人至愛嘅燶邊流心蛋，仲有由三種芝士混合而成嘅熔岩芝士，一啖食落口真係好滿足～

早安西西里鐵板三文治($35)

唔想咁heavy，可以試試呢個早安西西里鐵板三文治。加入西西里島的特色甜酸燴菜，配上厚燒蔬菜奄列、脆薯餅、馬蘇里拉芝士，味道酸酸甜甜好開胃。

3日3夜自家手切薯條($49/大、$35中)

雖然餐廳主打三文治，但其他小食都幾出色吓。開飯仔私心推薦呢個自家手切薯條，挑選質地鬆粉嘅Agria馬鈴薯，再加上獨特嘅炸薯條手法，聽講要用三日三夜先完成到～薯條口感好似玻璃咁薄脆，仲有得加配自家製番茄醬、松露蛋黃醬或黑蒜滋味醬食呀。

酥脆牛油果配芒果甜辣醬($28)

將人氣食品牛油果混合北海道男爵薯蓉、煙肉碎同巴馬臣芝士後炸至金黃，口感外脆內軟，帶啖啖牛油果香氣。

芝士烤普羅旺斯燉肉丸($28)

由唔同蔬菜同番茄醬燉煮而成嘅法式普羅旺斯燉肉丸，肉汁豐富味道清新，好味又健康～

HAND3AG

地址: 尖沙咀河內道18號K11購物藝術館B2樓B226-B227A號舖

文、相、片: Yanica